ବୁଢ଼ୀ ମାଉସୀ ପାଇଁ ରାସ୍ତାକଡ଼ରେ ପରିବା ବିକ୍ରି କଲେ ଆଇଏଏସ ଅଧିକାରୀ
ଲଖନଉ: ରାସ୍ତାକଡ଼ରେ ନିକିତି ଧରି ପରିବା ବିକ୍ରି କଲେ ଆଇଏଏସ ଅଧିକାରୀ | ଉତ୍ତରପ୍ରଦେଶ ପ୍ରୟାଗରାଜରୁ ଏମିତି ଏକ ଦୃଶ୍ୟ ସାମ୍ନାକୁ ଆସିଛି ଯେଉଁଥିରେ ଜଣେ ଆଇଏଏସ ଅଧିକାରୀ ଜଣେ ବୁଢ଼ୀ ମାଉସୀଙ୍କ ପାଇଁ ପରିବା ବିକ୍ରି କରିଛନ୍ତି | ଫଟୋଟି ସୋସିଆଲ ମିଡିଆରେ ଭାଇରାଲ ହେବା ପରେ ଏବେ ଏହାକୁ ନେଇ ଚର୍ଚ୍ଚା ଜୋର ଧରିଛି | ଏହି ଆଇଏଏସ ଅଧିକାରୀଙ୍କ ନାମ ହେଉଛି ଅଖିଳେଶ ମିଶ୍ର | ମିଳିଥିବା ସୂଚନା ମୁତାବକ ଆଇଏଏସ ଅଧିକାରୀ ଜଣକ ସରକାରୀ କାର୍ଯ୍ୟ ସାରି ପ୍ରୟାଗରାଜରୁ ଫେରୁଥିଲେ | ଆଉ ବାଟରେ ଜଣେ ବୁଢ଼ୀ ମାଉସୀ ପରିବା ବିକ୍ରି କରୁଥିବାର ଦେଖି କିଛି କ୍ଷଣ ପାଇଁ ଅଟକିଯାଇଥିଲେ |
Sambad is now on WhatsApp
Join and get latest news updates delivered to you via WhatsApp
ଏହି ସମୟରେ ବୁଢ଼ୀ ମାଉସୀ ଜଣକ ଅଖିଳେଶଙ୍କୁ ଅନୁରୋଧ କରିଥିଲେ ଯେ ତାଙ୍କ ନାତି ଟିକେ ଦୂରକୁ ଚାଲିଯାଇଛି, ସେ ନାତିକୁ ଆଣିକି ଆସିବା ପର୍ଯ୍ୟନ୍ତ ଦୋକାନ ଉପରେ ଟିକେ ନଜର ରଖନ୍ତୁ | ଆଉ ମାଉସୀଙ୍କ ଅନୁରୋଧ ରକ୍ଷା କରି ଅଖିଳେଶ ପରିବା କେତେ ମୂଲ୍ୟରେ ବିକ୍ରି କରୁଛନ୍ତି ବୋଲି ବୁଢ଼ୀ ମାଉସୀଙ୍କ ପାଖରୁ ବୁଝିଥିଲେ |
ବୁଢ଼ୀ ମାଉସୀ ନାତିକୁ ଖୋଜିବାକୁ ଯାଇଥିଲେ ଓ ଅଖିଳେଶ ପରିବା ଦୋକାନରେ ବସି ପରିବା ବିକ୍ରି କରିଥିଲେ | ଏହି ସମୟରେ ଅନେକ ଗ୍ରାହକ ଆସି ପରିବା କିଣିଥିଲେ ଓ ମାଉସୀ ଫେରିବା ପରେ ସେ ହିସାବ ଦେଇଥିଲେ | ତେବେ ଏହି ସମୟରେ ଆଇଏଏସ ଅଧିକାରୀଙ୍କ ଜଣେ ବନ୍ଧୁ ଏକ ଫଟୋ ଉଠାଇ ସୋସିଆଲ ମିଡିଆରେ ଭାଇରାଲ କରିଦେଇଥିଲେ | ଆଉ ଏବେ ସୋସିଆଲ ମିଡ଼ିଆ ୟୁଜର୍ସ ଆଇଏସଏସ ଅଧିକାରୀଙ୍କ ଏହି ବଦାନ୍ୟତା ପାଇଁ ପ୍ରଶଂସା କରୁଛନ୍ତି |