ଭାରତ-ଚୀନ୍‌ ସଂପର୍କ: ୪ ବର୍ଷ ଧରି ଏଲ୍‌ଏସିରେ ବିବାଦ କାହାରି ଲାଭ କରିନି: ଜୟଶଙ୍କର

ନୂଆଦିଲ୍ଲୀ: ଭାରତ ଓ ଚୀନ୍ ମଧ୍ୟରେ ଚାଲିଥିବା ଉତ୍ତେଜନାକୁ ନେଇ ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ଉଦ୍‌ବେଗ ପ୍ରକାଶ କରି କହିଛନ୍ତି ଯେ ଏହି ପରିସ୍ଥିତି କୌଣସି ଦେଶ ପାଇଁ ଲାଭଦାୟକ ହୋଇନାହିଁ। ସୋମବାର ସନ୍ଧ୍ୟାରେ ଏକ ପ୍ୟାନେଲ ଆଲୋଚନାରେ ଜୟଶଙ୍କର ଭାରତ-ଚୀନ୍ ମଧ୍ୟରେ ତିକ୍ତ ସମ୍ପର୍କ ଉପରେ ଆଲୋଚନା କରିବା ସହ ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି)ରେ ସୈନ୍ୟସଂଖ୍ୟା ହ୍ରାସ କରିବା ଏବଂ ବର୍ତ୍ତମାନର ଚୁକ୍ତିକୁ ବଜାୟ ରଖିବାର ଆବଶ୍ୟକତା ଉପରେ ଗୁରୁତ୍ବାରୋପ କରିଥିଲେ। ସେ କହିଥିଲେ ଯେ, ଗତ ୪ ବର୍ଷ ଧରି ଆମେ ସୀମାରେ ଯେଉଁ ଉତ୍ତେଜନା ଦେଖୁଛୁ, ତାହା ଆମ ମଧ୍ୟରୁ କାହାରି ପାଇଁ ଲାଭଦାୟକ ହୋଇନାହିଁ।

ବୈଦେଶିକ ମନ୍ତ୍ରୀ ସୀମା ବିବାଦର ନିରପେକ୍ଷ ଓ ଯୁକ୍ତିଯୁକ୍ତ ସମାଧାନ ପାଇଁ ଭାରତର ପ୍ରତିବଦ୍ଧତାକୁ ଦୋହରାଇଛନ୍ତି। ଜୁନ୍ ୨୦୨୦ରେ ଗଲୱାନ ଉପତ୍ୟକାରେ ସଂଘର୍ଷ ପରେ ପୂର୍ବ ଲଦାଖର କେତେକ ବିବାଦୀୟ ସ୍ଥାନରେ ଭାରତ ଓ ଚୀନ୍ ମଧ୍ୟରେ ପାଖାପାଖି ୪ ବର୍ଷ ଧରି ଚାଲିଥିବା ବିବାଦ ମଧ୍ୟରେ ଏହି ମନ୍ତବ୍ୟ ଆସିଛି। ବିବାଦର ସମାଧାନ ପାଇଁ ଭାରତ ଓ ଚୀନ୍ ଏକାଧିକ ପର୍ଯ୍ୟାୟ କୂଟନୈତିକ ଓ ଉଚ୍ଚସ୍ତରୀୟ ସାମରିକ ଆଲୋଚନା କରିଛନ୍ତି। ସ୍ଥଳଭାଗରେ ଶାନ୍ତିଶୃଙ୍ଖଳା ବଜାୟ ରଖିବାକୁ ଉଭୟ ପକ୍ଷ ରାଜି ହୋଇଛନ୍ତି। ଚୀନ୍ ଏହି ଚୁକ୍ତିକୁ ସମ୍ମାନ ଦେବା ଉଚିତ ବୋଲି ଜୟଶଙ୍କର କହିଛନ୍ତି।