କେରଳରେ ପ୍ରବାସୀମାନଙ୍କୁ ହନି ଟ୍ରାପ୍ ରୢାକେଟ୍ଗୁଡ଼ିକର ଟାର୍ଗେଟ୍
ମାଲାପୁରମ୍: ଗତବର୍ଷ ଜୁନ୍ ମାସରେ ଜଣେ ପ୍ରବାସୀଙ୍କୁ ହନି ଟ୍ରାପ୍ରେ ପକାଇବା ଓ ତାଙ୍କଠାରୁ ୧.୫ ଲକ୍ଷ ଟଙ୍କା ଠକିନେବା ଅଭିଯୋଗରେ ପୁଲିସ ଗୁରୁବାର ପେରିନ୍ଥାଲମାନାରୁ ଦୁଇଜଣଙ୍କୁ ଗିରଫ କରିଛି। ମାଲାପୁରମ୍ର ପାରମ୍ବଟିଲ ନିବାସୀ ମହମ୍ମଦ କୁଟ୍ଟିଙ୍କ ପୁଅ ୩୨ ବର୍ଷୀୟ ୟାକୁବ ଏବଂ କୋଝିକୋଡ୍ସ୍ଥିତ କେଝାକେକୋଟାପରାମ୍ବୁ ନିବାସୀ କାସିମଙ୍କ ପୁଅ ୩୨ ବର୍ଷୀୟ ଜିଶାଦଙ୍କୁ କରିପୁର ପୁଲିସ ଉକ୍ତ ପ୍ରବାସୀଙ୍କ ଅଭିଯୋଗ ଆଧାରରେ ଗିରଫ କରିଛି। ଏହି ଅପରାଧ ପଛରେ ଏକ ରୢାକେଟ୍ କାମ କରୁଥିବା ସନ୍ଦେହ କରାଯାଉଛି।
ଅଭିଯୋଗ ଅନୁଯାୟୀ, ୟୁରୋପରେ କାର୍ଯ୍ୟ କରୁଥିବା ପ୍ରବାସୀ ଜଣଙ୍କୁ ଉକ୍ତ ରୢାକେଟ୍ର ଜଣେ ସଦସ୍ୟ ନିଜକୁ ମହିଳା ବୋଲି ପରିଚୟ ଦେଇ ସୋସିଆଲ ମିଡ଼ିଆରେ ଯୋଗାଯୋଗ କରିଥିଲେ। ସେମାନେ କ୍ରମଶଃ ଘନିଷ୍ଠ ହେବା ସହ କରିପୁରର ଏକ ହୋଟେଲରେ ଦେଖା ହେବାକୁ କଥା ହେଲା। ସେଠାରେ ରୢାକେଟ୍ର ସଦସ୍ୟମାନେ ଜଣେ ମହିଳାଙ୍କ ସହିତ ଉକ୍ତ ପ୍ରବାସୀଙ୍କର ଫଟୋ ଉଠାଇନେଲେ। ତା’ପରେ ଟଙ୍କା ନ ଦେଲେ ଉକ୍ତ ଫଟୋକୁ ସାମାଜିକ ଗଣମାଧ୍ୟମରେ ଭାଇରାଲ କରିଦେବାକୁ ଧମକ ଦେଲେ। ଏହି ରୢାକେଟ୍ର ସଦସ୍ୟମାନେ ନିଜକୁ ମହିଳା ବୋଲି ପରିଚୟ ଦେଇ ପ୍ରବାସୀମାନଙ୍କୁ ଟାର୍ଗେଟ୍ କରିଥାନ୍ତି। ସେମାନଙ୍କ ସୋସିଆଲ ମିଡ଼ିଆ ଆକାଉଣ୍ଟରେ ସେମାନେ ସୁନ୍ଦରୀ ଝିଅମାନଙ୍କ ଫଟୋ ରଖିଥାନ୍ତି, ଯାହାକୁ ଦେଖି ଜଣେ ସହଜରେ ଆକର୍ଷିତ ହୋଇପାରିବ।
ପରେ ସେମାନେ କଥା ହୋଇ ପରସ୍ପର ସହ ଭେଟାଭେଟି ହେବା ପାଇଁ ଏକ ହୋଟେଲ ବା ଲଜ୍କୁ ଯାଇଥାନ୍ତି। ସେଠାରେ ଗ୍ୟାଙ୍ଗ୍ର ସଦସ୍ୟ ଥିବା ଗୋଟିଏ ଝିଅକୁ ହନି ଟ୍ରାପ୍ର ଶିକାର ହୋଇଥିବା ପ୍ରବାସୀ ଜଣକ ଭେଟିଥାଏ। ସେଠାରେ କୌଶଳରେ ସେମାନଙ୍କ ଅସଂଯତ ଅବସ୍ଥାର ଫଟୋ ବା ଭିଡିଓ ଉଠାଇ ଟଙ୍କା ନ ଦେଲେ ସେହି ଫଟୋ ବା ଭିଡିଓକୁ ଭାଇରାଲ କରିଦିଆଯିବ ବୋଲି ଧମକ ଦିଆଯାଇଥାଏ। ସମ୍ମାନହାନି ଭୟରେ ଠକାମିର ଶିକାର ହୋଇଥିବା ଅଧିକାଂଶ ଯୁବକ ଥାନା ବା ସାଇବର ସେଲ୍ରେ ଅଭିଯୋଗ କରି ନ ଥାନ୍ତି। ଏହି ଗ୍ୟାଙ୍ଗ୍ର ସଦସ୍ୟମାନେ କର୍ଣ୍ଣାଟକ, ଗୋଆ, ତାମିଲନାଡ଼ୁ ଓ ଆନ୍ଧପ୍ରଦେଶ ପରି ଅନ୍ୟ ରାଜ୍ୟର ଝିଅମାନଙ୍କୁ ନିଯୁକ୍ତି ଦେଇ ଏହି କାମରେ ନିୟୋଜିତ କରୁଥିବା ଜଣାପଡ଼ିଛି।
