କେରଳ ମହିଳାଙ୍କ ଘର ବଞ୍ଚାଇଲେ ଭାରତୀୟ କୋଟିପତି ୟୁସୁଫ ଅଲି, ପରିଶୋଧ କଲେ ପୂରା ଋଣ

ତିରୁଅନନ୍ତପୁରମ୍: ଋଣ ଶୁଝି ନ ପାରିବାରୁ ନିଜ ଘରୁ ବାହାରିଯିବାକୁ ବାଧ୍ୟ ହୋଇଥିବା କେରଳର ଜଣେ ମହିଳାଙ୍କୁ ଉଦ୍ଧାର କରିବାକୁ ଆଗେଇ ଆସିଛନ୍ତି ଜଣେ ଭାରତୀୟ କୋଟିପତି। ସନ୍ଧ୍ୟା ଓ ତାଙ୍କ ଦୁଇ ସନ୍ତାନଙ୍କ ଘରକୁ ଏକ ଅଣବ୍ୟାଙ୍କିଙ୍ଗ୍ ଫାଇନାନ୍ସିଆଲ୍ କମ୍ପାନି (ଏନ୍‌ବିଏଫ୍‌ସି)ର ଅଧିକାରୀମାନେ ଦଖଲ କରିନେବା ପରେ ସେମାନଙ୍କୁ ଯିବାକୁ କୌଣସି ସ୍ଥାନ ମିଳି ନ ଥିଲା। ଏହି ସମୟରେ ଲୁଲୁ ଗ୍ରୁପର ଅଧ୍ୟକ୍ଷ ଆବୁଧାବିର ଏମ୍‌ଏ ୟୁସୁଫ ଅଲି ଭାରତରେ ଥିବା ତାଙ୍କ ଟିମ୍‌କୁ ସନ୍ଧ୍ୟାଙ୍କ ସମ୍ପୂର୍ଣ୍ଣ ବକେୟା ଋଣ ପରିଶୋଧ କରିବା ସହ ପରିବାରର ଥଇଥାନ ପାଇଁ ୧୦ ଲକ୍ଷ ଟଙ୍କା ପ୍ରଦାନ କରିବାକୁ ନିର୍ଦ୍ଦେଶ ଦେଇଥିଲେ।

କେରଳର ଉତ୍ତର ପରାଭୁରରେ ରହୁଥିବା ସନ୍ଧ୍ୟାଙ୍କ କାହାଣୀ ସେତେବେଳେ ସାମ୍ନାକୁ ଆସିଥିଲା ଯେତେବେଳେ ସ୍ଥାନୀୟ ଗଣମାଧ୍ୟମ ତାଙ୍କୁ ଉଚ୍ଛେଦ କରିବା ନେଇ ଖବର ପ୍ରକାଶ କରିଥିଲା। ମାଲାୟାଲମ ମିଡିଆ ‘ମାତୃଭୂମି’ ଅନୁଯାୟୀ, ସନ୍ଧ୍ୟା ଏବଂ ତାଙ୍କ ସ୍ୱାମୀ ୨୦୧୯ରେ ରାଜ୍ୟ ଜୀବନ ଆବାସ ଯୋଜନା ଅଧୀନରେ ସେମାନଙ୍କ ଘର ନିର୍ମାଣ ପାଇଁ ମଣପୁରମ୍ ଫାଇନାନ୍ସରୁ ୪ ଲକ୍ଷ ଟଙ୍କା  ଋଣ ନେଇଥିଲେ। ମଦାପ୍ଲଥୁରୁଥର ଏକ ଛୋଟ ଜମିରେ ଏହି ଘର ନିର୍ମାଣ କରାଯାଇଥିଲା, ଯେଉଁଥିରେ ଋଣ ସନ୍ଧ୍ୟାଙ୍କ ନାମରେ ନିଆଯାଇଥିଲା। ୨୦୨୧ ମସିହାରେ ସନ୍ଧ୍ୟାଙ୍କ ସ୍ୱାମୀ ତାଙ୍କୁ ଓ ତାଙ୍କର ୧୨ ଓ ୭ ବର୍ଷର ଦୁଇ ପିଲାଙ୍କୁ ଛାଡ଼ି ଚାଲିଯାଇଥିଲେ ଏବଂ ଋଣ ପରିଶୋଧ କରିବା ବନ୍ଦ କରିଦେଇଥିଲେ। ସମୟକ୍ରମେ ସୁଧ ସମେତ ବକେୟା ରାଶି ପାଖାପାଖି ୮ ଲକ୍ଷ ଟଙ୍କାକୁ ବୃଦ୍ଧି ପାଇଥିଲା। ବାରମ୍ବାର ଚେତାବନୀ ଦେବା ପରେ ମଣପୁରମ୍ ଫାଇନାନ୍ସ ପକ୍ଷରୁ ଚଢ଼ଉ ଆରମ୍ଭ ହୋଇଥିଲା।

ସୋମବାର ସେମାନଙ୍କ ଅଧିକାରୀମାନେ ଘରେ ପଶି ସନ୍ଧ୍ୟା ଓ ତାଙ୍କ ପିଲାମାନଙ୍କୁ ବାହାର କରିଦେଇ ନୂଆ ତାଲା ପକାଇଥିଲେ। ଉଚ୍ଛେଦ ଓ ସନ୍ଧ୍ୟାଙ୍କ କାହାଣୀ ଗଣମାଧ୍ୟମରେ ଖୁବ୍ ଶୀଘ୍ର ଲୋକଲୋଚନକୁ ଆସିଥିଲା। ଏହାପରେ ୟୁଏଇର ବ୍ୟବସାୟୀ ତଥା କେରଳର ବାସିନ୍ଦା   ଅଲି ସାହାଯ୍ୟ ପାଇଁ ଆଗେଇ ଆସିଥିଲେ। ଶ୍ରୀ ଅଲି ତାଙ୍କ ଟିମ୍‌କୁ ସମ୍ପୂର୍ଣ୍ଣ ଋଣ ପରିଶୋଧ କରିବାକୁ ନିର୍ଦ୍ଦେଶ ଦେବା ସହ ପରିବାରକୁ ୧୦ ଲକ୍ଷ ଟଙ୍କା ହସ୍ତାନ୍ତର କରିଥିବା ଜଣାପଡ଼ିଛି। ସୋମବାର ସନ୍ଧ୍ୟାରେ ଲୁଲୁ ଗ୍ରୁପର ମିଡିଆ ସଂଯୋଜକ ସନ୍ଧ୍ୟାଙ୍କୁ ଘରର ଚାବି ଦେଇଥିଲେ। ଅବଶିଷ୍ଟ ଟଙ୍କା ପରିବାରର ଭବିଷ୍ୟତ ପାଇଁ ଫିକ୍ସଡ୍ ଡିପୋଜିଟ୍ ହେବ। ପରାଭୁରର ଏକ ସ୍ଥାନୀୟ ଲୁଗା ଦୋକାନରେ କାମ କରି ଜୀବିକା ନିର୍ବାହ କରୁଥିବା ସନ୍ଧ୍ୟା ବଦାନ୍ୟତା ପାଇଁ କୋଟିପତିଙ୍କୁ କୃତଜ୍ଞତା ଜଣାଇଛନ୍ତି।