ନୌସେନା ପାଇଁ ୧୧୧ଟି ହେଲିକାପ୍ଟର କିଣିବ ଭାରତ, ଜାରି ହେଲା ଏକ୍ସପ୍ରେସନ ଅଫ ଇଣ୍ଟରେଷ୍ଟ
ନୂଆଦିଲ୍ଲୀ : ଭାରତୀୟ ନୌସେନା ପାଇଁ ୧୧୧ଟି ୟୁଟିଲିଟି ହେଲିକାପ୍ଟର ଖରିଦ କରିବା ପାଇଁ କେନ୍ଦ୍ର ସରକାର ଏକ୍ସପ୍ରେସନ ଅଫ ଇଣ୍ଟରେଷ୍ଟ ଜାରି କରିଛନ୍ତି । ଏହା ମାଧ୍ୟମରେ ବିଦେଶୀ ହେଲିକାପ୍ଟର କମ୍ପାନି ଓ ତାଙ୍କର ଭାରତୀୟ ସହଯୋଗୀମାନଙ୍କୁ ଚୟନ କରାଯିବ । ନୌସେନା ପାଖରେ ଏବେ ଥିବା ଚେତକ ହେଲିକାପ୍ଟର ପୁରୁଣା ହୋଇଯାଇଥିବାରୁ ସେଗୁଡ଼ିକ ସ୍ଥାନରେ ଏହି ନୂଆ ହେଲିକାପ୍ଟରଗୁଡ଼ିକର ବ୍ୟବହାର ହେବ ।
Sambad is now on WhatsApp
Join and get latest news updates delivered to you via WhatsApp
ଗତ ବର୍ଷ ଅଗଷ୍ଟ ମାସରେ ରକ୍ଷାମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତା ଥିବା ପ୍ରତିରକ୍ଷା କ୍ରୟ ପରିଷଦ (ଡିଏସି) ପ୍ରାୟ ୪୬ ହଜାର କୋଟି ଟଙ୍କାର ପ୍ରତିରକ୍ଷା ସାମଗ୍ରୀ ଖରିଦ ପ୍ରସ୍ତାବକୁ ମଂଜୁରୀ ଦେଇଥିଲା । ଭାରତୀୟ ପ୍ରତିରକ୍ଷା ବାହିନୀ ଅର୍ଥାତ ସେନା, ନୌସେନା ଓ ବାୟୁସେନା ଅନେକ ଦିନ ଧରି ଏସବୁ ସାମଗ୍ରୀ ଲାଗି ଦାବି କରିଆସୁଥିଲା । କିଣାହେବାକୁ ଥିବା ସାମଗ୍ରୀ ମଧ୍ୟରେ ଥିଲା ଭାରତୀୟ ନୌସେନା ପାଇଁ ୧୧୧ଟି ୟୁଟିଲିଟି ହେଲିକାପ୍ଟର । ଏଗୁଡ଼ିକର ମୋଟ ମୂଲ୍ୟ ପ୍ରାୟ ୨୧ ହଜାର କୋଟି ଟଙ୍କା ହେବ ।
ଅନ୍ୟପକ୍ଷରେ ଭାରତୀୟ ସେନା ପାଇଁ ମୋଟ ୩୩୬୪ କୋଟି ଟଙ୍କା ମୂଲ୍ୟର ୧୫୦ଟି ୧୫୫ ଏମଏମ ଆଡଭାନ୍ସଡ ଟାଓ୍ଵାରଡ ଆର୍ଟିଲାରୀ ଗନ, ୨୪ଟି ଆଣ୍ଟି ସବମେରିନ ମଲଟି ରୋଲ ହେଲିକାପ୍ଟର, ୧୪ଟି ସର୍ଟ ରେଞ୍ଜ ମିସାଇଲ ସିଷ୍ଟମ ମଧ୍ୟ ଖରିଦ କରାଯିବ । ଏଥିପାଇଁ ଖୁବଶୀଘ୍ର ଏକ୍ସପ୍ରେସନ ଅଫ ଇଣ୍ଟରେଷ୍ଟ ଜାରି କରାଯିବ ।