ନୂଆଦିଲ୍ଲୀ : ଦେଶର ସେନାମୁଖ୍ୟଭାବେ ମଙ୍ଗଳବାରଦିନ ଦାୟିତ୍ୱ ଗ୍ରହଣ କରିଥିବା ଜେନେରାଲ ମନୋଜ ମୁକୁନ୍ଦ ନରଭାଣେ ଆତଙ୍କବାଦକୁ ନେଇ ନିଜର ଆଭିମୁଖ୍ୟ ସ୍ପଷ୍ଟ କରିଦେଇଛନ୍ତି । ଏ ପ୍ରସଙ୍ଗରେ ସେ ସିଧାସଳଖ ପାକିସ୍ତାନକୁ ଚେତାବନୀ ଶୁଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ ପଡ଼ୋଶୀ ଦେଶ ଆତଙ୍କବାଦକୁ ପ୍ରତ୍ସାହନ ବନ୍ଦ ନକଲେ ତାହାକୁ ମୂଳରୁ ନଷ୍ଟ କରିବାର ଅଧିକାର ଭାରତ ପାଖରେ ରହିଛି । ଗଣମାଧ୍ୟମକୁ ସେ କହିଛନ୍ତି ଯେ ସୀମା ପାର ଆତଙ୍କବାଦକୁ ଉଚିତ ଶାସ୍ତି ଦେବାକୁ ଉପଯୁକ୍ତ ମିଲିଟାରୀ ଜବାବ ଦିଆଯିବ । ସେ ଆହୁରି ମଧ୍ୟ କହିଛନ୍ତି ଯେ କଶ୍ମୀରରୁ ଧାରା ୩୭୦ ଉଠିବା ପରେ ସେଠାକାର ଆଇନ ଶୃଙ୍ଖଳା ପରିସ୍ଥିତିରେ ଉଲ୍ଲେଖନୀୟ ଉନ୍ନତି ଆସିଛି । କିନ୍ତୁ ଆତଙ୍କବାଦରୁ ସମସ୍ତଙ୍କ ଧ୍ୟାନ ହଟାଇବାକୁ ପାକିସ୍ତାନର ଉଦ୍ୟମ ବିଫଳ ହୋଇଯାଇଛି ।
ପାକିସ୍ତାନୀ ଆତଙ୍କବାଦର ଜବାବ ଦେବା ପାଇଁ ଭାରତୀୟ ସେନା ପାଖରେ ଅନେକ ବିକଳ୍ପ ରହିଛି । ସ୍ଥିତି ଅନୁସାରେ ଉପଯୁକ୍ତ ବିକଳ୍ପର ବ୍ୟବହାର କରାଯିବ ବୋଲି ସେ କହିଛନ୍ତି । ଅନ୍ୟପକ୍ଷରେ ଚୀନର ମୁକାବିଲା କରିବା ପାଇଁ ଭାରତର ଉତ୍ତର ସୀମାରେ କ୍ଷମତା ବୃଦ୍ଧି ଅବ୍ୟାହତ ରହିବ ବୋଲି ସେ କହିଛନ୍ତି ।
ସୂଚନାଯୋଗ୍ୟ ଯେ ଆଜି ଜେନେରାଲ ବିପିନ ରାଓ୍ଵତ ଅବସର ଗ୍ରହଣ କରିବା ସହ ପ୍ରତିରକ୍ଷା ମୁଖ୍ୟ ଭାବେ ଆସନ୍ତା କାଲି ଦାୟିତ୍ୱ ଗ୍ରହଣ କରିବେ । ସେ ଜେନେରାଲ ନରଭାଣେଙ୍କୁ ଦାୟିତ୍ୱ ହସ୍ତାନ୍ତର କରିଥିଲେ ।