ଲିଫ୍ଟରେ କୁକୁର ନେବା ଘଟଣାକୁ ନେଇ ମହିଳାଙ୍କୁ ଚାପୁଡ଼ା ମାରିଲେ ପୂର୍ବତନ ଆଇଏଏସ ଅଧିକାରୀ

ନୂଆଦିଲ୍ଲୀ: ଉତ୍ତରପ୍ରଦେଶର ଗୌତମ ବୁଦ୍ଧ ନଗର ଜିଲ୍ଲା ନୋଏଡା ଠାରେ ପୁଣି ଥରେ କୁକୁର ପାଇଁ ଲଢେଇ ମାମଲା ସାମ୍ନାକୁ ଆସିଛି। ନୋଏଡାସ୍ଥିତ ଏକ ହାଉସିଂ ସୋସାଇଟିର ଲିଫ୍ଟରେ କୁକୁର ନେବା ନେଇ ଯୁକ୍ତିତର୍କ ପରେ ଜଣେ ଅବସରପ୍ରାପ୍ତ ଆଇଏଏସ୍ ଅଧିକାରୀ ଜଣେ ମହିଳାଙ୍କୁ ଚାପୁଡ଼ା ମାରିଥିଲେ। ରିପୋର୍ଟ ଅନୁଯାୟୀ, ଏହି ପୂର୍ବତନ ଅଧିକାରୀ କୁକୁରକୁ ଲିଫ୍ଟରେ ନେବାକୁ ବିରୋଧ କରୁଥିଲେ। ବର୍ତ୍ତମାନ ଏହି ବିବାଦର ଭିଡିଓ ମଧ୍ୟ ସାମ୍ନାକୁ ଆସିଛି। ବର୍ତ୍ତମାନ ଏହି ବିବାଦ ପୁଲିସ ନିକଟରେ ମଧ୍ୟ ପହଞ୍ଚିଛି ଏବଂ ପୁଲିସ ଏହାର ତଦନ୍ତ ଆରମ୍ଭ କରିଛି। ଏହି ମାମଲା ନୋଏଡା ସେକ୍ଟର ୧୦୮ର ପାର୍କ୍ସ ଲରେଟ ସୋସାଇଟିରେ ଘଟିଛି | ଅବସରପ୍ରାପ୍ତ ଆଇଏଏସ୍ ଅଧିକାରୀ ଆରପି ଗୁପ୍ତା ମହିଳାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି।

ଯେଉଁ ଭିଡିଓ ସାମ୍ନାକୁ ଆସିଛି, ଏହା ଦେଖିବାକୁ ମିଳିଛି ଯେ ଆରପି ଗୁପ୍ତା ଲିଫ୍ଟରେ ଉପର ମହଲାକୁ ଯାଉଥିଲେ। ଠିକ୍ ସେତିକିବେଳେ ଜଣେ ମହିଳା ନିଜ କୁକୁର ସହିତ ଲିଫ୍ଟକୁ ଆସିଥିଲେ | କୁକୁରକୁ ଦେଖିବା ମାତ୍ରେ ଆରପି ଗୁପ୍ତା କହିଥିଲେ ଯେ ତୁମେ କୁକୁର ସହିତ ଲିଫ୍ଟରେ ଯାଇପାରିବ ନାହିଁ। ଏହାଦ୍ୱାରା ଉଭୟଙ୍କ ମଧ୍ୟରେ ଝଗଡା ହୋଇଥିଲା। ଘଟଣାଟି ୩୦ ଅକ୍ଟୋବରରେ ଘଟିଥିବାବେଳେ ଭିଡିଓରେ ଏହା ଦେଖିବାକୁ ମିଳିଛି ଯେ ଉଭୟ ମହିଳା ଏବଂ ଆରପି ଗୁପ୍ତା ଲିଫ୍ଟ ଗେଟ୍ ନିକଟରେ ଏପରି ଛିଡା ହୋଇଥିଲେ ଯେ ଗେଟ୍ ବନ୍ଦ ହୋଇନଥିଲା। ଯୁକ୍ତିତର୍କ ମଧ୍ୟରେ ମହିଳା ଜଣକ ଆରପି ଗୁପ୍ତାଙ୍କ ଫୋନ୍ ଫିଙ୍ଗିଦେଇଥିଲେ। ଏହା ଦେଖି ଆରପି ଗୁପ୍ତା ମଧ୍ୟ ରାଗିଯାଇ ମହିଳାଙ୍କୁ ଚାପୁଡ଼ା ମାରିଥିଲେ। ଏହା ପରେ ଦୁହିଁଙ୍କ ମଧ୍ୟରେ ଝଗଡା ଆରମ୍ଭ ହୋଇଥିଲା। ବର୍ତ୍ତମାନ ପୁଲିସ ଏହି ଘଟଣାର ତଦନ୍ତ କରୁଛି ଏବଂ ସିସିଟିଭି ଫୁଟେଜ ମଧ୍ୟ ଯାଞ୍ଚ କରାଯାଉଛି।

ସମ୍ବନ୍ଧିତ ଖବର