ମୁଁ ମଦ୍ୟପାନ କରିନାହିଁ, ମୋ ଶରୀରରେ ମଦ୍ୟ ଆପେଆପେ ତିଆରି ହୁଏ: କୋର୍ଟରେ ଯୁବକଙ୍କ ଅଜବ ବୟାନ

ବ୍ରୁସେଲ୍ସ: ୟୁରୋପର ବେଲଜିୟମ କୋର୍ଟରେ ଏକ ମାମଲାର ଶୁଣାଣି ସମୟରେ ହାସ୍ୟାସ୍ପଦ ପରିବେଶ ସୃଷ୍ଟି ହୋଇଥିଲା। ଡଙ୍କନ୍ ଡ୍ରାଇଭିଂରେ ଧରାପଡିଥିବା ଜଣେ ଯୁବକ ବିଚାରପତିଙ୍କ ଆଗରେ ଯୁକ୍ତି କରିଥିଲେ ଯେ ସେ ମଦ୍ୟପାନ କରିନାହାନ୍ତି, କିନ୍ତୁ ତାଙ୍କ ଶରୀରରେ ମଦ୍ୟ ଆପେଆପେ ତିଆରି ହୋଇଥାଏ।

ପ୍ରକୃତରେ, ୪୦ ବର୍ଷିୟ ଆନ୍ସେ ଗେସ୍କୁଏଙ୍କ ବିରୋଧରେ ମଦ୍ୟପାନ କରି କାର ଚଳାଉଥିବା ଅଭିଯୋଗ ହୋଇଥିଲା। ପୋଲିସର ସୂଚନାନୁସାରେ, ୨୦୨୨ ମସିହାରେ ରାସ୍ତାରେ ଯାନ ଯାଞ୍ଚ ସମୟରେ ଆନ୍ସେଙ୍କ ବ୍ରେଥ୍ ଅନାଲାଇଜର ପରୀକ୍ଷା କରାଯାଇଥିଲା। ଜଣାପଡିଥିଲା ତାଙ୍କ ଶରୀରରେ ମଦ୍ୟପାନର ପରିମାଣ ୦.୯୧ ମିଗ୍ରା ଥିଲା। ନିୟମ ଅନୁଯାୟୀ, ଯଦି ଗାଡି ଚଳାଇବା ସମୟରେ ମଦ୍ୟପାନର ପରିମାଣ ୦.୨୨ ମିଗ୍ରାରୁ ଅଧିକ ତେବେ ଏହା ଅପରାଧ ଅଟେ । ଏଥିପାଇଁ ଜରିମାନା ଏବଂ ଜେଲ ଦଣ୍ଡର ନିୟମ ରହିଛି।

ପୁଲିସ ଅଭିଯୋଗ କରିଛି ଯେ ପୂର୍ବରୁ ୨୦୧୯ ମସିହାରେ ମଦ୍ୟପାନ କରି ଗାଡି ଚଳାଇବା ସମୟରେ ଆନ୍ସେ ମଧ୍ୟ ଧରାପଡିଥିଲେ। ଆନ୍ସେ ପୁଲିସର ଅଭିଯୋଗକୁ ପ୍ରତ୍ୟାଖ୍ୟାନ କରି କୋର୍ଟରେ ମାମଲା ଲଢ଼ିବାକୁ ନିଷ୍ପତ୍ତି ନେଇଥିଲେ। ଆନ୍ସେଙ୍କ ଓକିଲ କୋର୍ଟଙ୍କୁ କହିଛନ୍ତି ସେ ଅଟୋ-ବ୍ରୁଅରି ସିଣ୍ଡ୍ରୋମ ନାମକ ଏକ ରୋଗରେ ପୀଡିତ । ଏହି ରୋଗରେ ଶରୀରରେ ଏହିପରି ରାସାୟନିକ ପଦାର୍ଥ ଉତ୍ପନ୍ନ ହୁଏ ଯେଉଁଥିପାଇଁ ନିଶ୍ୱାସ ବିଶ୍ଳେଷଣକାରୀ ପରୀକ୍ଷା ସମୟରେ ଶରୀରରେ ମଦ୍ୟପାନ ହେବାର ସନ୍ଦେହ ହୋଇଥାଏ । ଡାକ୍ତରୀ କାଗଜପତ୍ର ଦେଖିବା ପରେ କୋର୍ଟ ଅଭିଯୁକ୍ତକୁ ନିର୍ଦ୍ଦୋଷରେ ଖଲାସ କରିଥିଲେ।

ଅଟୋ ବ୍ରୁଅରି ସିଣ୍ଡ୍ରୋମ କ’ଣ?
ଡାକ୍ତରଙ୍କ ଅନୁଯାୟୀ ଅଟୋ-ବ୍ରୁଅରି ସିଣ୍ଡ୍ରୋମ (ଏବିଏସ୍) ରେ ପୀଡିତଙ୍କର ପାଚନ ତନ୍ତ୍ର ନଷ୍ଟ ହୋଇଯାଇଥାଏ। ଏହି ରୋଗ ଯୋଗୁ ପୀଡିତଙ୍କର ଶରୀରରେ କାର୍ବୋହାଇଡ୍ରେଟ୍ ପରିମାଣ ବଢ଼ିଥାଏ। ଯେଉଁ କାରଣରୁ ବ୍ୟକ୍ତିଙ୍କର ଶରୀର କାର୍ବୋହାଇଡ୍ରେଟ୍କୁ ମଦ୍ୟରେ ପରିଣତ କରେ। ଏହି ସିଣ୍ଡ୍ରୋମ ଯୋଗୁ କୌଣସି ମଦ୍ୟପାନ ନକରି ମଧ୍ୟ ପୀଡିତଙ୍କର ଶରୀରରେ ମଦ୍ୟପାନ ଭଳି ଲକ୍ଷଣ ଦେଖା ଦେଇଥାଏ।

ସମ୍ବନ୍ଧିତ ଖବର