ଚୀନର ଜବାବ, ଡୋକଲାମ ବିବାଦରୁ ଭାରତ ଶିକ୍ଷା ନେବା ଉଚିତ ଥିଲା
ବେଜିଂ: ଡୋକଲାମ ପ୍ରସଙ୍ଗରେ ଭାରତୀୟ ରାଷ୍ଟ୍ରଦୂତ ଗୋତମ ବମ୍ବାଓ୍ଵାଲେ ବକ୍ତବ୍ୟର କଡା ଜବାବ ଦେଇଛି ଚୀନ । ଚୀନ ପକ୍ଷରୁ କୁହାଯାଇଛି ଯେ ଗତ ବର୍ଷ ହୋଇଥିବା ଡୋକଲାମ ବିବାଦରୁ ଭାରତ ନିଶ୍ଚିଚ ଭାବେ ଶିକ୍ଷା ନେବା ଉଚିତ । ଡୋଙ୍ଗଲାଙ୍ଗ ( ଡୋକଲାମ) ପ୍ରାଚୀନ ଚୀନର ଅଂଶବିଶେଷ । ଏହାକୁ ଚୀନର ନିଜର ଅଂଚଳ ବୋଲି କହିଛନ୍ତି ଚୀନ ବୈଦେଶିକ ମନ୍ତ୍ରାଳୟ ମୁଖପାତ୍ର ହୁଆ ଚୁନଇଙ୍ଗ । ସେ କହିଛନ୍ତି ଯେ ଚୀନ ନିଜର ସାର୍ବଭୌମତ୍ୱ ରକ୍ଷା କରିବା ପାଇଁ ସବୁକିଛି କରିପାରିବ । ବିବାଦୀୟ ଅଂଚଳରେ ସ୍ଥିତାବସ୍ଥା ବୋଲି କୌଣସି କଥା ନାହିଁ ବୋଲି ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ଚୀନରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତ ଗୌତମ ବମ୍ବାଓ୍ଵାଲେ କହିଥିଲେ ଯେ ସୀମାରେ ସ୍ଥିତାବସ୍ଥାକୁ ବଦଳାଗଲେ ଦୁଇଦେଶ ମଧ୍ୟରେ ଆଉ ଏକ ଡୋକଲାମ ଭଳି ପରିସ୍ଥିତି ସୃଷ୍ଟି ହେବ । ତେବେ ଏଭଳି ବିବାଦକୁ କଥାବାର୍ତ୍ତା ମାଧ୍ୟମରେ ଦୂର କରିବା ସବୁଠାରୁ ଉଚିତ ପନ୍ଥା ବୋଲି ସେ କହିଛନ୍ତି । ହଂକଂର ସାଉଥ ଚାଇନା ମର୍ଣ୍ଣିଂ ପୋଷ୍ଟକୁ ଏକ ସାକ୍ଷାତକାର ଦେଇ ସେ କହିଥିଲେ ଯେ ଦୁଇଦେଶମଧ୍ୟରେ ଥିବା ଅଣଚିହ୍ନଟ ସୀମା ଯୋଗୁଁ ସମସ୍ୟା ସୃଷ୍ଟି ହେଉଛି । ତେବେ ଚୀନ ପକ୍ଷରୁ ବିବାଦୀୟ ଡୋକଲାମ ଅଂଚଳରେ ସାମରିକ ଭିତ୍ତିଭୂମି ନିର୍ମାଣ ଚାଲିଥିବା ଖବରକୁ ସେ ଖଣ୍ଡନ କରିଥିଲେ ।