ସଡ଼କ ଦୁର୍ଘଟଣା ରୋକିବାକୁ ସରକାରଙ୍କ ଅଭିନବ ଉପାୟ, ଲଗାଉଛନ୍ତି ଲକ୍ଷ ଲକ୍ଷ ଟଙ୍କାର ଜରିମାନା !

ନୂଆଦିଲ୍ଲୀ: ଭାରତ ହେଉ କିମ୍ବା ଅନ୍ୟ କୌଣସି ଦେଶ, ବଢ଼ୁଥିବା ସଡ଼କ ଦୁର୍ଘଟଣାକୁ ରୋକିବା ପାଇଁ ଦେଶର ସରକାର ସମସ୍ତ ପ୍ରୟାସ କରିଥାନ୍ତି। ଏଥପାଇଁ ମଦପିଇ ଗାଡ଼ି ଚଳାଇବା ନେଇ ଜରିମାନା ଲାଗୁ କରିବାର ବ୍ୟବସ୍ଥା କରିଛନ୍ତି ସରକାର। ଏହି ନିୟମ ସତ୍ତ୍ବେ ମଧ୍ୟ ଲୋକେ ଟ୍ରାଫିକ ନିୟମ ଭାଙ୍ଗୁଛନ୍ତି। ବିଶେଷ କରି ଭାରତରେ ଅଧିକ ଲୋକ ଟ୍ରାଫିକ ନିୟମ ଭାଙ୍ଗୁଥିବା ଦେଖାଯାଇଛି। କିନ୍ତୁ ଏପରି ଏକ ଦେଶ ଅଛି ଯେଉଁଠାରେ ମଦ ପିଇ ଗାଡ଼ି ଚଳାଇବା ପୂର୍ବରୁ ଲୋକେ ୧୦ଥର ଚିନ୍ତା କରନ୍ତି।

ଆମେ ଏଠାରେ ବ୍ରିଟେନ ବିଷୟରେ କହୁଛୁ, ଯେଉଁଠି ସଡ଼କ ଦୁର୍ଘଟଣାକୁ ରୋକିବା ପାଇଁ ଟ୍ରାଫିକ ନିୟମକୁ କଡାକଡି କରାଯାଇଛି। ମିଡିଆ ରିପୋର୍ଟ ଅନୁଯାୟୀ, ଯଦି ଆପଣ ମଦ୍ୟପାନ କରି ବ୍ରିଟେନରେ ଗାଡି ଚଳାନ୍ତି, ତେବେ ଆପଣଙ୍କୁ ଜେଲ ଯିବାକୁ ପଡ଼ିପାରେ। କେବଳ ଏତିକି ନୁହେଁ, ଭାରୀ ଜରିମାନା ବ୍ୟତୀତ, ଆପଣଙ୍କର ଡ୍ରାଇଭିଂ ଲାଇସେନ୍ସ ଉପରେ ମଧ୍ୟ ପ୍ରତିବନ୍ଧକ ଲାଗିପାରେ। ବ୍ରିଟେନରେ ଟ୍ରାଫିକ୍ ନିୟମ ଭାଙ୍ଗିବା ଏକ ଗୁରୁତର ଅପରାଧ ବୋଲି ବିବେଚନା କରାଯାଏ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ବ୍ରିଟେନରେ ଆପଣ ମଦ୍ୟପାନ କରି ଗାଡ଼ି ଚଳାଇବା ପ‌ରେ ଯଦି ଆପଣଙ୍କ ଡ୍ରାଇଭିଂ ଲାଇସେନ୍ସ ଉପରେ ଏକ ବର୍ଷ କିମ୍ବା ଅଧିକ ସମୟ ପାଇଁ ପ୍ରତିବନ୍ଧକ ଲାଗେ, ତେବେ ଆପଣଙ୍କୁ ଡ୍ରିଙ୍କ ଆଣ୍ଡ ଡ୍ରାଇଭ ରିହାବିଲେସନ ପାଠ୍ୟକ୍ରମ ଶେଷ କରି ଡ୍ରାଇଭିଂ ଲାଇସେନ୍ସ ଉପରେ ଲାଗିଥିବ ପ୍ରତିବନ୍ଧକକୁ ହ୍ରାସ କରିବାକୁ ଚେଷ୍ଟା କରିବାକୁ ହେବ।

ବ୍ରିଟେନ ସରକାରୀ ୱେବସାଇଟ୍ ଅନୁଯାୟୀ ଦେଶରେ ଗାଡି ଚଳାଇବା ସମୟରେ ମଦ୍ୟପାନ ପାଇଁ ଏକ ଆଇନଗତ ସୀମା ଧାର୍ଯ୍ୟ କରାଯାଇଛି। ଯଦି ଆପଣ ସୀମାଠାରୁ ଅଧିକ ମଦ୍ୟପାନ କରି ଗାଡି ଚଳାଉଥିବାର ଧରାପଡ଼ନ୍ତି, ତେବେ ଆପଣଙ୍କୁ ୩ମାସର ଜେଲଦଣ୍ଡ ମିଳିବ କିମ୍ବା ୨.୪୧ଲକ୍ଷ ଟଙ୍କା ଜରିମାନା ଦେବାକୁ ହେବ।