‘ଯଦି ମୁଁ ଜେଲ ନଯିବି; ସେମାନେ ମୋତେ ହତ୍ୟା କରିବେ…’ ଦେଶବାସୀଙ୍କୁ ଭିଡିଓ ବାର୍ତ୍ତାରେ କହିଲେ ଇମ୍ରାନ ଖାନ୍
ଲାହୋର/ନୂଆଦିଲ୍ଲୀ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କୁ ତାଙ୍କ ଲାହୋର ବାସଭବନରୁ ଗିରଫ କରିବା ପାଇଁ ପାକିସ୍ତାନ ପୁଲିସର ପ୍ରୟାସକୁ ତାଙ୍କ ସମର୍ଥକମାନେ ବିରୋଧ କରୁଥିବା ବେଳେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଏକ ଭିଡିଓ ବାର୍ତ୍ତା ଜାରି କରିଛନ୍ତି। ଏଥିରେ ସେ ଜେଲରେ ଥାଆନ୍ତୁ କିମ୍ବା ତାଙ୍କୁ ହତ୍ୟା କରାଯାଇଥାଉ, ସେଥିପ୍ରତି ଗୁରୁତ୍ୱ ନଦେଇ ଲୋକଙ୍କୁ ସେମାନଙ୍କ ଅଧିକାର ପାଇଁ ଲଢ଼ିବାକୁ ନିବେଦନ କରିଛନ୍ତି।
ଦୁର୍ନୀତି ମାମଲାରେ ଖାନ୍ଙ୍କୁ ଗିରଫ କରିବା ପାଇଁ ପୁଲିସ ଉଦ୍ୟମ କରୁଥିବା ବେଳେ ତାଙ୍କ ସମର୍ଥକମାନେ ରାଜରାସ୍ତାକୁ ଓହ୍ଲାଇଛନ୍ତି। ପୁଲିସ କର୍ମଚାରୀଙ୍କ ଉପରକୁ ଟେକା ପଥର ଫିଙ୍ଗିଛନ୍ତି ଯାହାର ଜବାବ ପୁଲିସ ପାଣିମାଡ଼ କରି ଦେଇଛି।
Sambad is now on WhatsApp
Join and get latest news updates delivered to you via WhatsApp
ଦେଶବାସୀଙ୍କୁ ସମ୍ବୋଧନ କରି ଭିଡ଼ିଓ ବାର୍ତ୍ତାରେ ଇମ୍ରାନ୍ କହିଛନ୍ତି, ‘ମୋତେ ଗିରଫ କରିବା ପାଇଁ ପୁଲିସ ଆସି ପହଞ୍ଚିଛି। ସେମାନେ ଭାବୁଛନ୍ତି ଯେ ଯଦି ଇମ୍ରାନ ଖାନ୍ ଜେଲ ଯିବେ ତେବେ ଲୋକମାନେ ଶୋଇଯିବେ। ତୁମକୁ ସେମାନଙ୍କୁ ଭୁଲ ପ୍ରମାଣିତ କରିବାକୁ ହେବ, ତୁମକୁ ପ୍ରମାଣ କରିବାକୁ ପଡିବ ଯେ କୌମ (ଜନତା) ଜୀବିତ ଅଛି। ’
My message to the nation to stand resolute and fight for Haqeeqi Azadi & rule of law. pic.twitter.com/bgVuOjsmHG
— Imran Khan (@ImranKhanPTI) March 14, 2023
‘ନିଜ ଅଧିକାର ପାଇଁ ଲଢ଼ିବାକୁ ପଡ଼ିବ, ରାଜରାସ୍ତାକୁ ଓହ୍ଲାଇବାକୁ ପଡ଼ିବ। ଭଗବାନ ଇମ୍ରାନ ଖାନ୍କୁ ସବୁ କିଛି ଦେଇଛନ୍ତି। ମୁଁ ତୁମର ଲଢ଼େଇ ଲଢୁଛି। ମୁଁ ସାରା ଜୀବନ ଲଢ଼େଇ କରିଛି ଏବଂ ଆଗକୁ ମଧ୍ୟ କରିବି। କିନ୍ତୁ ଯଦି ମୋର କିଛି ହୁଏ; ସେମାନେ ମୋତେ ଜେଲରେ ରଖିଲେ କିମ୍ବା ହତ୍ୟା କଲେ, ତୁମମାନଙ୍କୁ ପ୍ରମାଣ କରିବାକୁ ପଡିବ ଯେ ଇମ୍ରାନ ଖାନ୍ଙ୍କ ବିନା ମଧ୍ୟ ତୁମେମାନେ ଲଢିପାରିବ। ତୁମକୁ ପ୍ରମାଣ କରିବାକୁ ପଡିବ ଯେ କେବେ ବି ଏହି ଦାସତ୍ୱ ଏବଂ ଜଣେ ବ୍ୟକ୍ତିର ଏହି ନିୟମକୁ ତୁମେମାନେ ଗ୍ରହଣ କରିବ ନାହିଁ। ପାକିସ୍ତାନ ଜିନ୍ଦାବାଦ!’
ଉଲ୍ଲେଖଯୋଗ୍ୟ, ୭୦ ବର୍ଷୀୟ ଏହି ରାଜନେତା, ଯିଏକି ଜଣେ କ୍ରିକେଟ୍ କିମ୍ବଦନ୍ତୀ ମଧ୍ୟ ଅଟନ୍ତି, ତୋଶାଖାନା ଦୁର୍ନୀତି ମାମଲାରେ ଅଭିଯୁକ୍ତ ଅଛନ୍ତି। ଗତବର୍ଷ ଅକ୍ଟୋବରରେ ପାକିସ୍ତାନ ନିର୍ବାଚନ କମିଶନ ତାଙ୍କୁ ପ୍ରଧାନମନ୍ତ୍ରୀ ଥିବା ସମୟରେ ବେଆଇନ ଭାବେ ବିଦେଶୀ ପ୍ରତିନିଧିଙ୍କ ଉପହାର ବିକ୍ରି କରିବା ଅଭିଯୋଗରେ ଦୋଷୀ ସାବ୍ୟସ୍ତ କରିଥିଲେ। ଏହାପରେ ତାଙ୍କ ବିରୋଧରେ ଦୁର୍ନୀତି ନିରୋଧୀ ଅଦାଲତରେ ଅଭିଯୋଗ ଦାଏର କରାଯାଇଥିଲା, ଯେଉଁଥିରେ ଗତ ସପ୍ତାହରେ ଖାନ୍ ସମନ ପାଇ ହାଜର ନ ହେବାରୁ ତାଙ୍କ ବିରୋଧରେ ଗିରଫ ପରୱାନା ଜାରି କରା ଯାଇଥିଲା।
ପାକିସ୍ତାନ ତେହରିକ-ଏ-ଇନସାଫର ନେତୃତ୍ୱ ନେଉଥିବା ଇମ୍ରାନ ନ୍ୟାସନାଲ ଆସେମ୍ବ୍ଲିର ଆସ୍ଥା ଭୋଟରେ ପରାଜିତ ହେବା ପରେ ତାଙ୍କୁ ପ୍ରଧାନମନ୍ତ୍ରୀ ପଦରୁ ବହିଷ୍କାର କରାଯାଇଥିଲା। ସେ ମଧ୍ୟବର୍ତ୍ତୀକାଳୀନ ନିର୍ବାଚନ ପାଇଁ ଦାବି କରି ଆସୁଛନ୍ତି; କିନ୍ତୁ ଏହି ଦାବିକୁ ତାଙ୍କ ଉତ୍ତରାଧିକାରୀ ଶେହବାଜ ସରିଫ୍ ପ୍ରତ୍ୟାଖ୍ୟାନ କରିଛନ୍ତି।