ନାଗାଲାଣ୍ଡରେ ସେନା-ଜନତା ସମ୍ପର୍କ ପ୍ରଭାବିତ : ଭୁଲ୍‌ ଗୁଳିଚାଳନା ପାଇଁ ସେନା ବିରୋଧୀ ଆଭିମୁଖ୍ୟ ବଢ଼ୁଛି

ନୂଆଦିଲ୍ଲୀ: ନାଗାଲାଣ୍ଡରେ ଭାରତୀୟ ସେନାର ଭୁଲ୍‌ ଗୁଳିଚାଳନା ସ୍ଥାନୀୟ ଲୋକଙ୍କ ସହ ସୁରକ୍ଷା ବାହିନୀର ସମ୍ପର୍କକୁ ପ୍ରଭାବିତ କରିପାରେ। ସେନାର ଭୁଲ ଗୁଳିଚାଳନାରେ ୧୪ ଜଣ ସାଧାରଣ ନାଗରିକ ଏବଂ ଜଣେ ଯବାନ ସମେତ ୧୫ ଜଣଙ୍କ ମୃତ୍ୟୁ ଘଟିଥିବାବେଳେ ପୁଲିସ ତଥା ମାନବିକ ଅଧିକାର ସଂସ୍ଥା କହିଛନ୍ତି ଏହି ଘଟଣା ପରେ ରାଜ୍ୟର ସ୍ଥିତି ଶାନ୍ତିପୂର୍ଣ୍ଣ ରହିଛି। ସୁରକ୍ଷା ବାହିନୀ ପାଇଁ ଏକମାତ୍ର ଚିନ୍ତା ହେଉଛି ଉଗ୍ରବାଦୀ ସଂଗଠନ ଦ୍ୱାରା ଚୋରାଚାଲାଣ ଏବଂ ବେଆଇନ ଟୋଲ୍ ସଂଗ୍ରହ। ନାଗାଲାଣ୍ଡର ମୋନ ଜିଲ୍ଲାରେ ହୋଇଥିବା ଗୁଳି ବିନିମୟ ସ୍ଥାନଟି ଆସାମ, ଅରୁଣାଚଳ ପ୍ରଦେଶ ଏବଂ ମିଆଁମାରକୁ ସଂଯୋଗ କରେ। ସ୍ଥାନୀୟ ପୁଲିସ ପ୍ରାୟ ଦୁଇ ଡଜନ ହତ୍ୟା, ଦୁଷ୍କର୍ମ ଓ ଚୋରି ମାମଲା ରୁଜୁ କରିଛି।

ନାଗାଲାଣ୍ଡ ପୁଲିସର ସୂଚନାନୁସାରେ, ରାଜ୍ୟରେ ପ୍ରତିବର୍ଷ ପ୍ରାୟ ୧,୨୦୦ ମାମଲା ସମସ୍ତ ଥାନାରେ ଏବଂ ୬୦୦ ମାମଲା ସ୍ବତନ୍ତ୍ର କିମ୍ବା ସ୍ଥାନୀୟ ନିୟମ ଅନୁଯାୟୀ ପଞ୍ଜୀକରଣ ହୋଇଥାଏ। ଏହି ଅଞ୍ଚଳ ଏବଂ ରାଜ୍ୟ ଶାନ୍ତିପୂର୍ଣ୍ଣ ରହିଛି। ସୁରକ୍ଷା ବାହିନୀ ଏବଂ ସ୍ଥାନୀୟ ଲୋକଙ୍କ ମଧ୍ୟରେ କୌଣସି ମୁହାଁମୁହିଁ ପରିସ୍ଥିତି ସୃଷ୍ଟି ହୋଇନାହିଁ। ଯଦିଓ ଏହି ଅଞ୍ଚଳ ଚୋରାଚାଲାଣ ପାଇଁ ଜଣାଶୁଣା, ଅତୀତରେ ସେପରି କୌଣସି ଘଟଣା ଘଟି ନଥିଲା ବୋଲି ଏହି ଜୋନ୍‌ରେ କାର୍ଯ୍ୟ କରୁଥିବା ପୂର୍ବତନ ଆଇଜି (ସିଆର୍‌ପିଏଫ୍‌) ଏମ୍‌ ପି ନାଥାନେଲ କହିଛନ୍ତି।

ସେ ଆହୁରି ମଧ୍ୟ କହିଛନ୍ତି, ଜମ୍ମୁ କାଶ୍ମୀର କିମ୍ବା ରେଡ୍‌ ଜୋନ୍ ଭଳି ସୈନ୍ୟବାହିନୀ ପାଇଁ କୌଣସି କଠିନ କାର୍ଯ୍ୟ ନାହିଁ। କିନ୍ତୁ କାଶ୍ମୀର ଭଳି ଅପରେସନ୍ କରୁଥିବା ସେନା ନିଶ୍ଚିତ ଭାବରେ ସ୍ଥାନୀୟ ତଥା ପ୍ରଶାସନର ସମ୍ପର୍କକୁ ଖଣ୍ଡନ କରିବ। ଗତ ପାଞ୍ଚ ବର୍ଷ ମଧ୍ୟରେ ନାଗାଲାଣ୍ଡରେ ସାଧାରଣ ନାଗରିକଙ୍କ ସହ ଜଡ଼ିତ ବାହିନୀ ଦ୍ୱାରା ଏନ୍‌କାଉଣ୍ଟର କିମ୍ବା ବର୍ବରତା ବା ହତ୍ୟା ଘଟଣାର ଶୂନ୍ୟ ମାମଲା ଦର୍ଶାଯାଇଛି।

ସେହିଭଳି, ଏନ୍‌ସିଆର୍‌ବି ତଥ୍ୟ ଦର୍ଶାଉଛି, ନାଗାଲାଣ୍ଡ ଏକ ଶାନ୍ତିପୂର୍ଣ୍ଣ ସ୍ଥାନ ହୋଇ ରହିଛି ଏବଂ ନିକଟ ଅତୀତରେ ସୁରକ୍ଷା ବାହିନୀ କିମ୍ବା ପୁଲିସ୍ ଦ୍ବାରା ସାଧାରଣ ନାଗରିକ ହତ୍ୟାକାଣ୍ଡର ସମ୍ମୁଖୀନ ହୋଇ ନାହାନ୍ତି। ବାସ୍ତବରେ, ଗତ ପାଞ୍ଚ ବର୍ଷ ମଧ୍ୟରେ ନାଗାଲାଣ୍ଡରେ ପୁଲିସର ଏନ୍‌କାଉଣ୍ଟର କିମ୍ବା ଅପରେସନ୍ ସମୟରେ କେହି ଆହତ ହୋଇନାହାଁନ୍ତି ବୋଲି ତଥ୍ୟରେ ଦର୍ଶାଯାଇଛି। ଏହି ଅଞ୍ଚଳର ସୁରକ୍ଷା ବାହିନୀ ପାଇଁ ଏକମାତ୍ର ଚିନ୍ତା ହେଉଛି ଚୋରି ଏବଂ ବେଆଇନ ଟୋଲ୍‌ ସଂଗ୍ରହ। ପଡୋଶୀ ରାଜ୍ୟ ତଥା ମିଆଁମାରକୁ ସଂଯୋଗ କରୁଥିବା ହେତୁ ଏହି ସ୍ଥାନଟି ଅତ୍ୟନ୍ତ କୌଶଳପୂର୍ଣ୍ଣ ଏବଂ ଆତଙ୍କବାଦୀଙ୍କ ଆଶ୍ରୟସ୍ଥଳ ଅଟେ। କିନ୍ତୁ ନାଗାଲାଣ୍ଡ ଏକମାତ୍ର ରାଜ୍ୟ ଯେଉଁଠି ମଞ୍ଜୁରୀପ୍ରାପ୍ତ ପଦବିଠାରୁ ଅଧିକ ପୁଲିସ୍ ଅଛନ୍ତି। ସେତେବେଳେ ମଧ୍ୟ ସେନାବାହିନୀ ସ୍ଥାନୀୟ ଲୋକଙ୍କ ସହ କୌଣସି ମୁହାଁମୁହିଁ ପରିସ୍ଥିତି ସୃଷ୍ଟି କରିନାହାଁନ୍ତି ବୋଲି ଆସାମ ରାଇଫଲ୍ସର ଜନୈକ ବରିଷ୍ଠ ଅଧିକାରୀ କହିଛନ୍ତି।

ଏନ୍‌ସିଆର୍‌ବି ଅନୁଯାୟୀ ଭାରତର ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ରାଜ୍ୟ ମଧ୍ୟରେ ନାଗାଲାଣ୍ଡରେ ଦ୍ୱିତୀୟ ସର୍ବନିମ୍ନ ଅପରାଧ ହାର (ଲଦାଖ ପରେ) ରହିଛି। ଗତ ବର୍ଷ ରାଜ୍ୟରେ ଦଙ୍ଗା ଏବଂ ଡକାୟତି ମାମଲା ଶୂନ୍ୟ ହୋଇଥିଲା। ଏହି ବିଫଳ ଆକ୍ରମଣରେ ଏନ୍‌ଏଚ୍‌ଆର୍‌ସି ନିଜ ତରଫରୁ କେନ୍ଦ୍ର ସରକାର ଏବଂ ରାଜ୍ୟ ପ୍ରଶାସନକୁ ନୋଟିସ୍ ଜାରି କରିଛି।

ନିରୀହ ଜନତାଙ୍କ ମୃତ୍ୟୁର କଡ଼ା ଜବାବ ମିଳିବ: ନାଗା ଉଗ୍ରବାଦୀ ସଂଗଠନ

ଆଫସ୍ପା ପ୍ରତ୍ୟାହାର ପାଇଁ ନାଗାଲାଣ୍ଡ କ୍ୟାବିନେଟର ଅନୁରୋଧ

କୋହିମା : ନାଗାଲାଣ୍ଡ ‌ମୋନ୍‌ ଜିଲ୍ଲାରେ ସେନାର ଭୁଲ୍‌ ଗୁଳିମାଡ଼ରେ ୧୪ ସାଧାରଣ ନାଗରିକଙ୍କ ମୃତ୍ୟୁ ହେବା ଘଟଣାକୁ ନାଗାଲାଣ୍ଡର ଏକ ଉଗ୍ରବାଦୀ ସଂଗଠନ କଡ଼ା ବିରୋଧ କରିଛି। ନିରୀହ ଜନତାଙ୍କୁ ଯେଭଳି ହତ୍ୟା କରାଯାଇଛି ତା’ର କଡ଼ା ଜବାବ ମିଳିବ। ବର୍ତ୍ତମାନ ହେଉ କିମ୍ବା ପରବର୍ତ୍ତୀ ସମୟରେ ‌ହେଉ ଏହାର କଡ଼ା ଜବାବ ମିଳିବ ବୋଲି ଏନ୍‌ଏସସିଏନ୍‌ (ନ୍ୟାସନା‌ଲ-ସୋସିଆଲିଷ୍ଟ କାଉନସିଲ ଅଫ୍‌ ନାଗାଲାଣ୍ଡ୍‌) କହିଛି। ଗତ ୪ ତାରିଖରେ ହୋଇଥିବା ଗୁଳିକାଣ୍ଡ ଘଟଣାକୁ ଉକ୍ତ ଉଗ୍ରବା‌ଦୀ ସଂଗଠନ କଡ଼ା ନିନ୍ଦା କରିଛି ଏବଂ ଶୋକସନ୍ତପ୍ତ ପରିବାର ସଦସ୍ୟଙ୍କୁ ସମବେଦନା ଜଣାଇଛି।

ଉଲ୍ଲେଖଯୋଗ୍ୟ ଯେ, ଭାରତୀୟ ସେନାର ଭୁଲ୍‌ ଗୁଳିମାଡ଼ରେ ଗତ ଶନିବାର ସନ୍ଧ୍ୟାରେ ୧୪ ସାଧାରଣ ନାଗରିକଙ୍କ ମୃତ୍ୟୁ ହୋଇଥିଲା ବୋଲି ପୁଲିସ କହୁଛି। କିନ୍ତୁ ନାଗାଲାଣ୍ଡର ଏକ ଶୀର୍ଷ ଆଦିବାସୀ ଗୋଷ୍ଠୀର ଦାବି ଅନୁଯାୟୀ ସେନାର ଗୁଳିମାଡ଼ରେ ୧୭ ଜଣଙ୍କ ମୃତ୍ୟୁ ହୋଇଛି। ଉକ୍ତ ଘଟଣା ପରେ ନାଗାଲାଣ୍ଡରେ ଆଫସ୍ପା ପ୍ରତ୍ୟାହାର ପାଇଁ ନାଗାଲାଣ୍ଡ ମୁଖ୍ୟମନ୍ତ୍ରୀ ଦାବି କରିଥିଲେ। ରାଜ୍ୟରେ ଆଫ୍‌ସ୍ପା ପ୍ରତ୍ୟାହାର ପାଇଁ ନାଗାଲାଣ୍ଡ କ୍ୟାବିନେଟ ଆଜି କେନ୍ଦ୍ର ସରକାରଙ୍କୁ ଅନୁରୋଧ କରିଛି। ରାଜ୍ୟରେ ଏହି ଆଇନର ପ୍ରତ୍ୟାହାର ପାଇଁ ନାଗାଲାଣ୍ଡ ସରକାର ଖୁବ୍‌ଶୀଘ୍ର ଏକ ଚିଠି ଲେଖିବେ ବୋଲି ଜଣାପଡ଼ିଛି।