ଇସଲାମାବାଦ : କ୍ଷମତାରୁ ବିତାଡ଼ିତ ହେବା ପରେ ବି ନିଜର ଲୋକପ୍ରିୟତା ହରାଇନାହାନ୍ତି ଇମ୍ରାନ ଖାଁ । ପାକିସ୍ତାନୀ ଲୋକମାନେ ଏବେ ବି ଯେ ତାଙ୍କ ଉପରେ ଭରସା କରନ୍ତି ତାହା ସେ ନିକଟରେ ଅନୁଷ୍ଠିତ ଏକ ଉପନିର୍ବାଚନରେ ପ୍ରମାଣିତ କରିଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ପାକିସ୍ତାନର ସବୁଠାରୁ ଜନବହୁଳ ରାଜ୍ୟ ତଥା ରାଜନୈତିକ ଦୃଷ୍ଟିକୋଣରୁ ସବୁଠାରୁ ମହତ୍ତ୍ବପୂର୍ଣ୍ଣ ରାଜ୍ୟ ପଞ୍ଜାବର ୨୦ଟି ବିଧାନସଭା ଆସନ ପାଇଁ ଉପ-ନିର୍ବାଚନ ଅନୁଷ୍ଠିତ ହୋଇଥିବାବେଳେ ସେଥିରୁ ୧୫ଟିରେ ଇମ୍ରାନଙ୍କ ଦଳ ପାକିସ୍ତାନ ତେହେରିକ-ଏ ଇନସାଫ୍ (ପିଟିଆଇ) ବିଜୟ ହାସଲ କରିଛି । ଏହା ସହ ପଂଜାବ ବିଧାନସଭାରେ ସବୁଠାରୁ ବଡ଼ ଦଳ ଭାବେ ଉଭା ହୋଇଛି ପିଟିଆଇ । ଗୁରୁତ୍ବପୂର୍ଣ୍ଣ କଥା ହେଉଛି ପଞ୍ଜାବ ପାକିସ୍ତାନରେ ଶାସନ କରୁଥିବା ପାକିସ୍ତାନ ମୁସଲିମ ଲିଗ-(ଏନ)ର ଦୁର୍ଗଭାବେ ଜଣାଶୁଣା ।
ଏହି ବିଜୟ ହାସଲ ପରେ ଇମ୍ରାନ ଖାଁ ସମଗ୍ର ଦେଶରେ ତୁରନ୍ତ ସାଧାରଣ ନିର୍ବାଚନ କରିବାକୁ ଦାବି କରିଛନ୍ତି ।
ପଞ୍ଜାବ ନିର୍ବାଚନର ଫଳାଫଳ ସମଗ୍ର ପାକିସ୍ତାନର ରାଜନୀତିକୁ ପ୍ରଭାବିତ କରିବାର ସମ୍ଭାବନା ରହିଛି । ଗତ ଏପ୍ରିଲ ମାସରେ ଅନାସ୍ଥା ପ୍ରସ୍ତାବରେ ହାରି ଇମ୍ରାନ ଖାଁ ସରକାରଙ୍କ ପତନ ହୋଇଥିଲା । ସେହିଦିନଠାରୁ ପାକିସ୍ତାନରେ ରାଜନୈତିକ ଅସ୍ଥିରତା ଲାଗି ରହିଛି । ତୁରନ୍ତ ସାଧାରଣ ନିର୍ବାଚନ କରିବାକୁ ଇମ୍ରାନ ଦାବି କରୁଛନ୍ତି । ପାକିସ୍ତାନ ସମ୍ବିଧାନ ଅନୁସାରେ ଆସନ୍ତା ବର୍ଷ ଅକ୍ଟୋବର ପୂର୍ବରୁ ନିର୍ବାଚନ କରାଯିବାକୁ ବାଧ୍ୟ ।