ମାର୍ଚ ୧୮ ତାରିଖରେ ଅଦାଲତରେ ହାଜର ହେବେ ଇମ୍ରାନ୍ ଖାଁ
ଇସ୍ଲାମାବାଦ୍: ତୋଷଖାନା ମାମଲାରେ ଗିରଫ ହେବାର ସମ୍ଭାବନା ଥିବା ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାଁ ମାର୍ଚ ୧୮ ତାରିଖରେ ଲାହୋର୍ ହାଇକୋର୍ଟରେ ହାଜର ହେବେ ବୋଲି ଆଜି କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଉପରୋକ୍ତ ତାରିଖରେ ସେ ଅଦାଲତରେ ହାଜର ହେବେ ବୋଲି ଆଜି ‘ଲାହୋର୍ ହାଇକୋର୍ଟ ବାର୍’ର ଅଧ୍ୟକ୍ଷଙ୍କୁ ଲେଖିଥିବା ଚିଠିରେ ଇମ୍ରାନ୍ ଖାଁ ପ୍ରତିଶ୍ରୁତି ଦେଇଛନ୍ତି।
ମଙ୍ଗବାର ଦିନ ମଧ୍ୟ ଇମ୍ରାନ୍ ଖାଁ କହିଥିଲେ ଯେ, ଗିରଫ ହେବା ପାଇଁ ସେ ମାନସିକ ଭାବେ ପ୍ରସ୍ତୁତ ଅଛନ୍ତି।
ବାହାରେ ‘ପାକିସ୍ତାନ ତେହ୍ରିକ୍-ଏ-ଇନ୍ସାଫ୍’ର ସମର୍ଥକ ଓ ପୁଲିସଙ୍କ ମଧ୍ୟରେ ବିବାଦ ଲାଗିଥିବା ବେଳେ ସେ ଗଣମାଧ୍ୟମ ‘ଅଲ୍ ଜଜୀରା’କୁ କହିଥିଲେ, ବାହାରେ ବହୁସଂଖ୍ୟକ ପୁଲିସ ଫୋର୍ସ ଥିବା କାରଣରୁ ସେ ଗିରଫ ହେବା ପାଇଁ ମାନସିକ ପ୍ରସ୍ତୁତି କରିସାରିଛନ୍ତି। ସେମାନେ କେବଳ ପୁଲିସ ଆଣି ନାହାନ୍ତି, ସେନାରେ ଥିବା ରେଞ୍ଜର୍ମାନଙ୍କୁ ବି ଆଣିଛନ୍ତି। ମନେ ହେଉଛି ସତେଅବା ପାକିସ୍ତାନର ସବୁଠୁ କୁଖ୍ୟାତ ଆତଙ୍କବାଦୀ ଏଠାରେ ଆତ୍ମଗୋପନ କରିଛି।
ମୋର ମନେହୁଏ, ଗିରଫ କରିବାକୁ ସେମାନେ ବଦ୍ଧପରିକର। ଆଇନ ଅନୁସାରେ ମୋଠାରୁ କିଛି ଉଦ୍ଧାର କରିବା ପାଇଁ ସେମାନେ ଚିନ୍ତିତ ନୁହନ୍ତି। ସମାନେ ଚିନ୍ତିତ ହେବାର କାରଣ ହେଉଛି ଏବେ ସବୁଠୁ ବଡ଼ ଅପରାଧୀ କ୍ଷମତାସୀନ ହୋଇଛନ୍ତି। କ୍ୟାବିନେଟ୍ରେ ଥିବା ୬୦% ସଦସ୍ୟ ଅପରାଧୀ ଓ ସେମାନେ ଜାମିନରେ ଆସିଛନ୍ତି ବୋଲି ଇମ୍ରାନ୍ ଖାଁ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି, ସେମାନେ ମୋ ଦଳର ଲୋକପ୍ରିୟତା ଦେଖି ଭୀତତ୍ରସ୍ତ ହୋଇପଡ଼ିଥିବାରୁ ମୋତେ ନିର୍ବାଚନ ପ୍ରତିଦ୍ବନ୍ଦ୍ବିତାରୁ ହଟାଇବାକୁ ଚାହୁଁଛନ୍ତି। ସମସ୍ତ ଓପିନିୟନ୍ ପୋଲ୍ ଏକମତ ଯେ, ଆଗାମୀ ନିର୍ବାଚନରେ ଆମେ ବିପୁଳ ସଂଖ୍ୟରେ ବିଜୟ ହାସଲ କରିବୁ।