କରୋନା ଭାଇରସର ପ୍ରତିଷେଧକ ଟିକା ପ୍ରସ୍ତୁତ କରୁଛନ୍ତି ଭାରତୀୟ ବୈଜ୍ଞାନିକ, ପ୍ରାଥମିକ ଗବେଷଣା ସଫଳ !
ନୂଆଦିଲ୍ଲୀ: ଚୀନ ଓ ପୃଥିବୀର ୨୫ଟି ଦେଶ ଏବେ ପ୍ରାଣଘାତକ କରୋନା ଭାଇରସ ସଂକ୍ରମଣ ନେଇ ପାଇଁ ଚିନ୍ତିତ ଥିବା ବେଳେ କେବଳ ଚୀନରେ ଏହି ଭାଇରସ ୬୦୦ରୁ ଅଧିକ ଲୋକଙ୍କ ଜୀବନ ନେଲାଣି | ଏହି ଭାଇରସ କବଳରୁ କେମିତି ବର୍ତ୍ତିହେବ ସେ ନେଇ ବିଶ୍ବବ୍ୟପି ପ୍ରଚେଷ୍ଟା ଚାଲିଛି। ଏହାରି ମଧ୍ୟରେ ଅଷ୍ଟ୍ରେଲିଆରେ ରହୁଥିବା ଜଣେ ଭାରତୀୟ ବୈଜ୍ଞାନିକ କରୋନା ଭାଇରସ ମୁକାବିଲା ଲାଗି ଟିକା ପ୍ରସ୍ତୁତିର ନିକଟତର ହୋଇଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ରିପୋର୍ଟ ମୁତାବକ ଅଷ୍ଟ୍ରେଲିଆର କମନୱେଲଥ ସାଇଣ୍ଟିଫିକ ଆଣ୍ଡ ଇଣ୍ଡଷ୍ଟ୍ରିଆଲ ରିସର୍ଚ୍ଚ ଅର୍ଗାନାଇଜେସନ(ସିଏସଆଇଆରଓ) ରେ କାମ କରୁଥିବା ପ୍ରଫେସର ଏସ୍ ଏସ୍ ଭାସନ୍ କରୋନା ଭାଇରସରେ ପୀଡିତଙ୍କୁ କିଭଳି ଚିକିତ୍ସା କରାଯାଇପାରିବ ସେ ବିଷୟରେ ଗବେଷଣା କରୁଛନ୍ତି | ଚୀନର ଊହାନରୁ ଆସିଥବା ଭାଇରସର ଚିକିତ୍ସା ପଦ୍ଧତି ଖୋଜିବା ପାଇଁ ସବୁ ଦେଶର ବୈଜ୍ଞାନିକ ଲାଗିପଡିଥିବା ବେଳେ ଅଷ୍ଟ୍ରେଲିଆର ଡୋହାର୍ତି ଇନଷ୍ଟିଚ୍ୟୁଟର ବୈଜ୍ଞାନିକ ମଣିଷ ଶରୀରରୁ କରୋନା ଭାଇରସକୁ କାଢ଼ି ଅଲଗା କରିବାରେ ସକ୍ଷମ ହୋଇଥିଲେ |
ଏହା ପରେ ଭାଇରସକୁ ପରୀକ୍ଷାଗାରକୁ ଅଣାଯାଇଥିଲା, ଯେଉଁଠାରେ ଭାରତୀୟ ବୈଜ୍ଞାନିକ ଏସ୍ ଏସ୍ ଭାସନ୍ ଓ ତାଙ୍କ ନେତୃତ୍ବାଧୀନ ଗବେଷକ ଦଳ ଏହା ଉପରେ ପରୀକ୍ଷା କରିଥିଲା। ଗବେଷଣାକୁ ନେଇ ଭାସନ୍ କହିଛନ୍ତି ଯେ ଏବେ ଏହି ଭାଇରସର ଲକ୍ଷଣ ଓ କାରକ ବାବଦରେ ଗବେଷଣା କରାଯାଉଛି | ଏହା ପରେ ଖୁବ୍ ଶୀଘ୍ର ଟିକା ପ୍ରସ୍ତୁତ କରାଯିବ | ଏଠାରେ ସୂଚନା ଥାଉ କି ବର୍ତ୍ତମାନ ସୁଦ୍ଧା ଚୀନରେ କରୋନା ଭାଇରସ ଯୋଗୁଁ ୬୦୦ରୁ ଅଧିକ ଲୋକଙ୍କ ଜୀବନ ଯାଇଥିବାବେଳେ ୩୧ ହଜାରରୁ ଅଧିକ ଲୋକ ସଂକ୍ରମିତ ଅଛନ୍ତି |