ନୂଆଦିଲ୍ଲୀ: ଇରାନର ଫୋର୍ଡୋ ପରମାଣୁ କେନ୍ଦ୍ର ଉପରେ ଆମେରିକା ଜିବିୟୁ-୫୭/ମାସିଭ୍ ଅର୍ଡନାନ୍ସ ପେନିଟ୍ରେଟର ମାଡ଼ କରିବା ପରେ ଭାରତ ଅତ୍ୟାଧୁନିକ ବଙ୍କର-ବଷ୍ଟର କ୍ଷମତା ବିକଶିତ କରିବା ପାଇଁ ନିଜର ପ୍ରୟାସକୁ ତ୍ୱରାନ୍ୱିତ କରୁଛି। ସାମ୍ପ୍ରତିକ ବିଶ୍ୱ ସଂଘର୍ଷରୁ ଶିକ୍ଷା ନେଇ ଦେଶ ଏକ ଶକ୍ତିଶାଳୀ ନୂତନ କ୍ଷେପଣାସ୍ତ୍ର ବ୍ୟବସ୍ଥା ନିର୍ମାଣ କରି ଭବିଷ୍ୟତ ଯୁଦ୍ଧ ପାଇଁ ପ୍ରସ୍ତୁତ ହେଉଛି ଯାହା ସୁରକ୍ଷିତ ଭୂତଳ ଲକ୍ଷ୍ୟଭେଦ କରିବାରେ ସକ୍ଷମ। ପ୍ରତିରକ୍ଷା ଗବେଷଣା ଓ ବିକାଶ ସଂଗଠନ (ଡିଆର୍‌ଡିଓ) ଅଗ୍ନି-୫ ଅନ୍ତର୍ମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ରର ସଂଶୋଧିତ ସଂସ୍କରଣ ବିକଶିତ କରୁଛି। ୫୦୦୦ କିଲୋମିଟରରୁ ଅଧିକ ରେଞ୍ଜ ବିଶିଷ୍ଟ ଓ ସାଧାରଣତଃ ପରମାଣୁ ଯୁଦ୍ଧାସ୍ତ୍ର ବହନ କରୁଥିବା କ୍ଷେପଣାସ୍ତ୍ର ବଦଳରେ ଏହି ନୂଆ ଭାରିଆଣ୍ଟ ଏକ ପାରମ୍ପରିକ ଅସ୍ତ୍ର ହେବ, ଯାହା ୭୫୦୦ କିଲୋଗ୍ରାମ୍‌ର ବଙ୍କର-ବଷ୍ଟର ଯୁଦ୍ଧାସ୍ତ୍ର ବହନ କରିବାରେ ସକ୍ଷମ ହେବ। ଶକ୍ତିଶାଳୀ କଂକ୍ରିଟ୍ ତଳେ ରହିଥିବା କଠୋର ଶତ୍ରୁ କେନ୍ଦ୍ର ଉପରେ ଆକ୍ରମଣ କରିବା ପାଇଁ ଡିଜାଇନ୍ କରାଯାଇଥିବା ଏହି କ୍ଷେପଣାସ୍ତ୍ର ବିସ୍ଫୋରଣ ପୂର୍ବରୁ ୮୦ରୁ ୧୦୦ ମିଟର ଭୂତଳକୁ ପ୍ରବେଶ କରିବ ବୋଲି ଅନୁମାନ କରାଯାଉଛି।

Advertisment

ସର୍ବବୃହତ୍ ପାରମ୍ପରିକ ଯୁଦ୍ଧାସ୍ତ୍ର ବହନ କରିବ 
୮୦-୧୦୦ ମିଟର ଭୂତଳ ବଙ୍କରକୁ ଧ୍ବଂସ କରିପାରିବ
୨୫୦୦ କିମି ରେଞ୍ଜ, ଶବ୍ଦଠୁ ଅଧିକ ବେଗରେ ପହଞ୍ଚିବ

ଇରାନର ଆଣବିକ ଭିତ୍ତିଭୂମି ବିରୋଧରେ ନିକଟରେ ୧୪ଟି ବିଶ୍ୱର ସର୍ବବୃହତ୍ ପାରମ୍ପରିକ ବଙ୍କର-ବଷ୍ଟର ବୋମା ଜିବିୟୁ-୫୭ ବ୍ୟବହାର କରିଥିବା ଆମେରିକାର ସାମର୍ଥ୍ୟ ସହ ମେଳ ଖାଇବାକୁ ଭାରତ ଲକ୍ଷ୍ୟ ରଖିଥିବା ଏହି ଘଟଣା ସଙ୍କେତ ଦେଇଛି। ଭାରତର ସ୍ୱଦେଶୀ ସଂସ୍କରଣ ଆହୁରି ଆଗକୁ ବଢ଼ିବାକୁ ଲକ୍ଷ୍ୟ ରଖିଛି। ବଡ଼, ଦାମୀ ବୋମାବାହୀ ବିମାନ ଉପରେ ନିର୍ଭର କରିବା ପରିବର୍ତ୍ତେ ଆମେରିକା ଭଳି ଭାରତ ଏହାର ବଙ୍କର ବଷ୍ଟରକୁ ଡିଜାଇନ୍ କରୁଛି। ଅଗ୍ନି-୫ର ଦୁଇଟି ନୂଆ ଭାରିଆଣ୍ଟ ବିକଶିତ ହେଉଥିବା ସୂଚନା ମିଳିଛି। ଗୋଟିଏରେ ଭୂପୃଷ୍ଠ ଉପର ଲକ୍ଷ୍ୟ ପାଇଁ ଏୟାର୍‌ଫାଷ୍ଟ ଯୁଦ୍ଧାସ୍ତ୍ର ରହିବ ଏବଂ ଅନ୍ୟଟି ଜିବିୟୁ-୫୭ ପରି କଠୋର ଭୂତଳ ଭିତ୍ତିଭୂମିକୁ ଟାର୍ଗେଟ୍ କରିପାରିବ। ଏହା ଏକ ହାଇପରସୋନିକ୍ କ୍ଷେପଣାସ୍ତ୍ର ହେବ ଯାହା ଶବ୍ଦଠୁ ଅଧିକ ବେଗ‌ରେ ୨୫୦୦ କିମି ପର୍ଯ୍ୟନ୍ତ ଗତି କରିପାରିବ।