ଆଇସି ୮୧୪ ବିବାଦ: ତାଗିଦ୍‌ ପରେ ଆତଙ୍କବାଦୀଙ୍କ ପ୍ରକୃତନାମ ଲେଖିଲା ନେଟ୍‌ଫ୍ଲିକ୍ସ

ନୂଆଦିଲ୍ଲୀ: ଦର୍ଶକଙ୍କ ପ୍ରତିବାଦ, କେନ୍ଦ୍ର ସରକାରଙ୍କ ତାଗିଦ୍‌ ପରେ ୧୯୯୯ରେ ଯାତ୍ରୀବାହୀ ବିମାନ ଆଇସି ୮୧୪ର ଅପହରଣ ଘଟଣାକୁ ନେଇ ନିର୍ମିତ ନେଟ୍‌ଫ୍ଲିକ୍ସ ସିରିଜ୍‌ ‘ଆଇସି-୮୧୪: ଦି କାନ୍ଦାହାର ହାଇଜାକ୍‌’ରେ ଥିବା ଆତଙ୍କବାଦୀ ଚରିତ୍ରର ନାମକୁ ପରିବର୍ତ୍ତନ କରାଯାଇଛି। 

ଉକ୍ତ ଚଳଚ୍ଚିତ୍ର ସିରିଜ୍‌ରେ ଦୁଇଜଣ ଇସଲାମୀୟ ଆତଙ୍କବାଦୀଙ୍କ ନାମ ପରିବର୍ତ୍ତନ କରାଯାଇ ହିନ୍ଦୁଙ୍କ ସାଂକେତିକ ନାମ ଦିଆଯାଇଥିଲା। ଏହାକୁ ନେଇ ବିଭିନ୍ନ ହିନ୍ଦୁ ସଂଗଠନ ଓ ବ୍ୟକ୍ତିବିଶେଷଙ୍କ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଏହି ଘଟଣାରେ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟ ନେଟ୍‌ଫ୍ଲିକ୍ସକୁ ନୋଟିସ୍‌ ଜାରି କରଥିଲା। ସୂଚନା ଓ ପ୍ରସାରଣ ମନ୍ତ୍ରଣାଳୟର ଅଧିକାରୀଙ୍କୁ ଆଜି ଭେଟି ନେଟ୍‌ଫ୍ଲିକ୍ସର ଉପାଧ୍ୟକ୍ଷ (ବିଷୟବସ୍ତୁ) ମୋନିକା ଶେରଗିଲ୍‌ ସ୍ପଷ୍ଟୀକରଣ ଦେଇଛନ୍ତି। ଏହାପରେ ସାମାଜିକ ଗଣମାଧ୍ୟମ ଏକ୍ସରେ ପ୍ରକାଶିତ ପ୍ରେସ୍‌ବାର୍ତ୍ତାରେ କହିଛନ୍ତି, ୧୯୯୯ ଭାରତୀୟ ବିମାନ ୮୧୪  ଅପହରଣ ଘଟଣା ସହ ପରିଚିତ ନଥିବା ଦର୍ଶକଙ୍କ ସୁବିଧା ନିମନ୍ତେ ୱେବ୍‌ସିରିଜ୍‌ର ପ୍ରାରମ୍ଭିକ ଅସ୍ବୀକରଣ (ଓପନିଂ ଡିସ୍‌କ୍ଲେମର)କୁ ସଂଶୋଧନ କରାଯାଇଛି। ଅପହରଣକାରୀଙ୍କ ଉଭୟ ପ୍ରକୃତ ଓ ସାଂକେତିକ ନାମକୁ ଏଥିରେ ଦର୍ଶାଯାଇଛି। ଏହି ସାଂକେତିକ ନାମକୁ ଅପହରଣକାରୀମାନେ ଅପହରଣ ସମୟରେ ବ୍ୟବହାର କରିଥିଲେ। ଏହି ଅସ୍ବୀକରଣ ବ୍ୟତୀତ ସିରିଜ୍‌ର ଅନ୍ୟ କୌଣସି ଅଂଶକୁ କଟାଯାଇନାହିଁ କିମ୍ବା ସଂଶୋଧନ କରାଯାଇନାହିଁ।

ସରକାରୀ ରେକର୍ଡ ଅନୁସାରେ, ବିମାନ ଅପହରଣରେ ଜଡ଼ିତ ଆତଙ୍କବାଦୀମାନେ ହେଲେ ପାକିସ୍ତାନର ଆତଙ୍କବାଦୀ ସଂଗଠନ ହରକତ ଉଲ୍‌ ମୁଜାହିଦ୍ଦିନ୍‌ର ଇବ୍ରାହିମ୍‌ ଅଥର, ସାହିଦ୍‌ ଅଖ୍‌ତର ସୟିଦ୍‌, ସନି ଅହମ୍ମଦ କାଜି, ଜୟୁର ମିସ୍ତ୍ରି ଓ ସାକିର। ସେମାନେ ଅପହରଣ ସମୟରେ ସୁରକ୍ଷା ଓ ଯାଞ୍ଚ ବ୍ୟବସ୍ଥାକୁ ଏଡ଼ାଇବା ପାଇଁ  ଚିଫ୍‌, ଡାକ୍ତର, ଶଙ୍କର, ଭୋଲା ଓ ବର୍ଗର ଆଦି ସାଂକେତିକ ନାମ (କୋଡ୍‌ ନେମ୍‌) ବ୍ୟବହାର କରିଥିଲେ। ତେବେ ଅନୁଭବ ସିହ୍ନାଙ୍କ ନିର୍ଦ୍ଦେଶିତ ଆଇସି ୮୧୪ ୱେବ୍‌ ସିରିଜ୍‌ରେ ଆତଙ୍କବାଦୀ ଚରିତ୍ରରେ ବାସ୍ତବ ନାମ ବଦଳରେ କେବଳ ସାଂକେତିକ ନାମକୁ ଦର୍ଶାଯାଇଥିଲା।