ଘରୋଇ କମ୍ପାନି ସହାୟତାରେ ଅତ୍ୟାଧୁନିକ ଲଢୁଆ ବିମାନ ନିର୍ମାଣ କରିବ ଭାରତ
ନୂଆଦିଲ୍ଲୀ : ନିଜସ୍ୱ ଜ୍ଞାନ କୌଶଳରେ ନିର୍ମିତ ଲଢୁଆ ବିମାନ ତେଜସର ସଫଳତା ପରେ ଭାରତ ଏବେ ୫ମ ପିଢିର ଅତ୍ୟାଧୁନିକ ଲଢୁଆ ବିମାନ (ଏଏମସିଏ ବା ଆଡଭାନ୍ସଡ ମଲଟିରୋଲ କମ୍ବାଟ ଏୟାରକ୍ରାଫ୍ଟ) ନିର୍ମାଣ କରିବାକୁ ଯୋଜନା କରୁଛି । ଏହି ଲଢୁଆ ବିମାନ ସରକାରୀ-ଘରୋଇ ସହଭାଗିତାରେ ନିର୍ମାଣ କରାଯିବ ବୋଲି ଜଣାପଡ଼ିଛି । ରାଫେଲ ବିମାନ ୪.୫ ପିଢିର ହୋଇଥିବାବେଳେ ଭାରତ ନିର୍ମାଣ କରିବାକୁ ଥିବା ବିମାନ ତା’ଠାରୁ ଆହୁରି ଉନ୍ନତ ହେବ ।
Sambad is now on WhatsApp
Join and get latest news updates delivered to you via WhatsApp
ଏକ ଜାତୀୟ ସ୍ତରର ଖବରକାଗଜକୁ ହାଲ୍ (ହିନ୍ଦୁସ୍ତାନ ଏରୋନୋଟିକ୍ସ ଲିଃ)ର ନିର୍ଦ୍ଦେଶକ ଆର.ମାଧବନ ଦେଇଥିବା ସୂଚନା ଅନୁସାରେ ଘରୋଇ କମ୍ପାନିମାନଙ୍କ ସହଭାଗିତାରେ ଏହି ଲଢୁଆବିମାନ ନିର୍ମାଣ କରାଯିବ । ଏଥିପାଇଁ ହାଲ୍, ଡିଆରଡିଓ ଓ ଏକ ଘରୋଇ କମ୍ପାନି ସହ ସହଭାଗିତା କରାଯିବ । ଏହି ପ୍ରକଳ୍ପ ପାଇଁ ହାଲ୍ ଭିତ୍ତିଭୂମି ଯୋଗାଇଦେବ, ଡିଆରଡିଓ କେତେକ ପ୍ରଯୁକ୍ତି କ୍ଷେତ୍ରରେ ସହଯୋଗ କରିବ ଓ ଘରୋଇ କମ୍ପାନି ପୁଞ୍ଜିନିବେଶ କରିବ । କିନ୍ତୁ ହାଲ୍ ପକ୍ଷରୁ ଭିତ୍ତିଭୂମି ଯୋଗାଇ ଦିଆଯାଉଥିବାରୁ ଘରୋଇ କମ୍ପାନିର ଏ ବାବଦ ବ୍ୟୟ ହ୍ରାସ ପାଇବ । ହାଲ୍ ର ବାଙ୍ଗାଲୁରୁ ସେଣ୍ଟରରେ ଏହାର ପ୍ରୋଟୋଟାଇପ ଓ ଡିଜାଇନ ପ୍ରସ୍ତୁତ କରାଯିବ ଓ ନାସିକଠାରେ ଥିବା ହାଲ କାରଖାନାରେ ଏହାର ନିର୍ମାଣ କରାଯିବ ।
ହାଲ୍ ର ଏହି ପ୍ରକଳ୍ପ ପାଇଁ ଅନେକ ଭାରତୀୟ କମ୍ପାନି ଆଗ୍ରହ ପ୍ରକାଶ କରିଥିବା ଜଣାଯାଇଛି । ଆସନ୍ତା ୨୦୨୮ ସୁଦ୍ଧା ଏହି ବିମାନର ନିର୍ମାଣ ଆରମ୍ଭ ହେବାର ସମ୍ଭାବନା ରହିଛି ।