ଭାରତରେ ସଂଖ୍ୟାଲଘୁଙ୍କ ସ୍ଥିତି ଭଲ ଅଛି, ଜାତିସଂଘ ଭାରତର ମଡେଲକୁ ବ୍ୟବହାର କରୁ : ରିପୋର୍ଟ

ନୂଆଦିଲ୍ଲୀ : ଭାରତରେ ସଂଖ୍ୟାଲଘୁଙ୍କ ସ୍ଥିତି ସବୁଠାରୁ ଭଲ ଅଛି । ସଂଖ୍ୟାଲଘୁଙ୍କ ଅଧିକାରକୁ କିପରି ସୁରକ୍ଷା ଦିଆଯାଏ ତାହା ଜାତିସଂଘ ଭାରତଠାରୁ ଶିଖିବା ଉଚିତ ବୋଲି ସେଣ୍ଟର ଫର ପଲିସି ଆନାଲିସିସ୍ ନାମକ ଅନ୍ତର୍ଜାତୀୟ ଗବେଷଣା ସଂସ୍ଥା କହିଛି ।

ଏହି ସଂସ୍ଥାର ରିପୋର୍ଟରେ କୁହାଯାଇଛି ଯେ ଭାରତର ସଂଖ୍ୟାଲଘୁ ନୀତି ସର୍ବୋତ୍ତମ ଓ ଏହା ବିବିଧତାକୁ ପ୍ରେତ୍ସାହିତ କରିଥାଏ । ଅଧିକାଂଶ ପାଶ୍ଚାତ୍ୟ ସଂସ୍ଥାଗୁଡ଼ିକର ରିପୋର୍ଟରେ ଭାରତରେ ସଂଖ୍ୟାଲଘୁଙ୍କ ସ୍ଥିତିକୁ ଖରାପ ସ୍ଥିତିରେ ଦର୍ଶାଯାଉଥିବାବେଳେ ଏହି ନୂଆ ରିପୋର୍ଟ ଭାରତ ସରକାରଙ୍କୁ ଉତ୍ସାହିତ କରିଛି ।

ଭାରତର ସମ୍ବିଧାନରେ ଧାର୍ମିକ ସଂଖ୍ୟାଲଘୁଙ୍କ ସାଂସ୍କୃତିକ ଏବଂ ଶିକ୍ଷାଗତ ପ୍ରୋତ୍ସାହନ ପାଇଁ ସ୍ୱତନ୍ତ୍ର ବ୍ୟବସ୍ଥା ରହିଛି । ଅନ୍ୟ କୌଣସି ଦେଶର ସମ୍ବିଧାନରେ ଧାର୍ମିକ ଏବଂ ଭାଷାଗତ ସଂଖ୍ୟାଲଘୁଙ୍କ ପ୍ରୋତ୍ସାହନ ପାଇଁ ଏପରି ବିଶେଷ ବ୍ୟବସ୍ଥା ନାହିଁ ବୋଲି ରିପୋର୍ଟରେ ଦର୍ଶାଯାଇଛି ।

ଭାରତ ହେଉଛି ଏକ ଦେଶ ଯେଉଁଠାରେ ଅନ୍ୟ ଅନେକ ଦେଶ ତୁଳନାରେ କୌଣସି ଧର୍ମର କୌଣସି ଉପ-ସମ୍ପ୍ରଦାୟ ଉପରେ କୌଣସି ପ୍ରତିବନ୍ଧକ ନାହିଁ ବୋଲି ରିପୋର୍ଟ କହିଛି ।

ତେଣୁ, ଭାରତର ସଂଖ୍ୟାଲଘୁ ନୀତି ଅନ୍ୟ ଦେଶଗୁଡ଼ିକ ପାଇଁ ଜାତିସଂଘ ଦ୍ୱାରା ଏକ ମଡେଲ୍ ଭାବରେ ବ୍ୟବହାର କରାଯାଇପାରେ ।  କାରଣ ଭାରତୀୟ ସମ୍ବିଧାନର ସମାବେଶୀ ଚରିତ୍ର ଏବଂ ବିଭିନ୍ନ ଧର୍ମ ଏବଂ ସେମାନଙ୍କ ସମ୍ପ୍ରଦାୟ ସମ୍ବନ୍ଧରେ ଅଣ-ଭେଦଭାବପୂର୍ଣ୍ଣ ଆଭିମୁଖ୍ୟ ରହିଛି ।

ତେବେ ରିପୋର୍ଟରେ କୁହାଯାଇଛି ଯେ, ଭାରତୀୟ ସମ୍ବିଧାନର ସମାବେଶୀ ପ୍ରକୃତି ସତ୍ତ୍ବେ ଭାରତରେ ଅନେକ ସମୟରେ ସଂଖ୍ୟା ଗରିଷ୍ଠ ଓ ସଂଖ୍ୟାଲଘୁ ବିଶେଷକରି ମୁସଲମାନ ସଂପ୍ରଦାୟ ମଧ୍ୟରେ ସଂଘର୍ଷର ଖବର ଆସୁଛି । ଏହା ଭାରତର ସଂଖ୍ୟାଲଘୁ ନୀତିର ସମୀକ୍ଷା ପାଇଁ ଆହ୍ୱାନ କରେ ।