ଏଣିକି ପେଟ ନ କମେଇଲେ ସେନାରେ ପଦୋନ୍ନତି ମିଳିବ ନାହିଁ
ନୂଆଦିଲ୍ଲୀ : ଏଣିକି ଭାରତୀୟ ସେନାବାହିନୀରେ ଥିବା ପେଟୁଆ ଅଧିକାରୀମାନଙ୍କ ପଦୋନ୍ନତି ଅଟକିବ… ଯଦି ସେମାନେ ନିଜ ପେଟ ନ କମେଇବେ । ଏପରି ଏକ କଡା ନିଷ୍ପତ୍ତି ନେଇଛି ଭାରତୀୟ ସେନା । ଭାରତୀୟ ସେନା ବିଶ୍ୱର ଏକ ଶ୍ରେଷ୍ଠ ଶୃଙ୍ଖଳିତ ସେନା ହିସାବରେ ଜଣାଶୁଣା । କିନ୍ତୁ ବିଗତ କିଛି ବର୍ଷ ଧରି ଯବାନ ଓ ଅଫିସରମାନଙ୍କ ଓଜନ ବଢିଚାଲିଛି । କେତେକଙ୍କର ପେଟ ବାହାରିଯାଇଛି । ଏହାକୁ ନେଇ ସେନା ପକ୍ଷରୁ ନିୟମ କରାଯାଇଛି ଯେ ଯେଉଁ ଯବାନ କିମ୍ବା ଅଫିସର ପେଟ କମାଇବାରେ ବିଫଳ ହେବେ ସେମାନଙ୍କୁ ପଦୋନ୍ନତି ଦିଆଯିବନାହିଁ । ପ୍ରତି ଅଫିସରଙ୍କ ବାର୍ଷିକ ଗୋପନୀୟ ରିପୋର୍ଟରେ ତାଙ୍କର ଦୁଇଟି ଫଟୋ ରହିବ-ଗୋଟିଏ ଫଟୋ ସାମନାରୁ ଉଠାଯିବ ଓ ଅନ୍ୟଟି ଗୋଟିଏ ପାର୍ଶ୍ୱରୁ ଉଠାଯିବ । ଏହା ଫଳରେ ତାଙ୍କର ପେଟ କେତେ ବାହାରିଛି, ସେ କେତେ ମୋଟା ହୋଇଛନ୍ତି ତାହା ଜଣାପଡିବ । ଓଜନ ନ କମିଥିଲେ, ସେ ଫିଟ ନଥିଲେ ତାଙ୍କର ପଦୋନ୍ନତିକୁ ଅଟକେଇ ଦିଆଯିବ ।
Sambad is now on WhatsApp
Join and get latest news updates delivered to you via WhatsApp
ଆମ ପୁଲିସ ବାହିନୀରେ ପେଟୁଆ ଅଫିସରଙ୍କ ସଂଖ୍ୟା ଅଧିକ ଥିବାବେଳେ ସେନାରେ ମଧ୍ୟ ଏପରି ହେବାକୁ ସେନା ବହୁ ଗୁରୁତ୍ୱର ସହ ନେଇଛି । କାରଣ ସେନାର ଯବାନ ଓ ଅଫିସରମାନେ ସବୁବେଳେ ଫିଟ ରହିବା ଜରୁରୀ । ଏହାକୁ ଦୃଷ୍ଟିରେ ରଖି ସେନା ପକ୍ଷରୁ ଏପରି ପଦକ୍ଷେପ ନିଆଯାଇଛି ।