ହାଇଦ୍ରାବାଦ ଏନ୍କାଉଣ୍ଟର ‘ନକଲି’ ଥିଲା
ସୁପ୍ରିମ୍ କୋର୍ଟ ଯାଞ୍ଚ କମିଟିର ରିପୋର୍ଟ ଦାଖଲ
ହାଇଦ୍ରାବାଦ : ହାଇଦ୍ରାବାଦରେ ୨୦୧୯ରେ ଜଣେ ଯୁବତୀଙ୍କୁ ଗଣ ଦୁଷ୍କର୍ମ ପରେ ବର୍ବର ହତ୍ୟା କରାଯାଇଥିଲା ଏବଂ ଏହି ମାମଲାର ସମସ୍ତ ୪ ଅଭିଯୁକ୍ତ ପୁଲିସ ଏନ୍କାଉଣ୍ଟରରେ ନିହତ ହୋଇଥିଲେ। ଏହାର ଯାଞ୍ଚ ପାଇଁ ସୁପ୍ରିମ୍ କୋର୍ଟ ଏକ କମିଟି ଗଠନ କରିଥିଲେ। ଆଜି କମିଟି ଦାଖଲ କରିଥିବା ରିପୋର୍ଟରେ କୁହାଯାଇଛି ଯେ ପୁଲିସ କର୍ମୀମାନେ ଅଭିଯୁକ୍ତଙ୍କ ଉପରକୁ ଜାଣିଶୁଣି ଗୁଳି ଚଳାଇଥିଲେ। ସେମାନଙ୍କୁ ଶେଷ କରିଦେବା ଉଦ୍ଦେଶ୍ୟରେ ପୁଲିସ ଏହିଭଳି ପଦକ୍ଷେପ ନେଇଥିଲା ଏବଂ ଏହି ଏନ୍କାଉଣ୍ଟର ନକଲି ଥିଲା ବୋଲି ଯାଞ୍ଚ କମିଟି କହିଛି।
Sambad is now on WhatsApp
Join and get latest news updates delivered to you via WhatsApp
ହାଇଦ୍ରାବାଦରେ ୨୦୧୯ ନଭେମ୍ବର ୨୬ ତାରିଖ ରାତିରେ ଜଣେ ଭେଟନାରି ଡାକ୍ତରଙ୍କୁ ଗଣ ଦୁଷ୍କର୍ମ ପରେ ହତ୍ୟା କରାଯାଇଥିଲା। ମାମଲାରେ ୪ ଅଭିଯୁକ୍ତଙ୍କୁ ୬ ଡିସେମ୍ବର ଭୋର୍ ସମୟରେ ପୁଲିସ ଏକ ଏନ୍କାଉଣ୍ଟରରେ ନିପାତ କରିଥିବା ଦାବି କରିଥିଲା। ଅଭିଯୁକ୍ତମାନେ ପୁଲିସର ବନ୍ଧୁକ ଛଡ଼ାଇ ଫେରାର୍ ହୋଇଯିବାକୁ ଉଦ୍ୟମ କରୁଥିବା ବେଳେ ଗୁଳିମାଡ଼ରେ ନିହତ ହୋଇଥିବା ପୁଲିସ କହିଥିଲା। ପୁଲିସର ଏଭଳି କାର୍ଯ୍ୟାନୁଷ୍ଠାନକୁ ସାଧାରଣରେ ପ୍ରଶଂସା ମିଳିଥିବା ବେଳେ ଏହା ଏକ ଯୋଜନାବଦ୍ଧ ହତ୍ୟା ବୋଲି ମଧ୍ୟ କୁହାଯାଉଥିଲା। ଏହାର ତଦନ୍ତ ପାଇଁ ସୁପ୍ରିମ୍ କୋର୍ଟ ପୂର୍ବ ବିଚାରପତି ବିଏସ୍ ସିରପୁରକରଙ୍କ ନେତୃତ୍ବରେ ଯାଞ୍ଚ କମିଟି ଗଠନ କରିଥିଲେ।