ଲକଡାଉନ ସମୟରେ ଗ୍ରାହକଙ୍କ ସଂଯୋଗ କାଟିପାରିବେ ନାହିଁ ଡିଟିଏଚ ଓ କେବୁଲ ଅପରେଟର : ସୂଚନା ଓ ପ୍ରସାରଣ ମନ୍ତ୍ରାଳୟ
ନୂଆଦିଲ୍ଲୀ : ଦେଶରେ ଏବେ ଲକଡାଉନ ଚାଲିଥିବାବେଳେ ଟେଲିଭିଜନର ଗୁରୁତ୍ୱ ବଢିଯାଇଛି । ଟେଲିଭିଜନ ହିଁ ଲୋକମାନଙ୍କୁ ଘରେ ବାନ୍ଧି ରଖୁଛି । ଏଥିପାଇଁ ସରକାରୀ ଚ୍ୟାନେଲ ଦୂରଦର୍ଶନ ପକ୍ଷରୁ ରାମାୟଣ, ମହାଭାରତ, ଚାଣକ୍ୟ ଆଦି ବିଭିନ୍ନ ଲୋକପ୍ରିୟ ସିରିଏଲ ପ୍ରସାରଣ କରାଯାଉଛି । ତେବେ ଲୋକମାନେ ଯେପରି ଘରେ ଥିବାବେଳେ ନିର୍ବିଘ୍ନରେ ଟିଭି ଦେଖିପାରିବେ ସେଥିପାଇଁ ସରକାର ଆଉ କେତେକ ପଦକ୍ଷେପ ନେଇଛନ୍ତି ।
ଲକଡାଉନ ସମୟରେ ଲୋକମାନଙ୍କୁ ସେବା ଯୋଗାଣ ଚାଲୁ ରଖିବାକୁ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରାଳୟ ବିଭିନ୍ନ ଡିଟିଏଚ ସେବା ପ୍ରଦାନକାରୀ କମ୍ପାନି, କେବୁଲ ଟିଭି ଅପରେଟର, ମଲଟିପ୍ଲ ସିଷ୍ଟମ ଅପରେଟରମାନଙ୍କୁ ନିର୍ଦ୍ଦେଶ ଦେଇଛି । ଲକଡାଉନ ସମୟରେ ଦେୟ ପୈଠ ଅଭାବରୁ ଗ୍ରାହକଙ୍କ ସଂଯୋଗ ନ କାଟିବାକୁ ଏହି ନିର୍ଦ୍ଦେଶରେ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
କିଛିଦିନ ପୂର୍ବରୁ ମନ୍ତ୍ରାଳୟ ପକ୍ଷରୁ ରାଜ୍ୟମାନଙ୍କୁ ମଧ୍ୟ ଏହିପରି ଏକ ଗାଇଡଲାଇନ ଜାରି କରି କେବୁଲ ଅପରେଟରମାନେ ଯେପରି ନିର୍ବିଘ୍ନରେ ସେବା ଯୋଗାଇପାରିବେ ତାହାର ବ୍ୟବସ୍ଥା କରିବାକୁ କହିିଥିଲେ । ଲକଡାଉନ ସମୟରେ କେବୁଲ ଅପରେଟରମାନଙ୍କ କର୍ମଚାରୀମାନଙ୍କୁ ଯେପରି କୌଣସି ପରାଚାଳନାଗତ ସମସ୍ୟା ନହୁଏ ତାହା ନିଶ୍ଚିତ କରିବାକୁ ଏଥିରେ କୁହାଯାଇଥିଲା । ସୂଚନାଯୋଗ୍ୟ ଯେ ଚଳିତ ଲକଡାଉନ ସମୟରେ ଟିଭି ପ୍ରସାରଣ ଓ କେବୁଲ ଟିଭି ସେବାକୁ ଅତ୍ୟାବଶ୍ୟକ ସେବାର ଅନ୍ତର୍ଭୁକ୍ତ କରାଯାଇଛି ।