ନୂଆଦିଲ୍ଲୀ : ଲଦାଖରେ ଭାରତ ଓ ଚୀନ ସେନା ମଧ୍ୟରେ ଉତ୍ତେଜନା ଆପାତତଃ ପ୍ରଶମିତ ହୋଇଥିବା ସତ୍ତ୍ୱେ ଚୀନର ମତିଗତି ବେଶ ସଂଦେହଜନକ ରହିଛି । ଏହି କାରଣରୁ ଭାରତ ପକ୍ଷରୁ ସର୍ବାଧିକ ସତର୍କତା ଅବଲମ୍ବନ କରାଯାଉଛି । ଗତ ସପ୍ତାହରେ ଭାରତୀୟ ନୌସେନା ପକ୍ଷରୁ ଆଣ୍ଡାମାନ ନିକୋବର ଉପକୂଳରେ ଏକ ସମରାଭ୍ୟାସ କରାଯାଇଥିଲା । ଚଳିତ ସପ୍ତାହ ଆରମ୍ଭ ହେଉହେଉ ଭାରତୀୟ ନୌସେନା ଓ ଆମେରିକାର ନୌସେନା ପକ୍ଷରୁ ଏକ ସମରାଭ୍ୟାସ ଆରମ୍ଭ କରାଯାଇଛି । ଦକ୍ଷିିଣ ଚୀନ ସାଗରରୁ ଫେରୁଥିବା ଆମେରିକାର ବିମାନବାହୀ ଯୁଦ୍ଧପୋତ ୟୁଏସଏସ ନିମିଜ ଓ ଆଉ ୪ଟି ଯୁଦ୍ଧ ଜାହାଜ ଏହି ସମରାଭ୍ୟାସରେ ଭାରତୀୟ ନୌସେନା ସହ ଯୋଗ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବିଶେଷଜ୍ଞଙ୍କ ମତରେ ଯେଉଁ ଅଞ୍ଚଳରେ ଏହି ସମରାଭ୍ୟାସ ହେଉଛି ତାହା ସାମରିକ ଦୃଷ୍ଟିକୋଣରୁ ବେଶ ଗୁରୁତ୍ୱପୂର୍ଣ୍ଣ ମଲାକ୍କା ପ୍ରଣାଳୀ ନିକଟରେ ଅବସ୍ଥିତ । ମାଲେସିଆ ଓ ଇଣ୍ଡୋନେସିଆର ସୁମାତ୍ରା ଦ୍ୱୀପ ମଧ୍ୟରେ ଥିବା ଅଣଓସାରିଆ ସମୁଦ୍ରପଥ ମାଲକ୍କା ଷ୍ଟ୍ରେଟ ଦେଇ ଚୀନ ନୌସେନାର ଯୁଦ୍ଧଜାହଜ ଭାରତ ମହାସାଗରରେ ପ୍ରବେଶ କରୁଛନ୍ତି । ଏହା ହିଁ ସେମାନଙ୍କର ପ୍ରବେଶ ପଥ । ସେହିପରି ପଶ୍ଚିମରେ ଓମାନ ସାଗର ଦେଇ ଚୀନର ତୈଳବାହୀ ଜାହଜ ଗୁଡ଼ିକ ଯାଇଥାନ୍ତି । ଅର୍ଥାତ ଏହି ରାସ୍ତାଟି ଚୀନକୁ ତେଲ ଯୋଗାଇବାର ଏକ ପ୍ରମୁଖ ପଥ । ଏଠାରେ ଯୁଦ୍ଧାଭ୍ୟାସ କରି ଭାରତୀୟ ନୌସେନା ଚୀନକୁ ସଂକେତ ଦେଉଛି ଯେ ଚୀନ କୌଣସି ପ୍ରକାରର ଦୁଃସାହସ କଲେ ଚୀନକୁ ତେଲ ଯୋଗାଣ ସଂପୂର୍ଣ୍ଣ ବନ୍ଦ କରିଦିଆଯିବ । ଏହି କାରଣରୁ ମଲାକ୍କାକୁ ଚୀନର ଜୀବନରେଖା ବୋଲି କୁହାଯାଏ । ଏଥିପାଇଁ ଚୀନ ଚିନ୍ତାରେ ପଡ଼ିଯାଇଛି ।