ଏୟାର୍‌ ଷ୍ଟ୍ରାଇକ୍‌ରେ ଜୈଶ୍‌ର ୪ଟି ବଡ଼ କୋଠା ଧ୍ୱଂସ ପାଇଥିବା କଥା ସତ, ରାଡାର୍‌ ଛବିରୁ ଧରାପଡ଼ିଲା ପାକ୍‌ର ମିଛ

ନୂଆଦିଲ୍ଲୀ: ପାକିସ୍ତାନର ବାଲାକୋଟଠାରେ ଥିବା  ଆତଙ୍କବାଦୀଙ୍କ ପ୍ରଶିକ୍ଷଣ ଶିବିର ଉପରେ ଭାରତୀୟ ବାୟୁସେନା କରିଥିବା ଏୟାର୍‌ ଷ୍ଟ୍ରାଇକ୍‌ରେ ହୋଇଥିବା କ୍ଷୟକ୍ଷତିକୁ ଅସ୍ୱୀକାର କରିଥିଲା ପାକିସ୍ତାନ। ଭାରତୀୟ ବାୟୁସେନା ଆତଙ୍କବାଦୀ ସଂଗଠନ ଜୈଶ୍‌-ଇ-ମହମ୍ମଦର ୪ଟି ବଡ଼ କୋଠା ଧ୍ୱଂସ କରିଥିବା ସୂଚନା ମିଳିଥିବା ବେଳେ ଏହାକୁ ପାକିସ୍ତାନ ଅସ୍ୱୀକାର କରିଥିଲା । ମାତ୍ର ଏବେ ଜାଣିବାକୁ ମିଳିଛି ଯେ ବାସ୍ତବରେ ଭାରତୀୟ ବାୟୁସେନା ୪ଟି ବଡ଼ କୋଠାକୁ  ଧ୍ୱଂସ କରିଥିଲା ।  ରାଡାରରୁ ପ୍ରାପ୍ତ ଛବି ଦେଖିବା ପରେ ସତ ସାମ୍ନାକୁ ଆସିଛି।

ରିପୋର୍ଟରୁ ଜାଣିବାକୁ ମିଳିଛି ଯେ ମଙ୍ଗଳବାର ରାତି ୩ଟା ୩୦ ସମୟରେ ଭାରତୀୟ ବାୟୁସେନାର ମିରାଜ୍‌-୨୦୦୦ ଯୁଦ୍ଧ ବିମାନଗୁଡ଼ିକ ପାକିସ୍ତାନ ସୀମାରେ ପଶି ଧ୍ୱଂସ କରିଥିବା ବିଲ୍ଡିଂଗୁଡ଼ିକ ଜୈଶ୍‌ ଦ୍ୱାରା ପରିଚାଳିତ ମାଦ୍ରାସାର ଥିଲା। ମିରାଜ-୨୦୦୦ ସେହି ବଡ଼ କୋଠାଗୁଡ଼ିକୁ ଧ୍ୱଂସ କରିଛି ବୋଲି ଗୁଇନ୍ଦା ରାଡାରରେ ଦେଖିବାକୁ ମିଳିଛି। ଧ୍ୱଂସ ପାଇଥିବା ୪ଟି କୋଠା ଜୈଶ୍‌ର ଗେଷ୍ଟ୍‍ ହାଉସ୍‌ ଭାବେ ବ୍ୟବହାର କରାଯାଉଥିଲା। ସେଠାରେ ମାସୁଦ୍‌ ଆଝାରର ଭାଇ ରହୁଥିଲା ବୋଲି ବି ସୂଚନା ରହିଥିଲା।