ଛାଡପତ୍ର ପରେ ବି ମନ ମାନିଲାନି, ପତ୍ନୀଙ୍କୁ ହତ୍ୟା କଲା ସ୍ୱାମୀ

ଲଖନଉ: ଉତ୍ତରପ୍ରଦେଶର ସନ୍ତ କବୀର ନଗର ଜିଲ୍ଲାର ଧରାମସିଂହୱାରେ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଗତକାଲି ରାତିରେ ଝଗଡା ପରେ ଛାଡପତ୍ର ଦେଇଥିବା ସ୍ୱାମୀ ତାଙ୍କର ୫୨ ବର୍ଷୀୟ ପତ୍ନୀଙ୍କୁ କୁରାଢ଼ୀରେ ହତ୍ୟା କରିଛନ୍ତି | ତେବେ ମାକୁ ବଞ୍ଚାଇବାକୁ ଆସିଥିବା ପୁଅକୁ ମଧ୍ୟ ଅଭିଯୁକ୍ତ ବାପା କୁରାଢ଼ୀରେ ଆକ୍ରମଣ କରିବାକୁ ପଛାଇ ନାହିଁ | ବାପାର ଆକ୍ରମଣରେ ପୁଅ ମଧ୍ୟ ଗୁରୁତର ଆହତ ହୋଇଛନ୍ତି | ଚିକିତ୍ସା ପାଇଁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି | ଘଟଣା ବାବଦରେ ଜଣାପଡିବା ପରେ ସ୍ଥାନୀୟ ଲୋକ ପୁଲିସକୁ ସୂଚନା ଦେଇଥିଲେ, ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଥିଲା। ବର୍ତ୍ତମାନ ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି। ପୁଲିସ ପକ୍ଷରୁ ମିଳିଥିବା ସୂଚନା ମୁତାବକ ଅଭିଯୁକ୍ତ ମହମ୍ମଦ ୨ ବର୍ଷ ପୂର୍ବେ ତାଙ୍କ ପତ୍ନୀ ତାହିରାଙ୍କୁ ଛାଡପତ୍ର ଦେଇଥିଲେ। ଆଉ ସେବେଠାରୁ ମହମ୍ମଦ ତାହିରାଙ୍କଠାରୁ ଅଲଗା ରହୁଥିଲେ |

ତେବେ ଗତକାଲି ମହମ୍ମଦ ହଠାତ ତାହିରାଙ୍କ ପାଖକୁ ଆସିଥିଲେ | କୌଣସି କାରଣକୁ ନେଇ ମହମ୍ମଦ ଏବଂ ତାହିରାଙ୍କ ମଧ୍ୟରେ ଝଗଡା ହୋଇଥିଲା | ଏଥିରେ ରାଗିଯାଇ ମହମ୍ମଦ ତାହିରାଙ୍କୁ କୁରାଢ଼ୀରେ ଆକ୍ରମଣ କରି ହତ୍ୟା କରିଥିଲେ। ଏହି ସମୟରେ, ମା’ଙ୍କ ସ୍ୱର ଶୁଣିବା ପରେ ପୁଅ ମା'କୁ ବଞ୍ଚାଇବାକୁ ଆସିଥିବାବେଳେ ମହମ୍ମଦ ତାଙ୍କ ପୁଅକୁ କୁରାଢ଼ୀରେ ମଧ୍ୟ ଆକ୍ରମଣ କରିଥିଲେ। ଏହି କାରଣରୁ ସେ ମଧ୍ୟ ଗୁରୁତର ଆହତ ହୋଇଥିଲେ, ତାଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି | ପରିବାର ସଦସ୍ୟଙ୍କଠାରୁ ମିଳିଥିବା ଅଭିଯୋଗ ଆଧାରରେ ଏକ ମାମଲା ପଂଜିକୃତ ହୋଇଥିବାବେଳେ ଅଭିଯୁକ୍ତକୁ ଏବେ ଗିରଫ କରାଯାଇଛି |