ଆକାଶସୀମା ବ୍ୟବହାର କରିବାକୁ ପାକିସ୍ତାନ ପ୍ରଧାନମନ୍ତ୍ରୀଙ୍କୁ ଅନୁମତି ଦେଲା ଭାରତ
ନୂଆଦିଲ୍ଲୀ: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଶ୍ରୀଲଙ୍କା ଗସ୍ତ ପାଇଁ ଭାରତ ଏହାର ଏୟାରସ୍ପେସ ବ୍ୟବହାର କରିବାକୁ ଅନୁମତି ଦେଇଛି। ସୂତ୍ରରୁ ମିଳିଥିବା ସୂଚନା ମୁତାବକ ଭାରତ ସରକାର ଇମ୍ରାନ ଖାନଙ୍କ ବିମାନକୁ ଭାରତୀୟ ଆକାଶ ସୀମା ଦେଇ ଯିବାକୁ ଅନୁମତି ଦେଇଛନ୍ତି। ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ ଖାନ ଆଜି (୨୩ ଫେବୃଆରୀ) ରୁ ଦୁଇ ଦିନିଆ ଶ୍ରୀଲଙ୍କା ଗସ୍ତରେ ଯିବେ। ଏହି ଗସ୍ତ ସମୟରେ ଇମ୍ରାନ ଖାନଙ୍କ ସହ କ୍ୟାବିନେଟ ପ୍ରତିନିଧି ମଣ୍ଡଳୀ ଏବଂ ବରିଷ୍ଠ ଅଧିକାରୀ ମଧ୍ୟ ଶ୍ରୀଲଙ୍କା ଗସ୍ତରେ ଯିବେ । ତାଙ୍କର ଦୁଇ ଦିନିଆ ଗସ୍ତ ସମୟରେ ସେ ଶ୍ରୀଲଙ୍କା ରାଷ୍ଟ୍ରପତି ଗୋତାବାୟା ରାଜପକ୍ଷେ ଏବଂ ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷେଙ୍କୁ ଭେଟିବେ। ଇମ୍ରାନ ଖାନଙ୍କ ଏହି ଗସ୍ତ ଏପରି ଏକ ସମୟରେ ହେବାକୁ ଯାଉଛି, ଯେତେବେଳେ ପାକିସ୍ତାନ ଅର୍ଥନୀତି ଦୁର୍ବଳ ସ୍ଥିତିରେ ଅଛି |
Sambad is now on WhatsApp
Join and get latest news updates delivered to you via WhatsApp
ଅନ୍ୟପଟେ ଶ୍ରୀଲଙ୍କା ଏହାର ସଂସଦରେ ଇମ୍ରାନ ଖାନଙ୍କ ପ୍ରସ୍ତାବିତ ଭାଷଣକୁ ବାତିଲ କରିଦେଇଛି। କୁହାଯାଉଛି ଯେ ବର୍ତ୍ତମାନ ଶ୍ରୀଲଙ୍କା ଭାରତ ସହ କୌଣସି ପ୍ରକାରର ତିକ୍ତତା ଚାହୁଁନାହିଁ। ଇମ୍ରାନଙ୍କ ଅଭିଭାଷଣ ଯୋଗୁଁ ଭାରତ ଯେଭଳି ଅସନ୍ତୁଷ୍ଟ ନ ହୁଏ, ସେଥିପାଇଁ ଶ୍ରୀଲଙ୍କା ଏହାକୁ ବାତିଲ କରିଦେଇଛି | ସୂଚନା ଥାଉ କି କୋଭିଡ -୧୯ ଟିକା ରପ୍ତାନି କରି ଭାରତ ଅନେକ ଦେଶକୁ ସାହାଯ୍ୟ କରୁଛି। ନିକଟରେ ଭାରତ ଶ୍ରୀଲଙ୍କାକୁ ପାଞ୍ଚ ଲକ୍ଷ ଡୋଜ କୋଭିଶିଲ୍ଡ ଟିକା ଉପହାର ସ୍ୱରୂପ ଦେଇଥିଲା |