ସମାନ ନାଗରିକ ସଂହିତା ଲାଗୁ କର, ଦିଲ୍ଲୀ ହାଇକୋର୍ଟ କହିଲେ
ୟୁନିଫର୍ମ ସିଭିଲ୍ କୋଡ୍ ନଥିବାରୁ ଭେଦଭାବ ବଢ଼ୁଛି, ଯୁବପିଢ଼ିଙ୍କ ପାଇଁ ସମସ୍ୟା ଉପୁଜୁଛି
ନୂଆଦିଲ୍ଲୀ : ଦେଶ ପାଇଁ ସମାନ ନାଗରିକ ସଂହିତା (ୟୁନିଫର୍ମ ସିଭିଲ୍ କୋଡ୍)ର ଆବଶ୍ୟକତା ରହିଛି ଏବଂ ଏହା ଲାଗୁ କରିବା ପାଇଁ ଏବେ ପ୍ରକୃଷ୍ଟ ସମୟ ବୋଲି ଦିଲ୍ଲୀ ହାଇକୋର୍ଟ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏକ ଛାଡ଼ପତ୍ର ମାମଲାର ରାୟ ଶୁଣାଇବା ବେଳେ ଶୁକ୍ରବାର ହାଇକୋର୍ଟ କହିଛନ୍ତି ଯେ ଦେଶପାଇଁ ଏବେ ସମାନ ନାଗରିକ ସଂହିତା ଜରୁରୀ ହୋଇପଡ଼ିଛି। ଦେଶ ଧର୍ମ, ଜାତି, ସଂପ୍ରଦାୟରୁ ଉପରକୁ ଉଠି ଆଗକୁ ବଢ଼ୁଥିବାରୁ ପାରମ୍ପରିକ ଜଟିଳତାଗୁଡ଼ିକୁ ହଟାଇବାକୁ ହେବ ଏବଂ ଏଥିପାଇଁ ସମାନ ନାଗରିକ ସଂହିତା ଲାଗୁ କରିବା ହିଁ ଶ୍ରେଷ୍ଠ ପନ୍ଥା ବୋଲି ହାଇକୋର୍ଟ କହିଛନ୍ତି। ସମ୍ବିଧାନର ଧାରା ୪୪ ଅଧୀନରେ ସମାନ ନାଗରିକତା ସଂହିତା ଲାଗୁ ଦିଗରେ ପଦକ୍ଷେପ ନେବାକୁ ହେବ ବୋଲି କୋର୍ଟ ଗୁରୁତ୍ବାରୋପ କରିଚନ୍ତି। ଜଷ୍ଟିସ୍ ପ୍ରତିଭା ଏମ୍ ସିଂହ ତାଙ୍କ ରାୟରେ କହିଛନ୍ତି ଯେ ଆଜିର ଆଧୁନିକ ଭାରତରେ ସମାନ ନାଗରିକ ସଂହିତା ନଥିବାରୁ ଯୁବ ପିଢ଼ି ସମସ୍ୟାର ସମ୍ମୁଖୀନ ହେଉଛନ୍ତି ଏବଂ ଧର୍ମ, ଜାତି, ସଂପ୍ରଦାୟକୁ ନେଇ ଭେଦଭାବ ଜାରି ରହିଛି। ହାଇକୋର୍ଟ ୧୯୮୫ର ଏକ ମାମଲାରେ କୋର୍ଟ ପକ୍ଷରୁ ଜାରି ନିର୍ଦ୍ଦେଶର ଅବତାରଣା କରି କହିଛନ୍ତି ଯେ ଦୀର୍ଘ ୩ ଦଶନ୍ଧି ପରେ ମଧ୍ୟ ଏହାକୁ ଗମ୍ଭୀରତାର ସହ ନିଆଯାଇନାହିଁ। ୧୯୮୫ରେ ସୁପ୍ରିମ୍ କୋର୍ଟ ଦେଶରେ ସମାନ ନାଗରିକ ସଂହିତା ଲାଗୁ ଦିଗରେ ବଳିଷ୍ଠ ପଦକ୍ଷେପ ନେବାକୁ କହିଥିଲେ କିନ୍ତୁ ଆଜି ସୁଦ୍ଧା ତାହା ପାଳନ ହୋଇନାହିଁ। ନିକଟରେ ସୁପ୍ରିମ୍ କୋର୍ଟର ପୂର୍ବତନ ପ୍ରଧାନ ବିଚାରପତି ଏସ୍ ଏ ବୋବଡ଼େ ଗୋଆର ୟୁନିର୍ଫମ ସିଭିଲ୍ କୋଡ୍କୁ ଭୂୟସୀ ପ୍ରଶଂସା କରିଥିଲେ ଏବଂ ଏଭଳି ସିଭିଲ୍ କୋଡ୍ର କଳ୍ପନା ସମ୍ବିଧାନ ନିର୍ମାତାମାନେ କରିଥିଲେ ବୋଲି ସେ ମତ ରଖିଥିଲେ।
ସମ୍ବିଧାନର ରାଜ୍ୟ ନୀତି ନିର୍ଦ୍ଦେଶକ ସିଦ୍ଧାନ୍ତ (ଡାଇରେକ୍ଟିଭ୍ ପ୍ରନ୍ସିପୁଲ୍ସ ଅଫ୍ ଷ୍ଟେଟ୍ ପଲିସି)ର ଧାରା ୩୬ରୁ ୫୧ ମାଧ୍ୟମରେ ରାଜ୍ୟର ବିଭିନ୍ନ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ପରାମର୍ଶ ଦିଆଯାଇଛି ଏବଂ ରାଜ୍ୟ ନିଜର ନୀତି ନିର୍ଦ୍ଧାରଣ କରିବା ସମୟରେ ଏ ବାବଦ ସିଦ୍ଧାନ୍ତକୁ ଧ୍ୟାନରେ ରଖିବା ପାଇଁ କୁହାଯାଇଛି। ଧାରା ୪୪ରେ ରାଜ୍ୟ ଉଚିତ ସମମୟରେ ସବୁ ଧର୍ମ ପାଇଁ ସମାନ ନାଗରିକ ସଂହିତା ଲାଗୁ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଭେଦଭାବ ଦୂର କରିବା ଧାରା ୪୪ର ମୁଖ୍ୟ ଉଦ୍ଦେଶ୍ୟ ଥିବାରୁ ଏହାକୁ ବାସ୍ତବରେ ପରିଣତ କରିବାକୁ ହେବ ବୋଲି ଦିଲ୍ଲୀ ହାଇକୋର୍ଟ କହିଛନ୍ତି।
ଏକ ଛାଡ଼ପତ୍ର ମାମଲାର ଶୁଣାଣି ବେଳେ ଖଣ୍ଡପୀଠ ପାଇଁ କେତେକ ଜଟିଳତା ଆସିଥିଲା। ଛାଡ଼ପତ୍ର ହିନ୍ଦୁ ବିବାହ ଆଇନ ମୁତାବକ ଗ୍ରହଣ କରାଯିବ କମ୍ବା ମୀନା ଜନଜାତିର ନିୟମ ମୁତାବକ ଗ୍ରହଣ କରାଯିବ ସେ ନେଇ ଦ୍ବନ୍ଦ୍ବ ଉପୁଜିଥିଲା। ପତି ହିନ୍ଦୁ ବିବାହ ଆଇନ ଆଧାରରେ ଛାଡ଼ପତ୍ର ଚାହୁଥିବାବେଳେ ପତ୍ନୀ ମୀନା ଜନଜାତିର ନିୟମ ଆଧାରରେ ମାମଲାର ଫଏସଲା ଚାହୁଥିଲେ। ପତ୍ନୀଙ୍କ ଦଲିଲ ବିରୋଧରେ ପତି ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଆଜି ହାଇକୋର୍ଟ କହିଛନ୍ତି ଏହି ମାମଲାର ରାୟକୁ ଆଇନ ମନ୍ତ୍ରାଳୟକୁ ପଠାଯିବ ଏବଂ ଏ ବାବଦରେ ଆଇନ ମନ୍ତ୍ରାଳୟ ବିଚାର କରି ବିହୀତ ପଦକ୍ଷେପ ଗ୍ରହଣ କରିବ।