ନୂଆଦିଲ୍ଲୀ : ଭାରତରେ ଏବେ ଦୁଇଟି କରୋନା ଟୀକା ଉପରେ ପରୀକ୍ଷଣ ଚାଲିଛି । ପଶୁମାନଙ୍କ ଉପରେ ସେଗୁଡ଼ିକର ପରୀକ୍ଷଣ ସଫଳର ରହିବା ପରେ ମାନବ ପରୀକ୍ଷଣ ଆରମ୍ଭ ହୋଇଛି ବୋଲି ଭାରତୀୟ ଭେଷଜ ଗବେଷଣା ପରିଷଦ (ଆଇସିଏମଆର) ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ସ୍ୱାସ୍ଥ୍ୟ ମନ୍ତ୍ରାଳୟର ସାମ୍ବାଦିକ ସମ୍ମିଳନୀ ଅବସରରେ ଆଇସିଏମଆରର ମହାନିର୍ଦ୍ଦେଶକ ଡ. ବଳରାମ ଭାର୍ଗବ କହିଛନ୍ତି ଯେ ଏହି ଟୀକାଗୁଡ଼ିକର ଟକ୍ସିସିଟି ପରୀକ୍ଷଣ ମୂଷା ଓ ଠେକୁଆମାନଙ୍କ ଉପରେ କରାଯାଇଛି । ସେଗୁଡ଼ିକ ସଫଳ ରହିଛି । ଏହି ପରୀକ୍ଷା ସଂପର୍କିତ ତଥ୍ୟ ଭାରତୀୟ ଔଷଧ ମହାନିୟନ୍ତ୍ରକ (ଡିସିଜିଆଇ)ଙ୍କ ନିକଟରେ ରଖାଯିବାପରେ ଡିସିଜିଆଇ ମାନବ ପରୀକ୍ଷଣ ପାଇଁ ଅନୁମତି ଦେଇଥିଲେ । ଏହା ପରେ ଟୀକାଦୁଇଟିର ମାନବ ପରୀକ୍ଷଣ କରାଯାଉଛି । ପ୍ରତି ଟୀକାର କ୍ଲିନିକାଲ ଷ୍ଟଡି ପ୍ରାୟ ୧ ହଜାର ସ୍ୱେଚ୍ଛାସେବୀଙ୍କ ଉପରେ କରାଯାଉଛି ।
ସୂଚନାଯୋଗ୍ୟ ଯେ ଦୁଇଟି ଭାରତୀୟ କମ୍ପାନି ଭାରତ ବାୟୋଟେକ ଓ ଜାଇଡସ କାର୍ଡିଲା ଏହି ଦୁଇଟି ଟୀକାର ବିକାଶ ଦିଗରେ କାର୍ଯ୍ୟକରୁଛନ୍ତି । ଉଭୟ କମ୍ପାନି ଏବେ ଏସବୁ ଟୀକାର ମାନବ ପରୀକ୍ଷଣ କରୁଛନ୍ତି । ଭାରତ ବାୟୋଟେକ ଦ୍ୱାରା ପ୍ରସ୍ତୁତ ଟୀକାର ନାମ ରଖାଯାଇଛି କୋଭାକ୍ସିନ । ଆଇସିଏମଆର ସହଯୋଗରେ କମ୍ପାନି ଏହି ଟୀକା ପ୍ରସ୍ତୁତ କରୁଛି । ଏହି ଟୀକାର ପରୀକ୍ଷଣ ପାଇଁ ଆଇସିଏମଆର ପକ୍ଷରୁ ୧୨ଟି ପ୍ରତିଷ୍ଠାନକୁ ବଛାଯାଇଛି ।