ଭାରତରେ ଦୁର୍ବଳ ହେଉଛି ଗଣତନ୍ତ୍ର! ସୂଚକାଙ୍କରେ ୧୦ ସ୍ଥାନ ତଳକୁ ଖସିଲା
୨୦୧୯ରେ ‘ଗଣତନ୍ତ୍ରର ପଶ୍ଚାତଗତି’
ନୂଆଦିଲ୍ଲୀ: ଗଣତନ୍ତ୍ର ସୂଚକାଙ୍କ ବିଶ୍ବ ରୢାଙ୍କିଂରେ ଭାରତ ୧୦ଟି ସ୍ଥାନ ତଳକୁ ଖସି ଆସିଛି। ଗଣତନ୍ତ୍ର ସୂଚୀ ତାଲିକାରେ ଭାରତ ଏବେ ୫୧ତମ ସ୍ଥାନରେ ରହିଛି। ଜମ୍ମୁ-କାଶ୍ମୀରରୁ ଧାରା ୩୭୦ ଏବଂ ୩୫(ଏ) ଉଚ୍ଛେଦ, ଆସାମରେ ଏନ୍ଆର୍ସି ଲାଗୁ ହେବା ଏବଂ ସଂଶୋଧିତ ନାଗରିକତା ଆଇନ ଯୋଗୁଁ ଭାରତରେ ସୃଷ୍ଟି ହୋଇଥିବା ଅଶାନ୍ତି ଓ ଆନ୍ଦୋଳନ ଯୋଗୁଁ ୨୦୧୯ରେ ଭାରତୀୟ ଗଣତନ୍ତ୍ରର ପଶ୍ଚାତ୍ଗତି’ ହୋଇଛି ବୋଲି ଏହି ରିପୋର୍ଟରେ ପ୍ରକାଶ ପାଇଛି।
Sambad is now on WhatsApp
Join and get latest news updates delivered to you via WhatsApp
ଇକନମିକ୍ ଇଣ୍ଟେଲିଜେନ୍ସ ୟୁନିଟ୍ ଏବଂ ଇକନମିଷ୍ଟ ଗ୍ରୁପ୍ର ଗବେଷଣା ଏବଂ ବିଶ୍ଳେଷଣ ବିଭାଗ ପକ୍ଷରୁ ବିଶ୍ବର ୧୬୫ ସ୍ବାଧୀନ ରାଷ୍ଟ୍ରରେ ଭୋଟ୍ ମାଧ୍ୟମରେ ଏହି ଗଣତନ୍ତ୍ର ସୂଚୀ ପ୍ରସ୍ତୁତ ହୋଇଛି। ୨୦୧୮ରେ ଭାରତ ୭.୨୩ ପଏଣ୍ଟ ହାସଲ କରିଥିବା ବେଳେ ୨୦୧୯ରେ ୬.୯୦ ପଏଣ୍ଟ ପାଇଛି। ଏହା ଫଳରେ ଭାରତ ୨୦୧୮ ତୁଳନାରେ ୨୦୧୯ରେ ୧୦ଟି ସ୍ଥାନ ତଳକୁ ଖସିଆସିଛି। ୨୦୧୯ ଗଣତନ୍ତ୍ର ସୂଚୀରେ ନରୱେ ସର୍ବାଧିକ ୯.୮୭ ପଏଣ୍ଟ ପାଇ ଶୀର୍ଷ ସ୍ଥାନ ହାସଲ କରିଥିବା ବେଳେ ଉତ୍ତର କୋରିଆ ୧.୦୮ ପଏଣ୍ଟ ହାସଲ କରି ଏହି ସୂଚୀର ସବୁଠୁ ତଳେ ରହିଛି। ସେହିଭଳି ଚୀନ୍ର ସ୍ଥାନ ମଧ୍ୟ ସୂଚୀର ଶେଷ ଆଡକୁ ରହିଛି। ଚୀନ୍ ୨.୨୬ ପଏଣ୍ଟ ହାସଲ କରି ଏହି ତାଲିକାର ୧୫୩ତମ ସ୍ଥାନରେ ରହିଛି। ୨୦୧୯ ବର୍ଷଟି ସମଗ୍ର ଏସିଆର ଗଣତନ୍ତ୍ର ପାଇଁ ‘ବିଭ୍ରାନ୍ତିକର ବର୍ଷ’ ଥିଲା ବୋଲି ଏହି ସୂଚୀରେ ଦର୍ଶାଯାଇଛି। ତେବେ ଥାଇଲାଣ୍ଡ ପୂର୍ବବର୍ଷ ତୁଳନାରେ ଉନ୍ନତି କରି ୩୮ତମ ସ୍ଥାନରେ ରହିଛି। ଜମ୍ମୁ-କାଶ୍ମୀରରୁ ଧାରା ୩୭୦ ଏବଂ ୩୫(ଏ) ଉଚ୍ଛେଦ, ଆସାମରେ ଏନ୍ଆର୍ସି ଲାଗୁ ହେବା ଏବଂ ନାଗରିକତା ସଂଶୋଧନ ଆଇନ୍କୁ ନେଇ ଦେଶ ବ୍ୟାପୀ ବିରୋଧ ଯୋଗୁଁ ୨୦୧୯ରେ ଭାରତରେ ଗଣତନ୍ତ୍ରର ଅବକ୍ଷୟ ଘଟିଛି ବୋଲି ରିପୋର୍ଟରେ ଉଲ୍ଲେଖ ରହିଛି। ଜମ୍ମୁ-କାଶ୍ମୀରରେ ବ୍ୟାପକ ସେନା ମୁତୟନ, ବିଭିନ୍ନ ସ୍ଥାନରେ ୧୪୪ ଧାରା ଜାରି ହେବା, ସ୍ଥାନୀୟ ନେତାଙ୍କୁ ଅଟକ ରଖିବା, ଇଣ୍ଟରନେଟ୍ ସେବା ବ୍ୟାହତ ଆଦି ବିଭିନ୍ନ କାରଣକୁ ନେଇ ଭାରତ ଗଣତନ୍ତ୍ର ସୂଚୀ ତାଲିକାରେ ୧୦ଟି ସ୍ଥାନ ତଳକୁ ଖସି ଆସିଛି ବୋଲି କୁହାଯାଇଛି।