ଲଦାଖର ଚୁସୁଲ ସେକ୍ଟରରୁ ଗିରଫ ହୋଇଥିବା ଚୀନ ଯବାନଙ୍କୁ ନିଜ ଦେଶକୁ ପଠାଇ ଦିଆଗଲା
ଲଦାଖ: ପୂର୍ବ ଲଦାଖର ଚୁସୁଲ ସେକ୍ଟରର ଗୁରୁଙ୍ଗ ପାହାଡ଼ ନିକଟରେ ଭାରତୀୟ ସୀମା ଭିତରକୁ ପ୍ରବେଶ କରିଥିବା ଜଣେ ଚୀନା ଯବାନଙ୍କୁ ତାଙ୍କ ଦେଶକୁ ପଠାଇ ଦେଇଛି ଭାରତୀୟ ସେନା। ଆଜି ଦିନ ୧୦ଟା ସୁଦ୍ଧା ଚୀନା ଯବାନଙ୍କୁ ତାଙ୍କ ଦେଶକୁ ପଠାଇ ଦିଆଯାଇଥିବା ସୂଚନା ରହିଛି। ଭାରତ-ଚୀନ ସୀମା ବିବାଦ ଆରମ୍ଭ ହେବା ପରଠାରୁ ଏହା ହେଉଛି ଦ୍ବିତୀୟ ଘଟଣା। ଏଇ କିଛି ମାସ ମଧ୍ୟରେ ପୂର୍ବରୁ ମଧ୍ୟ ଜଣେ ଯବାନ ସୀମା ଡେଇଁ ଭାରତ ପଶି ଆସିଥିଲେ। ଏହିପରି ଘଟଣା ଏହା ପୂର୍ବରୁ ଅକ୍ଟୋବର ମାସରେ ଘଟିଥିଲା।
Sambad is now on WhatsApp
Join and get latest news updates delivered to you via WhatsApp
ନିକଟରେ ଏକ ସରକାରୀ ବିବୃତିରେ ଘୋଷଣା କରାଯାଇଥିଲା ଯେ ଗତ ଶୁକ୍ରବାର ସକାଳେ ଜଣେ ଚୀନର ଯବାନଙ୍କୁ ଭାରତ ସୀମା ପାର୍ କରିଥିବା ବେଳେ ଧରାଯାଇଥିଲା। ଯବାନ ଜଣଙ୍କୁ ଭାରତୀୟ ସେନା ଗିରଫ କରିଥିଲା। ଜାଣିବାକୁ ମିଳିଥିଲା ଯେ ପିପୁଲ୍ସ ଲିବରେସନ୍ ଆର୍ମି(ପିଏଲ୍ଏ)ର ଏହି ଯବାନ ଜଣକ ବାଟ ଭୁଲି ଭୁଲ୍ରେ ଭାରତୀୟ ସୀମା ଭିତରକୁ ପ୍ରବେଶ କରି ଆସିଥିଲେ।
ଗତ ଏକ ବର୍ଷ ହେବ ଭାରତ-ଚୀନ ମଧ୍ୟରେ ସୀମା ବିବାଦ ଉପୁଜିବା ପରେ ପରେ ସୀମାରେ ଉଭୟ ପକ୍ଷର ସୈନ୍ୟ ନିୟୋଜିତ ହୋଇଥିଲେ। ଭାରତ ଓ ଚୀନ ମଧ୍ୟରେ ଲାଗି ରହିଥିବା ତିକ୍ତ ସଂପର୍କ ଭିତରେ ବି ଚୀନ ସେନାର ଯବାନ କେଉଁ ପରିସ୍ଥିତିରେ ସୀମା ପାର୍ କରି ଭାରତ ପଶି ଆସିଥିଲେ ସେ ନେଇ ତଦନ୍ତ ଆରମ୍ଭ ହୋଇଛି ବୋଲି ଭାରତୀୟ ସେନା ପକ୍ଷରୁ କୁହାଯାଇଥିଲା।