ନୂଆଦିଲ୍ଲୀ : ଦୁବାଇ ଆକାଶରେ ଏକ ବଡ଼ ଧରଣର ବିମାନ ଦୁର୍ଘଟଣା ହେଉ ହେଉ ଅଳ୍ପକେ ରହିଯାଇଛି । ଅଳ୍ପକେ ବର୍ତ୍ତିଯାଇଛନ୍ତି ଭାରତ ଅଭିମୁଖେ ଆସୁଥିବା ଏମିରେଟ୍ସ ଏୟାରର ଦୁଇଟି ବିମାନ । ଘଟଣାଟି ଘଟିଥିଲା ଗତ ସପ୍ତାହରେ । ଏ ନେଇ ୟୁଏଇର ବିମାନ କର୍ତ୍ତୃପକ୍ଷଙ୍କୁ ରିପୋର୍ଟ ମାଗିଛନ୍ତି ଭାରତର ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (ଡିଜିସିଏ) ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ଗତ ସପ୍ତାହରେ ଦୁବାଇ ଏୟାରପୋର୍ଟରୁ ଏମିରେଟ୍ସ ଏୟାରର ଗୋଟିଏ ବିମାନ ହାଇଦ୍ରାବାଦ ଅଭିମୁଖେ ଉଡ଼ାଣ ଆରମ୍ଭ କରୁଥିଲା । କିନ୍ତୁ ଏହି ସମୟରେ ଏୟାର ଟ୍ରାଫିକ କଣ୍ଟ୍ରୋଲର ଟେକ-ଅଫ୍ ବନ୍ଦ କରିବାକୁ କହିଥିଲେ । କାରଣ ଠିକ ସେହି ସମୟରେ ରନଓ୍ବେରେ ଏମିରେଟ୍ସ ଏୟାରର ଆଉ ଏକ ବିମାନ ବେଙ୍ଗାଲୁରୁ ଅଭିମୁଖେ ଉଡ଼ାଣ ଆରମ୍ଭ କରୁଥିଲା । ବେଙ୍ଗାଲୁରୁ ଫ୍ଲାଇଟକୁ ଆଗୁଆ ଉଡ଼ାଣ ଅନୁମତି ଦିଆଯାଇଥିବାବେଳେ ହାଇଦ୍ରାବାଦ ଅଭିମୁଖୀ ବିମାନକୁ କିଛି ସମୟ ଅଟକାଯାଇଥିଲା । ଠିକ ସମୟରେ ଉଡ଼ାଣ ବନ୍ଦ କରିନଥିଲେ ଏକ ବଡ଼ ଧରଣର ବିମାନ ଦୁର୍ଘଟଣା ହେବାର ଆଶଙ୍କା ଥିଲା । ଦୁଇଟି ଯାକ ବିମାନରେ ଅଧିକାଂଶ ଯାତ୍ରୀ ଭାରତୀୟ ଥିଲେ । ଏୟାର ଟ୍ରାଫିକ କଣ୍ଟ୍ରୋଲରଙ୍କ ସମୟୋଚିତ ପଦକ୍ଷେପ ଯୋଗୁଁ ଏକ ଭୟଙ୍କର ଦୁର୍ଘଟଣାକୁ ଏଡ଼ାଇଦିଆଯାଇଥିଲା । ଏହି ଘଟଣାକୁ ଏମିରେଟ୍ସ ପକ୍ଷରୁ ସ୍ବୀକାର କରାଯିବା ସହ ଏକ ଆଭ୍ୟନ୍ତରୀଣ ତଦନ୍ତ ନିର୍ଦ୍ଦେଶ ଦିଆଯାଇଛି । କେଉଁ କାରଣରୁ ଏପରି ହେଲା ଓ କେଉଁମାନେ ଏଥିପାଇଁ ଦାୟୀ ତାହା ତଦନ୍ତ ପରେ ଜଣାପଡ଼ିବ ।