ଉଦ୍ଧବ ଠାକରେଙ୍କ ଉପରେ କାହିଁକି ଅସନ୍ତୁଷ୍ଟ ଅଛନ୍ତି ଏକନାଥ ସିନ୍ଦେ ?
ମୁମ୍ବାଇ : ଶିବସେନାର ଜଣେ ଟାଣୁଆ ନେତା ତଥା ମହାରାଷ୍ଟ୍ର ସରକାରରେ ମନ୍ତ୍ରୀ ଥିବା ଏକନାଥ ସିନ୍ଦେଙ୍କ ବିଦ୍ରୋହ ପରେ ଉଦ୍ଧବ ଠାକରେ ସରକାର ଉପରେ ବିପଦ ମାଡ଼ିଆସିଛି । ତେବେ ଉଦ୍ଧବ ଠାକରେଙ୍କ ବିରୋଧରେ ସେ କାହିଁକି ବିଦ୍ରୋହ କଲେ ?
Sambad is now on WhatsApp
Join and get latest news updates delivered to you via WhatsApp
ମରାଠୀ ଖବରକାଗଜ ଲୋକମତର ଏକ ରିପୋର୍ଟ ଅନୁସାରେ ଉଦ୍ଧବଙ୍କ ଉପରେ ଏକନାଥଙ୍କ ଅସନ୍ତୋଷ ରାଜ୍ୟରେ ମହା ବିକାଶ ଅଘାଡି (ଏମଭିଏ) ସରକାର ଗଠନ ହେବା ପରଠାରୁ ଆରମ୍ଭ ହୋଇଥିଲା । ମେଣ୍ଟ ସରକାରରେ ମୁଖ୍ୟମନ୍ତ୍ରୀ ପଦପାଇଁ ପ୍ରଥମେ ଏକନାଥଙ୍କ ନାମ ଉଠିଥିଲା । କିନ୍ତୁ ଉଦ୍ଧବ ନିଜେ ମୁଖ୍ୟମନ୍ତ୍ରୀ ହୋଇଯାଇଥିଲେ ।
ମେଣ୍ଟ ସରକାରରେ ଏକନାଥଙ୍କୁ ନଗର ଉନ୍ନୟନ ବିଭାଗ ପରି ଏକ ଗୁରୁତ୍ବପୂର୍ଣ୍ଣ ବିଭାଗ ଦିଆଯାଇଥିଲେ ବି ତାଙ୍କୁ ଯଥେଷ୍ଟ କ୍ଷମତା ଦିଆଯାଇନଥିଲା । ଏପରିକି ଏକ ଫାଇଲରେ ସ୍ବାକ୍ଷର କରିବା ପୂର୍ବରୁ ତାଙ୍କୁ ମୁଖ୍ୟମନ୍ତ୍ରୀ କାର୍ଯ୍ୟାଳୟର ଅନୁମତି ନେବାକୁ ପଡୁଥିଲା । ଏହାକୁ ନେଇ ସେ ଅସନ୍ତୁଷ୍ଟ ଥିଲେ । ସେହିପର ଅନେକ ଗୁରୁତ୍ବପୂର୍ଣ୍ଣ ବିଭାଗ ଏନସିପିକୁ ଦିଆଯିବାକୁ ନେଇ ସେ ଅସନ୍ତୁଷ୍ଟ ଥିଲେ । ଶିବସେନାର ବିଧାୟକମାନଙ୍କୁ ଯଥେଷ୍ଟ ପରିମାଣରେ ପାଣ୍ଠି ଆବଣ୍ଟନ କରାଯାଉନଥିଲା, ଫଳରେ ଅନେକ ପ୍ରକଳ୍ପ ଅସମ୍ପୂର୍ଣ୍ଣ ହୋଇପଡ଼ିରହିଥିଲା । ଅନ୍ୟପକ୍ଷରେ ଶିବସେନାର ସାଂଗଠନିକ ସ୍ତରରେ ତାଙ୍କୁ କଣଠେସା କରିଦିଆଯାଇଥିଲା । ଏହା ମଧ୍ୟ ଅସନ୍ତୋଷର ଏକ କାରଣ ବୋଲି କୁହାଯାଉଛି ।
ଗତ କିଛି ମାସ ହେଲା ଉଦ୍ଧବ ଠାକରେଙ୍କ ସହ ଏକନାଥଙ୍କର କୌଣସି ଯୋଗାଯୋଗ ନଥିବା କୁହାଯାଉଛି ।