କାତାରରେ ୭ ମାସ ହେଲା ବନ୍ଦୀ ଅଛନ୍ତି ୮ ପୂର୍ବତନ ନୌସେନା କର୍ମଚାରୀ, ଫଳପ୍ରଦ ହେଉନି ଭାରତ ସରକାରଙ୍କ ଉଦ୍ୟମ
ନୂଆଦିଲ୍ଲୀ : ଗତ ୭ ମାସ ଧରି କତାରରେ ଜେଲରେ ଥିବା ଭାରତୀୟ ନୌସେନାର ୮ ଜଣ ପୂର୍ବତନ ଅଧିକାରୀଙ୍କ ସମସ୍ୟା ଦିନକୁ ଦିନ ବଢିବାରେ ଲାଗିଛି । ସେମାନଙ୍କ ମୁକ୍ତି ପାଇଁ ଭାରତ ସରକାରଙ୍କ ଉଦ୍ୟମ ଏପର୍ୟ୍ୟନ୍ତ ସଫଳ ହୋଇପାରିନାହିଁ ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ନୌସେନାର ଏହି ପୂର୍ବତନ ଅଧିକାରୀମାନଙ୍କ ବିରୋଧରେ କାତାର ସରକାର ଗୁପ୍ତଚରବୃତ୍ତି ପରି କେତେକ ସଂଗୀନ ଅଭିଯୋଗ ଆଣିଛନ୍ତି । ଏହା ସେମାନଙ୍କ ଭାରତ ଫେରିବାର ଆଶାକୁ ଧୂଳିସାତ୍ କରିଛି। ଏହି ଅବସରପ୍ରାପ୍ତ ଅଧିକାରୀମାନେ କତାର ନୌସେନାକୁ ପ୍ରଶିକ୍ଷଣ ଦେଉଥିବା ଏକ ଘରୋଇ କମ୍ପାନୀରେ କାମ କରୁଥିଲେ। ଅଗଷ୍ଟ ଶେଷ ଭାଗରେ ବିନା କାରଣରେ ତାଙ୍କୁ ଏକାନ୍ତ କାରାଗାରରେ ରଖାଯାଇଛି ।
ସେମାନଙ୍କୁ ମୁକ୍ତ କରି ଘରକୁ ଫେରିବା ପାଇଁ ସେମାନଙ୍କ ପରିବାର ଲୋକେ ଭାରତ ସରକାରଙ୍କ ସହାୟତା ଲୋଡ଼ିଛନ୍ତି। ବୈଦେଶିକ ବ୍ୟାପାର ମନ୍ତ୍ରଣାଳୟ ମଧ୍ୟ କହିଛି ଯେ ଏହି ମାମଲାକୁ ପ୍ରାଥମିକତା ଭିତ୍ତିରେ ବିଚାର କରାଯାଉଛି, କିନ୍ତୁ ସାତ ମାସ ପରେ ମଧ୍ୟ କୌଣସି ସଫଳତା ମିଳିନାହିଁ। ଏହା କାତାର ଉପରେ କୂଟନୈତିକ ଚାପ ପକାଇବା ପାଇଁ ସରକାରଙ୍କ ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଅଟକ ଥିବା ଭାରତୀୟ ନୌସେନାର ପୂର୍ବତନ ଅଧିକାରୀଙ୍କ ବିରୋଧରେ ଅଭିଯୋଗ ନିର୍ଦ୍ଧାରଣ ପାଇଁ ପ୍ରସ୍ତୁତି କରାଯାଉଛି ଏବଂ ସେମାନେ କତାର କୋର୍ଟରେ ବିଚାରର ସମ୍ମୁଖୀନ ହେବେ ବୋଲି କୁହାଯାଇଛି ।
ଗିରଫ ହୋଇଥିବା ଏହି ପୂର୍ବତନ ଅଧିକାରୀଙ୍କ ମଧ୍ୟରେ ଅଛନ୍ତି କ୍ୟାପଟେନ୍ ନବତେଜ ସିଂହ ଗିଲ୍, କ୍ୟାପଟେନ୍ ବୀରେନ୍ଦ୍ର କୁମାର ବର୍ମା, କ୍ୟାପ୍ଟେନ୍ ସୌରଭ ବଶିଷ୍ଠ, କମାଣ୍ଡର ଅମିତ ନାଗପାଲ, କମାଣ୍ଡର ପୂର୍ଣ୍ଣେନ୍ଦୁ ତିୱାରୀ, କମାଣ୍ଡର ସୁଗୁଙ୍କର ପାକଲା, କମାଣ୍ଡର ସଞ୍ଜୀବ ଗୁପ୍ତା ଏବଂ ନାବିକ ରାଗେଶ । ସେମାନଙ୍କୁ ଗତ ୨୦୨୨ ଅଗଷ୍ଟ ୩୦ ରେ ଦୋହାରୁ କତାର ଗୁଇନ୍ଦା ଏଜେନ୍ସି ଗିରଫ କରିଥିଲା। ତାଙ୍କ ଜାମିନ ଆବେଦନ ୮ ଥର ଖାରଜ ହୋଇସାରିଛି।