ପ୍ରେମିକଙ୍କୁ ଖୋଜି ପତ୍ନୀଙ୍କ ବାହାଘର କରାଇଲେ ସ୍ୱାମୀ, ସ୍ତ୍ରୀଙ୍କୁ ଫେରାଇଲେ ପୁରୁଣା ପ୍ରେମ
କାନପୁର: ପତ୍ନୀଙ୍କ ମୁହଁରୁ ତାଙ୍କ ପ୍ରେମ କାହାଣୀ ଶୁଣିବା ଆଉ ଅଧୁରା ରହିଥିବା ଲଭଷ୍ଟୋରୀକୁ ସମ୍ପୂର୍ଣ୍ଣ କରିବା ପାଇଁ ଜଣେ ସ୍ୱାମୀଙ୍କ ଚେଷ୍ଟା ଏହି ଘଟଣା କୌଣସି ଫିଲ୍ମ କାହାଣୀଠାରୁ କମ ନୁହେଁ | ବଲିଉଡର ୧୯୯୯ ବ୍ଲକବଷ୍ଟର ଫିଲ୍ମ ‘ହମ୍ ଦିଲ୍ ଦେ ଚୁକେ ସନମ୍’ର ଏକ ଉତ୍କୃଷ୍ଟ ଉଦାହରଣ ଉତ୍ତରପ୍ରଦେଶର କାନପୁରରେ ଦେଖିବାକୁ ମିଳିଛି । ଯିଏ କି ନିଜ ପତ୍ନୀଙ୍କ ଅଧୁରା ପ୍ରେମ କାହାଣୀ ଶୁଣି ତାଙ୍କ ପ୍ରେମକୁ ଫେରାଇଆଣିବାକୁ ପ୍ରଚେଷ୍ଟା କରିଥିଲେ ଓ ଏଥିରେ ସଫଳ ମଧ୍ୟ ହୋଇଛନ୍ତି | ମିଳିଥିବା ସୂଚନା ମୁତାବକ ଚଳିତ ବର୍ଷ ମେ ମାସରେ ପଙ୍କଜ ଶର୍ମା କୋମଲଙ୍କୁ ବିବାହ କରିଥିଲେ | ପଙ୍କଜ ଶର୍ମାଙ୍କ କହିବା ମୁତାବକ ଏହି ବିବାହକୁ ନେଇ ତାଙ୍କ ପତ୍ନୀ ଖୁସିନଥିବାର ସେ ଅନୁଭବ କରିଥିଲେ | ଏହା ପରେ ସେ ନିଜ ପତ୍ନୀଙ୍କୁ ଦୁଃଖୀ ରହିବାର କାରଣ ପଚାରିଥିଲେ |
Sambad is now on WhatsApp
Join and get latest news updates delivered to you via WhatsApp
କୋମଲ କହିଥିଲେ ଯେ ସେ ପଙ୍କଜଙ୍କୁ ବିବାହ କରି ମନସ୍ତାପ କରୁନାହାନ୍ତି, କିନ୍ତୁ ତାଙ୍କ ପ୍ରେମିକ ପିଣ୍ଟୁଙ୍କୁ ମନରୁ ଭୁଲି ପାରୁନାହାନ୍ତି | କୋମଲ, ନିଜ ସ୍ୱାମୀ ପଙ୍କଜଙ୍କୁ ନିଜର ପ୍ରେମ କାହାଣୀ ଶୁଣାଇଥିଲେ | କିଭଳି ପିଣ୍ଟୁଙ୍କୁ ସେ ଭେଟିଥିଲେ, କିଭଳି ଉଭୟ ପରସ୍ପରକୁ ହୃଦୟ ଦେଇଥିଲେ, ସେବାବଦରେ ସବୁ କିଛି ଖୋଲିକି କହିଥିଲେ | ଆଉ କୋମଲଙ୍କ ପ୍ରେମ କାହାଣୀ ଶୁଣିବା ପରେ ସ୍ୱାମୀ ପଙ୍କଜ ବେଶ ପ୍ରଭାବିତ ହୋଇଥିଲେ | ସେ ତାଙ୍କ ପ୍ରେମିକ ପିଣ୍ଟୁଙ୍କୁ ବିବାହ କରିବାକୁ ଚାହୁଁଥିବାର ମଧ୍ୟ ସ୍ୱୀକାର କରିଥିଲେ।
ଏହା ପରେ ପଙ୍କଜ ଶର୍ମା କୋମଲଙ୍କ ବାପା-ମାଙ୍କ ସହ କଥା ହୋଇଥିଲେ। କୋମଲଙ୍କ ବାପା-ମା ତାଙ୍କୁ ମନାଇବା ପାଇଁ ବହୁ ଚେଷ୍ଟା କରିଥିଲେ, କିନ୍ତୁ ସେ ପିଣ୍ଟୁଙ୍କୁ ବିବାହ କରିବାକୁ ଚାହୁଁଛନ୍ତି ବୋଲି ବାରମ୍ବାର କହିଥିଲେ । ଏହା ପରେ ପଙ୍କଜ କୋମଲଙ୍କ ପ୍ରେମିକଙ୍କୁ ଖୋଜିଥିଲେ ଓ ଉଭୟଙ୍କ ବାହାଘର କରିବାକୁ ଏକ ଯୋଜନା ପ୍ରସ୍ତୁତ କରିଥିଲେ | ପଙ୍କଜ ନିଜେ ଜଣେ ଓକିଲଙ୍କ ସହ କଥା ହୋଇଥିଲେ ଏବଂ ଉଭୟଙ୍କର କୋର୍ଟରେ ବିବାହ କରାଇଥିଲେ। କୋମଲ ଏବଂ ପିଣ୍ଟୁଙ୍କ ବିବାହରେ ଉଭୟ ପରିବାରର ସମ୍ପର୍କୀୟ ଅଂଶଗ୍ରହଣ କରିଥିଲେ।