ନୂଆଦିଲ୍ଲୀ : ଭାରତ ଓ ଚୀନ ମଧ୍ୟରେ ଚାଲିଥିବା ସୀମା ବିବାଦ ଦିନକୁ ଦିନ ଅଧିକ ଜଟିଳ ହେଉଥିବାବେଳେ ଚୀନ ସରକାର ଏକ ବିବାଦୀୟ ଆଇନକୁ ମଂଜୁରୀ ଦେଇଛନ୍ତି । ଏହାକୁ କୁହାଯାଉଛି ଭୂମି-ସୀମା ଆଇନ । ଏହି ଆଇନ ଅନୁସାରେ ନିଜର ସୀମାକୁ ସୁରକ୍ଷିତ ରଖିବାକୁ ଚୀନ ସରକାର ଆବଶ୍ୟକ ପଦକ୍ଷେପ ନେଇପାରବେ । କିନ୍ତୁ ଚୀନର ଏହି ନିୟମକୁ ନେଇ ଭାରତ ସରକାର ଆପତ୍ତି ଉଠାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଭାରତର ବୈଦେଶିକ ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ ଚୀନ ସରକାରଙ୍କ ଏହି ନିୟମ ଦ୍ବାରା ଦ୍ବିପାକ୍ଷିକ ସମ୍ପର୍କ ପ୍ରଭାବିତ ହେବ । ଏହା ମଧ୍ୟ ସୀମା ପରିଚାଳନା ଓ ବନ୍ଦବୋସ୍ତକୁ ପ୍ରଭାବିତ କରିବ । ମନ୍ତ୍ରାଳୟ ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ ଏହି ଆଇନ ୧୯୬୩ରେ ଗୃହୀତ ହୋଇଥିବା ଚୀନ-ପାକିସ୍ତାନ ସୀମା ବୁଝାମଣାକୁ ମଧ୍ୟ କୌଣସି ବୈଧତା ପ୍ରଦାନ କରିବ ନାହିଁ । ଏହା ଏକ ଅବୈଧ ରାଜିନାମା ବୋଲି ଭାରତ ସରକାର କହିଆସୁଛନ୍ତି ।
ନୂଆ ଆଇନର ଦ୍ବାହି ଦେଇ ଚୀନ ସୀମାର ଶାନ୍ତି ଭଙ୍ଗ କରିବା ସହ ସ୍ଥିତାବସ୍ଥାକୁ ବଦଳାଇବାକୁ ଉଦ୍ୟମ କରିବ ନାହିଁ ବୋଲି ଭାରତ ସରକାର ଆଶା ପ୍ରକଟ କରିଛନ୍ତି ।
ଚୀନର ଏହି ନୂଆ ଆଇନ ଅନୁସାରେ ଚୀନ ସରକାର ସୀମାନ୍ତ ଅଂଚଳର ସୁରକ୍ଷା ପାଇଁ ଆବଶ୍ୟକ ପଦକ୍ଷେପ ନେଇପାରିବେ । ଏହା ସହିତ ସୀମାରେ ଆବଶ୍ୟକ ଭିତ୍ତିଭୂମି ଓ ବିକାଶମୂଳକ କାମ କରିପାରିବେ ।