ନୂଆଦିଲ୍ଲୀ: ଅରୁଣାଚଳ ପ୍ରଦେଶର ଅନେକ ସ୍ଥାନର ନାମ ପରିବର୍ତ୍ତନ ପାଇଁ ଚୀନ୍ର ସଦ୍ୟତମ ପ୍ରୟାସକୁ ଭାରତ ଦୃଢ଼ତାର ସହ ପ୍ରତ୍ୟାଖ୍ୟାନ କରିଛି ଏବଂ ଅରୁଣାଚଳ ପ୍ରଦେଶ ଭାରତର ଏକ ଅବିଚ୍ଛେଦ୍ୟ ଅଙ୍ଗ ବୋଲି ଦୋହରାଇଛି। ଚୀନ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ମେ ୧୧-୧୨ରେ ଅରୁଣାଚଳ ପ୍ରଦେଶର ୨୭ଟି ସ୍ଥାନ ପାଇଁ ନୂଆ ନାମ ପ୍ରକାଶ କରିବାର ଦୁଇ ଦିନ ପରେ ଏହା ଘଟିଛି।
ନାମକରଣ ବାସ୍ତବତାକୁ ବଦଳାଇ ପାରିବ ନାହିଁ
ଅରୁଣାଚଳ ପ୍ରଦେଶକୁ ଜାଙ୍ଗନାନ ବୋଲି ଆଖ୍ୟା ଦେଲା ଚୀନ୍
ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ମଙ୍ଗଳବାର କଡ଼ା ଶବ୍ଦରେ କୁହାଯାଇଛି ଯେ, ଆମେ ଦେଖିଛୁ ଯେ ଚୀନ୍ ଭାରତୀୟ ରାଜ୍ୟ ଅରୁଣାଚଳ ପ୍ରଦେଶର ସ୍ଥାନଗୁଡ଼ିକର ନାମକରଣ ପାଇଁ ନିଜର ଅଯଥା ପ୍ରୟାସ ଜାରି ରଖିଛି। ଆମେ ଏଭଳି ପ୍ରୟାସକୁ ସ୍ପଷ୍ଟ ଭାବେ ପ୍ରତ୍ୟାଖ୍ୟାନ କରୁଛୁ। ମନ୍ଦ ଉଦ୍ଦେଶ୍ୟରେ ଏଭଳି ନାମକରଣ ବାସ୍ତବତାକୁ ବଦଳାଇ ପାରିବ ନାହିଁ। ଅରୁଣାଚଳ ପ୍ରଦେଶ ଭାରତର ଅବିଚ୍ଛେଦ୍ୟ ଅଙ୍ଗ ଥିଲା, ଅଛି ଓ ସବୁବେଳେ ରହିବ। ଏହା ପୂର୍ବରୁ ୨୦୨୪ ଏପ୍ରିଲରେ ଚୀନ୍ ଅରୁଣାଚଳ ପ୍ରଦେଶରେ ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି)ର ବିଭିନ୍ନ ସ୍ଥାନର ୩୦ଟି ନୂଆ ନାମର ଚତୁର୍ଥ ତାଲିକା ପ୍ରକାଶ କରିଥିଲା। ଚୀନ୍ ଅରୁଣାଚଳ ପ୍ରଦେଶକୁ ଜାଙ୍ଗନାନ ବୋଲି ନାମ ଦେଇଛି। ବେଜିଂ ଦ୍ୱାରା ନାମିତ ୩୦ଟି ସ୍ଥାନ ମଧ୍ୟରେ ୧୨ଟି ପର୍ବତ, ୪ଟି ନଦୀ, ଗୋଟିଏ ହ୍ରଦ, ଗୋଟିଏ ପାର୍ବତ୍ୟ ପଥ, ୧୧ଟି ଆବାସିକ ଅଞ୍ଚଳ ଓ ଗୋଟିଏ ଜମି ରହିଛି।