ମେଲବର୍ଣ୍ଣ/ଚଣ୍ଡିଗଡ଼: ଅଷ୍ଟ୍ରେଲିଆରେ କିଛି ଭାରତୀୟ ଛାତ୍ରଙ୍କ ମଧ୍ୟରେ ସଂଘର୍ଷ ବେଳେ ଜଣେ ୨୨ ବର୍ଷୀୟ ଏମଟେକ୍ ଛାତ୍ରଙ୍କୁ ଛୁରି ଭୁସି ହତ୍ୟା କରାଯାଇଛି। ପୁଲିସ ଏହି ମାମଲାରେ ଭାରତୀୟ ବଂଶୋଦ୍ଭବ ଦୁଇ ଭାଇଙ୍କୁ ଖୋଜୁଛି। ମୃତ ଛାତ୍ରଙ୍କ ନାମ ନବଜିତ ସାନ୍ଧୁ ବୋଲି ଜଣାପଡ଼ିଛି। ହରିୟାଣାର କର୍ନାଲରେ ରହୁଥିବା ତାଙ୍କ ସମ୍ପର୍କୀୟ ୟଶବୀର କହିଛନ୍ତି ଯେ ଭଡ଼ା ପ୍ରସଙ୍ଗକୁ ନେଇ କିଛି ଭାରତୀୟ ଛାତ୍ରଙ୍କ ମଧ୍ୟରେ ହୋଇଥିବା ବିବାଦରେ ହସ୍ତକ୍ଷେପ କରିବାକୁ ଚେଷ୍ଟା କରୁଥିବା ବେଳେ ସାନ୍ଧୁଙ୍କୁ ଅନ୍ୟ ଜଣେ ଛାତ୍ର ଛୁରାମାଡ଼ କରିଥିଲା।
Sambad is now on WhatsApp
Join and get latest news updates delivered to you via WhatsApp
ନବଜିତଙ୍କ ପାଖରେ ଏକ କାର୍ ଥିବାରୁ ନବଜିତଙ୍କ ବନ୍ଧୁ (ଅନ୍ୟ ଜଣେ ଭାରତୀୟ ଛାତ୍ର) ତାଙ୍କୁ ତାଙ୍କ ଲଗେଜ୍ ଆଣିବା ପାଇଁ ତାଙ୍କ ଘରକୁ ଯିବାକୁ କହିଥିଲେ। ସାଙ୍ଗ ଭିତରକୁ ଯାଇଥିବା ବେଳେ ନବଜିତ ଚିତ୍କାର ଶୁଣି ଘରେ ପ୍ରବେଶ କରିବାରୁ ସେମାନଙ୍କ ମଧ୍ୟରେ ଧସ୍ତାଧସ୍ତି ହେଉଥିବା ଦେଖିଥିଲେ। ଝଗଡ଼ା ନ କରିବାକୁ କହି ନବଜିତ ହସ୍ତକ୍ଷେପ କରିବାକୁ ଚେଷ୍ଟା କରିବାରୁ ତାଙ୍କ ଛାତିରେ ଛୁରି ମାଡ଼ ହୋଇଥିଲା। ନବଜିତଙ୍କ ଭଳି ଅଭିଯୁକ୍ତ ମଧ୍ୟ କର୍ନାଲର ବାସିନ୍ଦା ବୋଲି ସେ କହିଛନ୍ତି। ଯଶବୀର କହିଛନ୍ତି ଯେ ପରିବାର ଲୋକ ଏହି ଘଟଣା ବିଷୟରେ ଜାଣିବାକୁ ପାଇଛନ୍ତି। ତାଙ୍କ ସହ ଥିବା ନବଜିତଙ୍କ ଜଣେ ସାଙ୍ଗ ମଧ୍ୟ ଆହତ ହୋଇଛନ୍ତି।