ମିରାଜ୍‌ ଯୁଦ୍ଧବିମାନ ଖସାଇଥିଲା ଭାରତ

ନୂଆଦିଲ୍ଲୀ: ଭାରତୀୟ ସେନା ଆଜି ବରିଷ୍ଠ ପ୍ରତିରକ୍ଷା ଅଧିକାରୀଙ୍କ ଏକ ସ୍ୱତନ୍ତ୍ର ସମ୍ମିଳନୀରେ ଅପରେସନ୍‌ ସିନ୍ଦୂରର ଏକ ସଂକ୍ଷିପ୍ତ ଭିଡିଓ ସେୟାର କରିଛି। ‘ଆକାଶରେ ଶତ୍ରୁକୁ ନଷ୍ଟ କରିଛୁ’ ଶୀର୍ଷକ ଏହି ଭିଡିଓରେ ସ୍ଥଳସେନା, ନୌସେନା ଓ ବାୟୁସେନାର ଅନେକ ଅପରେସନ୍‌ର ଫୁଟେଜ୍ ରହିଛି। ଭିଡିଓର ଗୋଟିଏ ଅଂଶରେ ସାମରିକ ଉପକରଣର ଭଗ୍ନାବଶେଷ ଥିବା ଜଣାପଡିଛି। ତଳେ କ୍ୟାପସନ ଥିଲା, ‘ପାକିସ୍ତାନୀ ମିରାଜ୍‌... ଧୂଳିସାତ୍’। ଫଳରେ ଭାରତୀୟ ସଶସ୍ତ୍ର ବାହିନୀ ଉତ୍ତେଜନା ମଧ୍ୟରେ ପାକିସ୍ତାନର ଏକ ମିରାଜ ଲଢୁଆ ବିମାନକୁ ଧ୍ୱଂସ କରିଥିବା ସ୍ପଷ୍ଟ ହୋଇଛି।  

ନୂଆଦିଲ୍ଲୀରେ ଉଚ୍ଚସ୍ତରୀୟ ସାମ୍ବାଦିକ ସମ୍ମିଳନୀରେ ଭାରତୀୟ ସେନା, ବାୟୁସେନା ଓ ନୌସେନାର ବରିଷ୍ଠ କମାଣ୍ଡରମାନେ ଜମ୍ମୁ-କାଶ୍ମୀରର ପହଲଗାମରେ ଏପ୍ରିଲ ୨୨ରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣର ପ୍ରତିଶୋଧ ନେବା ପାଇଁ ମେ ୭ ତାରିଖରେ ଆରମ୍ଭ ହୋଇଥିବା ଅପରେସନ୍ ସିନ୍ଦୂରର ବିସ୍ତୃତ ବିବରଣୀ ପ୍ରଦାନ କରିଥିଲେ। ମିଲିଟାରି ଅପରେସନ୍ ମହାନିର୍ଦେଶକ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ, ଏୟାର ଅପରେସନ୍ ମହାନିର୍ଦେଶକ ଏୟାର ମାର୍ସାଲ ଏକେ ଭାରତୀ ଓ ନୌସେନା ଅପରେସନ୍ ମହାନିର୍ଦେଶକ ଭାଇସ୍ ଆଡମିରାଲ ଏଏନ୍ ପ୍ରମୋଦଙ୍କ ନେତୃତ୍ୱରେ ଏହି ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା। ଅନ୍ୟ ଏକ ଆକର୍ଷଣ ହେଉଛି ସ୍ୱଦେଶୀ ବାୟୁ ପ୍ରତିରକ୍ଷା ବ୍ୟବସ୍ଥା ଆକାଶ ପ୍ରଣାଳୀର ଚମତ୍କାର ପ୍ରଦର୍ଶନ। ଗତ ଦଶନ୍ଧିରେ ଭାରତ ସରକାରଙ୍କ ବଜେଟ୍ ଓ ନୀତିଗତ ସମର୍ଥନ ଯୋଗୁଁ ବାୟୁ ପ୍ରତିରକ୍ଷା ବ୍ୟବସ୍ଥା ଶକ୍ତିଶାଳୀ ହୋଇପାରିଛି ବୋଲି ଏୟାର ମାର୍ସାଲ ଏକେ ଭାରତୀ କହିଛନ୍ତି।

ଅପରେସନ୍‌ ସିନ୍ଦୂର ମେ ୭ ତାରିଖ ଭୋରରେ ପ୍ରାୟ ୨୫ ମିନିଟ୍ ଧରି ଚାଲିଥିଲା। ଏଥିରେ ପାକିସ୍ତାନର ମୁଖ୍ୟ ଭୂମିରେ ୪ଟି ଓ ପାକ୍-ଅଧିକୃତ କାଶ୍ମୀରରେ ୫ଟି ଆତଙ୍କୀ ସ୍ଥଳୀ ଉପରେ ଆକ୍ରମଣ କରାଯାଇଥିଲା। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ସୂଚନା ଅନୁଯାୟୀ, ଏହି ଅପରେସନରେ ୧୦୦ରୁ ଅଧିକ ଆତଙ୍କବାଦୀ ନିପାତ ହେବା ସହ ଲସ୍କର-ଏ-ତୋଇବା, ଜୈସ-ଏ-ମହମ୍ମଦ ଓ ହିଜବୁଲ ମୁଜାହିଦ୍ଦିନ ସହ ଜଡିତ ଏକାଧିକ ଶିବିର ଧ୍ୱଂସ ହୋଇଯାଇଛି। ଭାରତର ଆକ୍ରମଣ ପରେ ପାକିସ୍ତାନ ଜମ୍ମୁ-କାଶ୍ମୀର, ପଞ୍ଜାବ ଓ ରାଜସ୍ଥାନର ଭାରତୀୟ ସାମରିକ ପ୍ରତିଷ୍ଠାନ ଓ ସୀମାନ୍ତ ସହରଗୁଡ଼ିକୁ ଟାର୍ଗେଟ୍ କରି ଡ୍ରୋନ୍ ଓ କ୍ଷେପଣାସ୍ତ୍ର ଆକ୍ରମଣ କରିଥିଲା। ଏହି ଆକ୍ରମଣ ପରେ ଚଣ୍ଡିଗଡ଼, ଜୈସଲମେର ଓ ପଠାନକୋଟ ସମେତ ଏକାଧିକ ସହରରେ ଏୟାର୍ ଷ୍ଟ୍ରାଇକ୍ ସାଇରନ୍ ବାଜିଥିଲା ଓ ବ୍ଲାକ୍ ଆଉଟ୍ ହୋଇଥିଲା।