ଆମେରିକାଠାରୁ ଆଉ ୬ଟି ଆପାଚେ ଲଢୁଆ ହେଲିକାପ୍ଟର କିଣିବ ଭାରତ, ଚୁକ୍ତି ସ୍ୱାକ୍ଷରିତ
ନୂଆଦିଲ୍ଲୀ : ଆମେରିକାଠାରୁ ଆଉ ୬ଟି ଅତ୍ୟାଧୁନିକ ଆପାଚେ ଲଢୁଆ ହେଲିକପ୍ଟର ଖରିଦ କରିବ ଭାରତ । ଏ ନେଇ ଆଜି ଦୁଇଦେଶ ମଧ୍ୟରେ ଚୁକ୍ତି ହୋଇଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପସ୍ଥିତିରେ ଏହି ଚୁକ୍ତି ସ୍ୱାକ୍ଷରିତ ହୋଇଛି । ଏହି ଚୁକ୍ତି ଆମେରିକାର ବୋଇଂ କମ୍ପାନି ଓ ଭାରତୀୟ ପ୍ରତିରକ୍ଷା ମନ୍ତ୍ରାଳୟ ମଧ୍ୟରେ ହୋଇଛି । ଏହାଛଡ଼ା ଏକ ଫରେନ ମିଲିଟାରୀ ସେଲ ଚୁକ୍ତି ଦୁଇ ଦେଶର ସରକାରଙ୍କ ମଧ୍ୟରେ ହୋଇଛି । ଭାରତୀୟ ସେନା ଏହି ୬ଟି ଆପାଚେ ହେଲିକାପ୍ଟର ବ୍ୟବହାର କରିବ । ଏଗୁଡ଼ିକର ଯୋଗାଣ ମାର୍ଚ୍ଚ ୨୦୨୩ ପରେ ଆରମ୍ଭ ହେବ । ଭାରତୀୟ ସେନାକୁ ଆପାଚେର ସର୍ବାଧୁନିକ ସଂସ୍କରଣ ଏଏଚ୬୪-ଇ ମିଳିବ । ଗତ ୨୦୧୫ରେ ଭାରତ ଆମେରିକାଠାରୁ ୨୨ଟି ଆପାଚେ ଖରିଦ ପାଇଁ ଚୁକ୍ତି କରିଥିଲା । ଏପର୍ଯ୍ୟନ୍ତ ଏହି ୨୨ଟି ମଧ୍ୟରୁ ୧୮ଟି ଭାରତରେ ପହଞ୍ଚିଛି । ଭାରତୀୟ ବାୟୁସେନା ଏଗୁଡ଼ିକୁ ବ୍ୟବହାର କରୁଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ଟ୍ୟାଙ୍କ୍, ସାମରିକ ଗାଡିକୁ ଧ୍ୱଂସ କରିବାରେ ମାହିର ଥିବା ଆପାଚେ ପୂରା ବିଶ୍ୱରେ ବିଧ୍ୱଂସକାରୀ ହେଲିକପ୍ଟର ଭାବେ ଜଣାଶୁଣା ।ଏହି ହେଲିକପ୍ଟରରେ ୩୦ଏମଏମ ମେଶିନଗନ ସଂଯୁକ୍ତ ରହିଛି । ଯେଉଁଥିରୁ ଗୋଟିଏ ଥରରେ ୧୨୦୦ ରାଉଣ୍ଡ ପର୍ଯ୍ୟନ୍ତ ଗୁଳି ଚଳାଇ ଯାଇପାରିବ । ଏହାଛଡା ଏଥିରେ ଆଣ୍ଟି ଟ୍ୟାଙ୍କ୍ ହେଲଫାୟାର ମିସାଇଲ ରହିଛି ଯାହା ଶତ୍ରୁ ପକ୍ଷର ଟ୍ୟାଙ୍କକୁ ଥରକେ ନଷ୍ଟ କରିବାକୁ ସକ୍ଷମ ।