ଆଫଗାନିସ୍ତାନରେ ଥିବା ଭାରତୀୟ ସମର୍ଥକମାନଙ୍କୁ ଆଶ୍ରୟ ଦେବ ଭାରତ
ନୂଆଦିଲ୍ଲୀ : ଯୁଦ୍ଧ ବିଧ୍ବସ୍ତ ଆଫଗାନିସ୍ତାନରୁ ଆସି ଭାରତରେ ଶରଣ ମାଗୁଥିବା ଲୋକମାନଙ୍କୁ ଆଶ୍ରୟ ଦେବାକୁ ଭାରତ ସରକାର ଯୋଜନା କରୁଛନ୍ତି । ଜାତିଧର୍ମ ନିର୍ବିଶେଷରେ ଯେଉଁ ଭାରତୀୟ ସମର୍ଥକମାନେ ଭାରତ ଆସିବେ ସେମାନଙ୍କୁ ଆଶ୍ରୟ ଓ ସହାୟତା ପ୍ରଦାନ କରାଯିବ । ଏଥିପାଇଁ ସରକାର ଏକ ଯୋଜନା ଉପରେ କାମ କରୁଛନ୍ତି ।
ଆଫଗାନିସ୍ତାନ ଦଖଲ ପାଇଁ ତାଲିବାନ ଚଳାଇଥିବା ଅଭିଯାନ ଯୋଗୁଁ ଏହି ଦେଶରେ ଅଭୁତପୂର୍ବ ମାନବୀୟ ସଂକଟ ଦେଖାଦେଇଛି । ତାଲିବାନ ଭୟରେ ସାଧାରଣ ଲୋକେ ନିଜର ଘରଦ୍ବାର ଛାଡ଼ି ଅନ୍ୟ ଦେଶଗୁଡିକୁ ପଳାଇଯାଉଛନ୍ତି । ଏହାକୁ ନେଇ ସମଗ୍ର ବିଶ୍ବରେ ଚିନ୍ତା ପ୍ରକାଶ ପାଇଛି । ବିଶେଷକରି ତାଲିବାନ ଶାସନ କରିବାପରେ ଆଫଗାନିସ୍ତାନରେ ଥିବା ହିନ୍ଦୁ, ଶିଖ, ଖ୍ରୀଷ୍ଟିଆନ ଆଦି ସଂପ୍ରଦାୟର ଲୋକମାନେ ନିଜ ସୁରକ୍ଷାକୁ ନେଇ ଚିନ୍ତିତ ହୋଇ ପଳାୟନ କରୁଛନ୍ତି ।
ଆଫଗାନ ସମସ୍ୟାର ସମାଧାନ ପାଇଁ କାତାରଠାରେ ଅନୁଷ୍ଠିତ ବୈଠକରେ ଭାରତ ସମେତ ବିଭିନ୍ନ ଦେଶ ଯୋଗଦେଇଛନ୍ତି । ଏହି ବୈଠକରେ ଭାରତ ଏହି ପ୍ରସ୍ତାବ ଦେଇଥିବା କୁହାଯାଉଛି । ଗତ ଗୁରୁବାରଦିନ ଦୋହାଠାରେ ଅନୁଷ୍ଠିତ ଆଲୋଚନାରେ ଭାରତ,ତୁର୍କୀ, ଜର୍ମାନୀ, ତାଜିକିସ୍ତାନ,ତୁର୍କମେନିସ୍ତାନ, ନରଓ୍ବେ, ଆମେରିକା, ବ୍ରିଟେନ ଆଦି ଯୋଗଦେଇଥିଲେ ।