ମୁଁ ଏଠାକୁ ପ୍ରଧାନମନ୍ତ୍ରୀ ହେବାକୁ ଆସିନାହିଁ; ଗୁଜରାଟରେ ପହଞ୍ଚି ଏଭଳି କହିଲେ କେଜ୍ରିୱାଲ

ନୂଆଦିଲ୍ଲୀ: ଏବେ ଗୁଜରାଟ ଗସ୍ତରେ ଅଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ। ପଞ୍ଜାବରେ ସରକାର ଗଢ଼ିବା ପରେ ଏବେ ଗୁଜରାଟ ଉପରେ ନଜର ପକାଇଛନ୍ତି କେଜ୍ରିୱାଲ। ୨୦୨୪ରେ ହେବାକୁ ଥିବା ଲୋକସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କେଜ୍ରିୱାଲ ଟକ୍କର ଦେବେ ବୋଲି ଚର୍ଚ୍ଚା ହେଉଥିବା ବେଳେ ଗୁଜରାଟରେ ପହଞ୍ଚି କେଜ୍ରିୱାଲ ଏକ ବଡ଼ ବିବୃତି ଦେଇଛନ୍ତି।

ସେ କହିଛନ୍ତି, ମୁଁ ପ୍ରଧାନମନ୍ତ୍ରୀ ହେବାକୁ ଏଠାକୁ ଆସିନାହିଁ। ଆମେ କୌଣସି ପଦ ପାଇଁ ଏଠାକୁ ଆସିନାହୁଁ। ମୁଁ କେବଳ ଭାରତକୁ ବିଶ୍ୱର ଏକ ନମ୍ବର ଦେଶ କରିବାକୁ ଚାହୁଁଛି। କେଜ୍ରିୱାଲ ତାଙ୍କ ଗସ୍ତ ସମୟରେ ଏକ ସାମ୍ବାଦିକ ସମ୍ମିଳନୀ ମଧ୍ୟ କରିଥିଲେ। ଏହି ସମୟରେ ଗୁଜରାଟର ଲୋକମାନେ ଅତ୍ୟନ୍ତ ଦୁଃଖିତ ବୋଲି ସେ କହିଥିଲେ।

ସେ କହିଥିଲେ ଯେ, ଗତ ୨୭ ବର୍ଷ ଧରି ଏଠାରେ ବିଜେପି ସରକାର ରହିଛି। ଏହି କାରଣରୁ ସେମାନଙ୍କ ମଧ୍ୟରେ ଅନେକ ଅହଙ୍କାର ଆସିଛି। ସେମାନେ କାହା କଥା ଶୁଣୁ ନାହାନ୍ତି। ସେମାନେ କହୁଛନ୍ତି ଯେ ଲୋକଙ୍କ ପାଖରେ ଅନ୍ୟ ବିକଳ୍ପ ନାହିଁ, ଲୋକମାନେ କିଛି କରିପାରିବେ ନାହିଁ। ଆମ୍ ଆଦମୀ ପାର୍ଟି ଗତ କିଛି ଦିନ ହେବ ଜନସାଧାରଣଙ୍କ ସମ୍ମୁଖରେ ଜନସାଧାରଣଙ୍କ ଉପରେ ଆଲୋଚନା କରି ଏକ ସକରାତ୍ମକ ଅଭିଯାନ ଚଳାଇଛି। ମୁଦ୍ରାସ୍ଫୀତିରୁ କିପରି ମୁକ୍ତି ପାଇବେ, ବେକାରୀ ମହିଳାମାନଙ୍କ ପାଇଁ ଏବଂ ଚାଷୀଙ୍କ ପାଇଁ କ’ଣ କରାଯିବ ତାହା ଆମେ କହୁଛୁ। ଆମେ ଦିଲ୍ଲୀର ସ୍ୱାସ୍ଥ୍ୟ, ଶିକ୍ଷା ଏବଂ ମହିଳାଙ୍କ ପାଇଁ ଭଲ କାମ କରିଛୁ। ଦିଲ୍ଲୀର ମହିଳାମାନଙ୍କୁ ମାଗଣା ପରିବହନ ଦେବା ସହ, ଜଳ ଏବଂ ବିଦ୍ୟୁତ ମାଗଣା କରିଛୁ। ୧୨ଲକ୍ଷ ଯୁବକଯୁବତୀଙ୍କୁ ରୋଜଗାର ଦେଇଛୁ। ସେହିଭଳି ଗୁଜରାଟରେ ଯଦି ଆମ ସରକାର ଗଠନ ହୁଏ, ତେବେ ଆମେ ମଧ୍ୟ ଏଠାରେ ଥିବା ଲୋକଙ୍କୁ ବହୁତ ସୁବିଧା ପ୍ରଦାନ କରିବୁ।