ଭାରତ ଯୁବବର୍ଗଙ୍କ ଉପରେ ବିଶ୍ୱାସ ରଖି ଆଗକୁ ବଢ଼ୁଛି: ମୋଦୀ

ନୂଆଦିଲ୍ଲୀ/ଭୁବନେଶ୍ୱର : ଏକବିଂଶ ଶତାବ୍ଦୀର ଭାରତ ଯୁବବର୍ଗଙ୍କ ଉପରେ ଅତୁଟ ବିଶ୍ୱାସ ରଖି ଆଗକୁ ବଢ଼ୁଛି । ଫଳସ୍ୱରୂପ ଇନୋଭେସନ ଇନଡେକ୍ସରେ ଭାରତର ରୢାଙ୍କ୍ ବୃଦ୍ଧି ପାଇଛି । ବିଗତ ୮ ବର୍ଷରେ ପେଟେଣ୍ଟ ସଂଖ୍ୟା ୭ ଗୁଣା ବୃଦ୍ଧି ପାଇଛି । ୟୁନିକର୍ଣ୍ଣର ଗଣନା ମଧ୍ୟ ୧୦୦ ଅତିକ୍ରମ କରିଛି ବୋଲି ଗୁରୁବାର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭିଡିଓ କନଫରେନ୍ସ ମାଧ୍ୟମରେ ସ୍ମାର୍ଟ ଇଣ୍ଡିଆ ହାକାଥାନ (ଏସଆଇଏଚ)- ୨୦୨୨ର ଗ୍ରାଣ୍ଡ୍ ଫାଇନାଲକୁ ସମ୍ବୋଧିତ କରି କହିଛନ୍ତି।

ଏହି ଅବସରରେ ପ୍ରଧାନମନ୍ତ୍ରୀ କେରଳ, ତାମିଲନାଡ଼ୁ, ଗୁଜୁରାଟ, ଉତ୍ତରପ୍ରଦେଶ ଓ ଅନ୍ୟ ରାଜ୍ୟର ଭାଗ ନେଇଥିବା ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ । ପରେ ସମ୍ବୋଧନ କରି ପ୍ରଧାନମନ୍ତ୍ରୀ କହିଛନ୍ତି ଯେ ଗତ ୭ ରୁ ୮ ବର୍ଷ ମଧ୍ୟରେ ଅନେକ ବିପ୍ଳବ ବଳରେ ଦେଶ ଅଗ୍ରସର ହେଉଛି । ଭାରତରେ ଆଜି ଭିତ୍ତିଭୂମି, ସ୍ୱାସ୍ଥ୍ୟସେବା, ଡିଜିଟାଲ, ପ୍ରଯୁକ୍ତିବିଦ୍ୟା ଏବଂ ପ୍ରତିଭାର ବିପ୍ଳବ ଜାରି ରହିଛି । ଦେଶରେ ନବସୃଜନ ପରମ୍ପରାକୁ ଆଗକୁ ବଢ଼ାଇବା ପାଇଁ ସାମାଜିକ ଓ ଆନୁଷ୍ଠାନିକ ସହଯୋଗ ଉପରେ ଗୁରୁତ୍ୱ ଦିଆଯାଉଛି।

ଏହି ଅବସରରେ କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସ୍ୱାଗତ ଅଭିଭାଷଣ ପ୍ରଦାନ କରିବା ଅବସରରେ କହିଛନ୍ତି ଯେ ଦେଶ ଯେତେବେଳେ ସ୍ୱାଧୀନତାର ୭୫ ବର୍ଷ ପୂରଣ କରି ଅମୃତ କାଳରେ ପ୍ରବେଶ କରୁଅଛି, ସେହି ସମୟରେ ସ୍ମାର୍ଟ ଇଣ୍ଡିଆ ହାକାଥନ ହେଉଛି ଅଭିନବ ଉପାୟରେ ଏକ ପ୍ରତିଯୋଗିତାମୂଳକ ହାକାଥନ। ପ୍ରଧାନମନ୍ତ୍ରୀ ମୋଦୀଙ୍କ ସମ୍ବୋଧନ ନବସୃଜନ ଦିଗରେ ନୂଆପିଢିଙ୍କ ଆତ୍ମବିଶ୍ୱାସକୁ ବଢାଇବ । ପ୍ରଧାନମନ୍ତ୍ରୀ ଦେଶକୁ ୫ ଟ୍ରିଲିୟନ ଆମେରିକୀୟ ଡଲାର ଅର୍ଥନୀତି କରିବା ପାଇଁ ଆହ୍ୱାନ କରିଛନ୍ତି । ଏହା ତେବେ ସମ୍ଭବ ହେବ ଯେବେ ଦେଶର ନୂଆପିଢି ଏହି ଚ୍ୟାଲେଞ୍ଜକୁ ସ୍ୱୀକାର କରିବ । ପ୍ରଧାନମନ୍ତ୍ରୀ ସମସ୍ତଙ୍କୁ କର୍ତ୍ତବ୍ୟବୋଧର ଆହ୍ୱାନ ଦେଇଥିବା ବେଳେ ଆଜିର ଯୁବପିଢ଼ି ଦେଶକୁ ଆତ୍ମନିର୍ଭର କରିବା କର୍ତ୍ତବ୍ୟର ଦାୟିତ୍ୱ ନେଇଛନ୍ତି।

ଶ୍ରୀ ପ୍ରଧାନ ଆହୁରି କହିଛନ୍ତି ଯେ ଦେଶର ନୂଆପିଢିଙ୍କ ମଧ୍ୟରେ ଉଦ୍ଭାବନ, ଉଦ୍ୟମିତା, ସମସ୍ୟା ଆଧାରରେ ସମାଧାନ କରିବା ଏବଂ ଅନୁସନ୍ଧାନର ଆଗ୍ରହକୁ ପ୍ରୋତ୍ସାହନ ଦେବା ଦିଗରେ ପ୍ରଧାନମନ୍ତ୍ରୀ ସର୍ବଦା ଗୁରୁତ୍ୱ ଦେଇ ଆସୁଛନ୍ତି । ଏହାକୁ ଦୃଷ୍ଟିରେ ରଖି ଦେଶରେ ଗମ୍ଭୀର ସମସ୍ୟାର ସମାଧାନ ଖୋଜିବା ପାଇଁ ପ୍ରଧାନମନ୍ତ୍ରୀଙ୍କ ମାର୍ଗଦର୍ଶନରେ ବିଗତ ୫ ବର୍ଷ ଧରି ସ୍ମାର୍ଟ ଇଣ୍ଡିଆ ହାକାଥନ ଆୟୋଜନ ହୋଇଆସୁଛି । ଏହି କାର୍ଯ୍ୟକ୍ରମର ପ୍ରଥମ ସଂସ୍କରଣରେ ପ୍ରାୟ ୭୫୦୦ ପଞ୍ଜିକୃତ ଟିମ ଥିବା ବେଳେ ବର୍ତ୍ତମାନ ଏହି ସଂଖ୍ୟା ପଞ୍ଚମ ସଂସ୍କରଣରେ ପ୍ରାୟ ୨୯,୬୦୦ରେ ପହଞ୍ଚିଛି । ଚଳିତବର୍ଷ ପ୍ରଥମ ଥର ପାଇଁ ସ୍ମାର୍ଟ ଇଣ୍ଡିଆ ହାକାଥନରେ ସ୍କୁଲ ସେକ୍ସନ ଆରମ୍ଭ କରାଯାଇଛି । ଚଳିତ ବର୍ଷ ସ୍ମାର୍ଟ ଇଣ୍ଡିଆ ହାକାଥନର ଗ୍ରାଣ୍ଡ ଫାଇନାଲରେ ଭାଗ ନେବା ପାଇଁ ୧୫ ହଜାରରୁ ଅଧିକ ନୂଆପିଢି ଓ ଏବଂ ସେମାନଙ୍କ ମେଣ୍ଟର ୭୫ଟି ନୋଡ଼ାଲ କେନ୍ଦ୍ରରେ ପହଞ୍ଚିଛନ୍ତି । ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ଏହି ଫାଇନାଲରେ ୨୯୦୦ରୁ ଅଧିକ ସ୍କୁଲ ଏବଂ ୨୨୦୦ ଉଚ୍ଚ ଶିକ୍ଷାନୁଷ୍ଠାନର ଛାତ୍ରଛାତ୍ରୀ ୫୩ କେନ୍ଦ୍ରୀୟ ମନ୍ତ୍ରଣାଳୟ ଦ୍ୱାରା ୪୭୬ଟି ବିଭିନ୍ନ ସମସ୍ୟାର ସମାଧାନ କରିବା କାମରେ ଲାଗିଛନ୍ତି ବୋଲି ଶ୍ରୀ ପ୍ରଧାନ କହିଥିଲେ।