ନୂଆଦିଲ୍ଲୀ : ଲଦାଖରେ ଚୀନ ସେନାର ମୁକାବିଲା ଲାଗି ଭାରତୀୟ ସେନା ଦୀର୍ଘ ସମୟ ପାଇଁ ଏପରିକି ଶୀତଋତୁରେ ରହିବାକୁ ପ୍ରସ୍ତୁତ ବୋଲି ବରିଷ୍ଠ ସେନା ଅଧିକାରୀମାନେ ଏକ ସଂସଦୀୟ କମିଟିକୁ ଜଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଚିଫ ଅଫ ଡିଫେନ୍ସ ଷ୍ଟାଫ ଜେନେରାଲ ବିପିନ ରାଓ୍ଵତଙ୍କ ନେତୃତ୍ୱରେ ଯାଇଥିବା ବରିଷ୍ଠ ସେନା ଅଧିକାରୀମାନଙ୍କ ଏକ ଦଳ ସଂସଦୀୟ କମିଟିକୁ କହିଛନ୍ତି ଯେ ଭାରତ ଓ ଚୀନ ସେନା ମଧ୍ୟରେ ବୃଦ୍ଧିପାଇଥିବା ଉତ୍ତେଜନା ସ୍ୱାଭାବିକ ହେବାକୁ କିଛି ସମୟ ଲାଗିବ । ତେବେ ଚୀନର ଯେକୌଣସି ଦୁଃସାହସର ଜବାବ ଦେବାକୁ ସେନା ପ୍ରସ୍ତୁତ ବୋଲି ଏହି ଦଳ କହିଛି ।
ଅନ୍ୟପକ୍ଷରେ ଆଜି ଭାରତ ଓ ଚୀନ ସେନା ମଧ୍ୟରେ ଚାଲିଥିବା ଏକ ଆଲୋଚନା ବେଳେ ଦେପସାଙ୍ଗ ଅଞ୍ଚଳରୁ ଯଥା ଶୀଘ୍ର ପଛକୁ ହଟିବାକୁ ଭାରତୀୟ ସେନା ଚୀନକୁ କହିଛି । ଏହା ସହିତ ନିର୍ମାଣାଧୀନ ବିଭିନ୍ନ ଭିତ୍ତିଭୂମି କାର୍ଯ୍ୟକୁ ରଦ୍ଦ କରିବାକୁ ଭାରତ କହିଛି ।
ସୂଚନାଯୋଗ୍ୟ ଯେ ଲଦାଖର କେତେକ ଅଞ୍ଚଳରୁ ଚୀନ ସେନା ପଛକୁ ହଟିଥିଲେ ମଧ୍ୟ ଉତ୍ତେଜନା ଜାରି ରହିଛି । ଏହାର କାରଣ ହେଉଛି ଚୀନ ସେନା ଦେପସାଙ୍ଗ, ଦୌଲତ ବେଗ ଓଲଡି ଆଦି କେତେକ ବିବାଦୀୟ ଅଞ୍ଚଳରୁ ଏବେବି ପଛକୁ ହଟିନାହିଁ । ଏହାକୁ ନେଇ ଦୁଇ ଦେଶ ମଧ୍ୟରେ ଉତ୍ତେଜନା ଥମିବାର ନାଁ ଧରୁନାହିଁ । ସୀମା ସେପଟେ ଚୀନ ଯେପରି ନିଜର ଶକ୍ତି ବଢାଇଚାଲିଛି, ତାହାକୁ ଦେଖି ଭାରତୀୟ ସେନା ମଧ୍ୟ ନିଜର ଶକ୍ତି ବଢାଇଚାଲିଛି । ଏଥିପାଇଁ ଲଦାଖ ଓ ଅନ୍ୟ ଚୀନ ସୀମାରେ ନିଜର ଟ୍ୟାଙ୍କ ରେଜିମେଣ୍ଟ ମୁତୟନ କରିଛି ଭାରତ ।