ଇଣ୍ଡୋନେସିଆରେ ଅମାନିଆଙ୍କୁ ଅଜବ ଦଣ୍ଡ : ମାସ୍କ ନ ପିନ୍ଧିଲେ ମୃତ ଲୋକମାନଙ୍କ ପାଇଁ କବର ଖୋଳିବାକୁ ପଡ଼ିବ
ଜାକାର୍ତ୍ତା : କରୋନା ମହାମାରୀ ସାରା ବିଶ୍ୱକୁ କବଳିତ କରି ରଖିଥିବାବେଳେ ତାହାକୁ ନିୟନ୍ତ୍ରଣକରିବାକୁ ବିଭିନ୍ନ ଦେଶର ସରକାରମାନେ ନାଦେକମ ହୋଇସାରିଲେଣି । କରୋନା ଦାଉରୁ ରକ୍ଷା ପାଇବାକୁ ମାସ୍କ ପିନ୍ଧିବା ଏକ ଜରୁରୀ ଉପାୟ ହୋଇଥିବାରୁ ଲୋକମାନଙ୍କୁ ମାସ୍କ ପିନ୍ଧିବାକୁ ପରାମର୍ଶ ଦିଆଯାଉଛି । ଅଧିକାଂଶ ଲୋକ ମାସ୍କ ପିନ୍ଧୁଥିଲେ ମଧ୍ୟ କିଛି ଲୋକ ତାହାକୁ ଅମାନ୍ୟ କରୁଛନ୍ତି । ଏହା ଫଳରେ ସେମାନେ କେବଳ ନିଜ ପାଇଁ ନୁହେଁ ଅନ୍ୟମାନଙ୍କ ପାଇଁ ମଧ୍ୟ ବିପଦ ଟାଣିଆଣୁଛନ୍ତି । ଏପରି ଅମାନିଆ ଲୋକମାନଙ୍କୁ ସାବାଡ଼ କରିବାକୁ ସରକାରମାନେ ବିଭିନ୍ନ ପ୍ରକାରର ଦଣ୍ଡବିଧାନର ବ୍ୟବସ୍ଥା କରୁଛନ୍ତି । ଭାରତର ବିଭିନ୍ନ ରାଜ୍ୟ ମାସ୍କ ପିନ୍ଧିନଥିବା ଲୋକମାନଙ୍କ ପାଇଁ ଜୋରିମାନା ଓ ଜେଲଦଣ୍ଡର ବ୍ୟବସ୍ଥା ରହିଛି । କିନ୍ତୁ ଏସୀୟ ଦେଶ ଇଣ୍ଡୋନେସିଆରେ ଏପରି ଅମାନିଆ ଲୋକମାନଙ୍କୁ ସାବାଡ କରିବାକୁ ଏକ ଅଭିନବ ଉପାୟ ଗ୍ରହଣ କରାଯାଇଛି । ଯେଉଁ ଲୋକମାନେ ମାସ୍କ ପିନ୍ଧିନଥିବାବେଳେ ଧରାପଡ଼ିବେ ସେମାନଙ୍କୁ କରୋନାରେ ମୃତ୍ୟୁବରଣ କରିଥିବା ଲୋକମାନଙ୍କ ପାଇଁ କବର ଗାତ ଖୋଳିବାକୁ ପଡ଼ିବ।
Sambad is now on WhatsApp
Join and get latest news updates delivered to you via WhatsApp
ଇଣ୍ଡୋନେସିଆର ପୂର୍ବ ଜାଭା ରାଜ୍ୟରେ ସ୍ଥାନୀୟ ସରକାର ଏହି ପଦକ୍ଷେପ ଗ୍ରହଣ କରିଛନ୍ତି । ପୂର୍ବ ଜାଭାର ଗ୍ରେସିକ ଅଞ୍ଚଳର ୮ ଜଣ ଲୋକଙ୍କୁ ମୃତ ଲୋକମାନଙ୍କୁ କବର ଦେବା ନିମନ୍ତେ ଗାତ ଖୋଳିବାକୁ ନର୍ଦ୍ଦେଶ ଦିଆଯାଇଛି ।
ଇଣ୍ଡୋନେସିଆ ଦକ୍ଷିଣ-ପୂର୍ବ ଏସିଆର ସବୁଠାରୁ ଜନବହୁଳ ଦେଶ ହୋଇଥିବାବେଳେ ଏଠାରେ ମୋଟ ଆକ୍ରାନ୍ତ ସଂଖ୍ୟା ୨ ଲକ୍ଷ ୧୮ ହଜାର ଟପିଯାଇଛି ।