ରାତି ଅଧରେ ଗୋଆ ରାଜନୈତିକ ଡ୍ରାମା: ଦଳରୁ ଅଲଗା ହୋଇ ବିଜେପିରେ ମିଶିଲେ ଏମ୍ପିଜିର ୨ବିଧାୟକ
ପାଣାଜୀ: ଗତ ବିଳମ୍ବିତ ରାତ୍ରୀରେ ମହାରାଷ୍ଟ୍ରବାଦୀ ଗୋମନ୍ତକ ପାର୍ଟିର (ଏମ୍ପିଜି) ତିନି ଜଣ ବିଧାୟକଙ୍କ ମଧ୍ୟରୁ ଦୁଇଜଣ ଭାରତୀୟ ଜନତା ପାର୍ଟିରେ ଯୋଗ ଦେଇଛନ୍ତି। ଫଳରେ ୩୬ ସଦସ୍ୟବିଶିଷ୍ଟ ଗୃହରେ ବିଜେପିର ବିଧାୟକଙ୍କ ସଂଖ୍ୟା ୧୨ ରୁ ୧୪କୁ ବୃଦ୍ଧି ପାଇଛି। ଏବେ ବିଜେପିର ସଦସ୍ୟ ସଂଖ୍ୟା ଗୃହରେ ବିରୋଧୀ କଂଗ୍ରେସ ପାର୍ଟିର ସଦସ୍ୟଙ୍କ ସମକକ୍ଷ ହୋଇପାରିଛି।
Sambad is now on WhatsApp
Join and get latest news updates delivered to you via WhatsApp
ଦସ୍ତଖତ ହୋଇଥିବା ଗୋଟିଏ ଚିଠିରେ ଦୁଇ ବିଧାୟକ ମନୋହର ଆଜ୍ଗାଓଁକର୍ ଏବଂ ଦୀପକ ପଉସ୍କର୍ କହିଛନ୍ତି ଯେ ସେମାନେ ଏମ୍ପିଜିର ଲେଜିସ୍ଲେଚର୍ ପାଟିକୁ ବିଜେପି ସହ ସାମିଲ କରିଛନ୍ତି। କିନ୍ତୁ ଗୋଆରେ ବିଜେପି ନେତୃତ୍ୱାଧୀନ ସରକାରରେ ଉପମୁଖ୍ୟମନ୍ତ୍ରୀ ଥିବା ତୃତୀୟ ବିଧାୟକ ସୁଦିନ ଧାଓ୍ଵଲିକର ସେ ଚିଠିରେ ଦସ୍ତଖତ କରି ନାହାନ୍ତି। ରାତି ୧: ୪୫ରେ ଗୋଆ ବିଧାନସଭାର ବାଚସ୍ପତି ମାଇକେଲ୍ ଲୋବୋଙ୍କ ନିକଟକୁ ଏହି ପତ୍ର ପଠାଯାଇଥିଲା।
ବିଜେପିରେ ମିଶିବା ପରେ ପରେ ଆଜ୍ଗାଓଁକର୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱକୁ ପ୍ରଶଂସା କରିଥିଲେ। ସେ କହିଛନ୍ତି: ପରବର୍ତ୍ତୀ ସରକାର ବିଜେପି ଗଢ଼ିବ, କାରଣ ସେ ଯେଉଁଆଡ଼େ ଯାଉଛନ୍ତି ଲୋକେ କହୁଛନ୍ତି: ମୋଦି, ମୋଦି। ମୋଦିଙ୍କ କାରଣରୁ ହିଁ ଗୋଆରେ ବିଜେପି ଉନ୍ନତି କରିଛି।
ଅନ୍ୟ ବିଧାୟକ ପଉସ୍କର୍ କହିଛନ୍ତି ଯେ କ୍ୟାବିନେଟ୍ରେ ମନ୍ତ୍ରାଳୟ ପାଇବାକୁ ସେ ମଧ୍ୟ ଆଶାବାଦୀ। ସେ କହିଛନ୍ତି: ଆମେ ଖୁସୀରେ ବିଜେପିରେ ଯୋଗ ଦେଇଛୁ। ଗୋଆ ରାଜ୍ୟପାଳଙ୍କ ଉପସ୍ଥିତିରେ ଆଜି ମଧ୍ୟାହ୍ନରେ ଶପଥ ଗ୍ରହଣ ଉତ୍ସବ ହେବ। ଗୋଆ ମୁଖ୍ୟମନ୍ତ୍ରୀ ଆମକୁ ଯେଉଁ ମନ୍ତ୍ରାଳୟ ଦେବେ ଆମେ ତାହା ଗ୍ରହଣ କରିବୁ।