ଚୀନ ନାଗରିକଙ୍କ ଉପରେ ଭିସା କଟକଣା ଲଗାଇଲା ଭାରତ
ନୂଆଦିଲ୍ଲୀ : ବାରମ୍ବାର ଆଲୋଚନା ସତ୍ତ୍ୱେ ଚୀନ ସହ ବିବାଦର ସମାଧାନ ହେଉନଥିବାରୁ ଭାରତ ସରକାର ଚୀନକୁ ନେଇ ଅଧିକ ସତର୍କ ହୋଇଉଠିଛନ୍ତି । ପୂର୍ବରୁ ଚୀନ ମୋବାଇଲ ଆପଗୁଡ଼ିକ ଉପରେ ନିଷେଧାଜ୍ଞା ଲଗାଇବା ପରେ ଏବେ ଚୀନ ନାଗରିକଙ୍କୁ ଦିଆଯାଉଥିବା ଭିସା ଉପରେ କେତେକ କଟକଣା ଲଗାଇବାକୁ ଚିନ୍ତା କରାଯାଉଛି । ଏହା ସହିତ ଭାରତୀୟ ବିଶ୍ୱବିଦ୍ୟାଳୟଗୁଡ଼ିକ ସହ ଚୀନ ସରକାରଙ୍କ କନଫୁସିୟସ ଇନଷ୍ଟିଚ୍ୟୁଟର ସଂପର୍କର ସମୀକ୍ଷା କରାଯିବ ।
Sambad is now on WhatsApp
Join and get latest news updates delivered to you via WhatsApp
ଗଣମାଧ୍ୟମ ରିପୋର୍ଟ ଅନୁସାରେ ଏଣିକି ଚୀନ ନାଗରିକ, ବ୍ୟବସାୟୀ, ଶିଳ୍ପ ବିଶେଷଜ୍ଞ, ଶିକ୍ଷାବିତମାନଙ୍କୁ ଭିସା ଜାରି କରାଯିବା ପୂର୍ବରୁ ସୁରକ୍ଷା ସମ୍ପର୍କିତ କ୍ଲିୟରାନ୍ସ ଆବଶ୍ୟକ ପଡ଼ିବ । ପୂର୍ବରୁ ଏହି ନିୟମ ପାକିସ୍ତାନୀ ନାଗରିକମାନଙ୍କ ପାଇଁ ଲାଗୁ ହେଉଥିଲା ।
ଦେଶର ବିଶ୍ୱବିଦ୍ୟାଳୟଗୁଡ଼ିକରେ ଚୀନ ସରକାରଙ୍କ ପ୍ରଭାବକୁ ନେଇ କିଛି ଦିନ ତଳେ ସୁରକ୍ଷା ଏଜେନ୍ସିମାନେ ଚିନ୍ତା ପ୍ରକଟ କରିଥିଲେ । ଚୀନ ସରକାର ନିଜ ଦେଶର କନଫୁସିୟସ ଇନଷ୍ଟିଚ୍ୟୁଟ ମାଧ୍ୟମରେ ବିଭିନ୍ନ ବିଶ୍ୱବିଦ୍ୟାଳୟକୁ ଅନୁଦାନ ଦେଇ ଭାରତରେ ଚୀନ ସଂସ୍କୃତିର ପ୍ରସାର କରୁଛନ୍ତି । କିନ୍ତୁ ପ୍ରକୃତରେ ଏସବୁ ଅନୁଦାନ ମାଧ୍ୟମରେ ଚୀନ ବିଶ୍ୱ ବିଦ୍ୟାଳୟଗୁଡ଼ିକର ଶିକ୍ଷା ବ୍ୟବସ୍ଥାକୁ ପ୍ରଭାବିତ କରୁଛି । ଶିକ୍ଷାରେ ଚୀନ ପାଇଁ ସଂବେଦନଶୀଳ ପ୍ରସଙ୍ଗ ଯଥା ତିବ୍ଦତ, ତାଇଓ୍ଵାନ, ତିଆନାମେନ୍ ସ୍କୋୟାର ଗଣହତ୍ୟା ଆଦି ଉପରେ ସେନସରସିପ୍ ଲଗାଯାଉଛି ।