କାବୁଲ: ଏବେ ଆତଙ୍କବାଦୀଙ୍କ ହାତରେ ଆଫଗାନିସ୍ତାନ । ଆଫଗାନିସ୍ତାନର କାମଚଳା ସରକାରରେ ଅଛନ୍ତି ରକ୍ତମୁଖା ଆତଙ୍କବାଦୀ । ଏମାନଙ୍କ ମଧ୍ୟରୁ ଜଣେ ପ୍ରତିରକ୍ଷା ମନ୍ତ୍ରୀ ପରି ଗୁରୁତ୍ୱପୂର୍ଣ୍ଣ ପଦରେ । ତାଲିବାନର ପ୍ରତିଷ୍ଠାତା ମୁଲ୍ଲା ଓମାରର ପୁଅ ମୁଲ୍ଲା ୟାକୁବକୁ ଦିଆଯାଇଛି ରକ୍ଷା ମନ୍ତ୍ରୀ ପଦ । ମୁଲ୍ଲା ୟାକୁବ ସେହି ମୁଲ୍ଲା ଉମରର ପୁଅ ଯିଏ ୧୯୯୯ ରେ କାନ୍ଦାହାର ବିମାନ ଅପହରଣର ମାଷ୍ଟରମାଇଣ୍ଡ ଥିଲା।
Sambad is now on WhatsApp
Join and get latest news updates delivered to you via WhatsApp
୧୯୯୯ ଡିସେମ୍ବର ୨୪ ତାରିଖରେ ପାକିସ୍ତାନୀ ଆତଙ୍କବାଦୀ ଇଣ୍ଡିଆନ୍ ଏୟାରଲାଇନ୍ସର ଓଉ-୮୧୪ ବିମାନକୁ ଅପହରଣ କରିନେଇଥିଲେ । ନେପାଳ ରାଜଧାନୀ କାଠମାଣ୍ଡୁର ତ୍ରିଭୂବନ ଇଂଟରନ୍ୟାସନାଲ ଏୟାରପୋର୍ଟରୁ ଉଡ଼ାଣ ଆରମ୍ଭ କରି ଦିଲ୍ଲୀ ଆସୁଥିବା ଏହି ବିମାନକୁ ଅପହରଣ କରି କାନ୍ଦାହାରକୁ ନିଆଯାଇଥିଲା । ସେତେବେଳେ ଆଫଗାନିସ୍ତାନରେ ତାଲିବାନର ରାଜୁତି ଥିଲା । ଜୈଶ-ଏ ମହମ୍ମଦର ମୁଖ୍ୟ ମାସୁଦ ଅଜହର, ଅଲ ଉମର ମୁଜାହିଦ୍ଦିନର ନେତା ମୁସ୍ତାକ ଅହମଦ ଜରଗର ଓ ଅଲକାଏଦା ନେତା ଅହମଦ୍ ଉମର ସଇଦ୍ ସେ ସମୟରେ ଭାରତର ଜେଲରେ ବନ୍ଦୀ ଥିଲେ । ସେମାନଙ୍କୁ ମୁକ୍ତ କରିବାକୁ ଆତଙ୍କବାଦୀମାନେ ଏହି ବିମାନକୁ ଅପହରଣ କରିନେଇ ଯାତ୍ରୀଙ୍କ ମୁଣ୍ଡ ଜାମିନ୍ ରଖିଥିଲେ । ଏହି ବିମାନରେ ୧୭୬ ଜଣ ଯାତ୍ରୀ ଥିଲେ । ୧୭୬ ଜଣ ଯାତ୍ରୀଙ୍କୁ ଅପହରଣକାରୀମାନେ ୭ ଦିନ ଯାଏଁ ବନ୍ଧକ ରଖିଥିଲେ । ଏଥିରେ ଜଣେ ଯୁବକଙ୍କୁ ହତ୍ୟା କରିବା ସହ ଅନେକଙ୍କୁ ଆହତ କରିଥିଲେ ଆତଙ୍କବାଦୀ ।
ଗଣମାଧ୍ୟମରେ ପ୍ରକାଶ ପାଇଥିବା ଖବର ମୁତାବକ, ଏହି ହାଇଜ୍ୟାକ୍ ଅପରେସନକୁ ପାକିସ୍ତାନର ଗୁଇନ୍ଦା ଏଜେନ୍ସି ଆଇଏସଆଇର ସାହାଯ୍ୟରେ ସଫଳ କରାଯାଇଥିଲା । ଇଣ୍ଡିଆନ୍ ଏୟାରଲାଇନ୍ସର ଏହି ବିମାନ କାନ୍ଦାହାରରେ ପହଞ୍ଚିବା ପରେ ତାଲିବାନ ଆତଙ୍କବାଦୀମାନେ ଏହାକୁ ଚାରିପଟୁ ଘେରାଉ କରିଥିଲେ । ପ୍ରଥମେ ଅପହରଣକାରୀଙ୍କ ସହ କଥାବାର୍ତ୍ତା କରିବାକୁ ଭାରତୀୟ ସେନା ଚେଷ୍ଟା କରିଥିଲେ ବି ତାଲିବାନ ଓ ମୁଲ୍ଲା ଉମର ଏହାକୁ ଅନୁମତି ଦେଇନଥିଲେ । ଏବେ ଏହି ମୁଲ୍ଲା ଉମରର ପୁଅ ମୁଲ୍ଲା ମହମ୍ମଦ ୟାକୁବ ଆଫଗାନିସ୍ତାନରେ ନବଗଠିତ କାମଚଳା ସରକାରରେ ହୋଇଛି ରକ୍ଷା ମନ୍ତ୍ରୀ । ଯେଉଁଠି ଏପରି ଆତଙ୍କବାଦୀଙ୍କୁ ଦେଶର ରକ୍ଷା ଦାୟିତ୍ୱ ଦିଆଯାଇଛି, ସେଠିକାର ନାଗରିକଙ୍କୁ କିଭଳି ସୁରକ୍ଷାକୁ ମିଳିବ, ସେ ପ୍ରଶ୍ନ ଏବେ ସମସ୍ତଙ୍କ ମନରେ।