ଚୀନ୍ରେ ଥିବା ଭାରତୀୟମାନେ କୋଭିଡ୍-୧୯ ଓ ସୀମା ବିବାଦ ଭଳି ଦୁଇଟି ଚାଲେଞ୍ଜ୍ର ସମ୍ମୁଖୀନ ହେଉଛନ୍ତି: ଭାରତୀୟ ରାଷ୍ଟ୍ରଦୂତ
ବେଜିଙ୍ଗ୍: ଭାରତ ଏବଂ ଚୀନ୍ରେ ଥିବା ଭାରତୀୟମାନେ ମହାମାରୀ ଓ ସୀମା ବିବାଦ ଭଳି ଦୁଇଟି ଚାଲେଞ୍ଜ୍ର ସମ୍ମୁଖୀନ ହେଉଥିବା କଥା ଶନିବାର ଦିନ ଚୀନ୍ସ୍ଥିତ ଭାରତୀୟ ରାଷ୍ଟ୍ରଦୂତ ବିକ୍ରମ ମିଶ୍ରି କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ଏହି ଚାଲେଞ୍ଜ୍ର ମୁକାବିଲା କରିବାକୁ ନାଗରିକମାନେ ସମ୍ମିଳିତ ହୁଅନ୍ତୁ।
Sambad is now on WhatsApp
Join and get latest news updates delivered to you via WhatsApp
୭୪ତମ ସ୍ବାଧୀନତା ଦିବସ ପାଳନ ଲାଗି ବେଜିଙ୍ଗ୍ର ଗୁଳୁଗୁଳିଆ ସକାଳେ ‘ଇଣ୍ଡିଆ ହାଉସ୍’ ଠାରେ ସମବେତ ହୋଇଥିବା ଭାରତୀୟଙ୍କୁ ସମ୍ବୋଧନ କରି ମିଶ୍ରି କହିଲେ, ଯାହା ଆପଣମାନେ ରାଷ୍ଟ୍ରପତିଙ୍କ ଅଭିଭାଷଣରୁ ଶୁଣିଲେ, ୨୦୨୦ ଖୁବ୍ ଗୋଟାଏ ଅସ୍ବାଭାବିକ ବର୍ଷ। ଚୀନ୍ରେ ଥିବା ଆମ୍ଭମାନଙ୍କ ପାଇଁ ମଧ୍ୟ। ଏଠାରେ ଆମ୍ଭେମାନେ ଓ ଭାରତରେ ଆମ୍ଭ ଲୋକମାନେ ମଧ୍ୟ କୋଭିଡ୍-୧୯ ତଥା ସୀମାନ୍ତ ଆକ୍ରମଣ ଭଳି ଯମଜ ଆହ୍ବାନର ସମ୍ମୁଖୀନ ହୋଇଛନ୍ତି।
ଦୁଇଟି ଆହ୍ବାନ ବା ଚାଲେଞ୍ଜ୍ କଥା ଦର୍ଶାଇ ମିଶ୍ରି କହିଲେ ସେ ସବୁର ସମ୍ମୁଖୀନ ହେବାକୁ ଉଦ୍ୟମ ଓ ତ୍ୟାଗ ଆବଶ୍ୟକ।
ଚୀନ୍ ରାଜଧାନୀରେ କ୍ଷମତାର ରୁଦ୍ଧ କରିଡର୍ ଭିତରେ ସୀମା ସଂକ୍ରାନ୍ତ ଯୋଗସୂତ୍ର ଚାନେଲ୍ ଖୋଲା ରଖିବା ଲାଗି ଭାରତ ଯେଉଁ ଉଦ୍ୟମ କରୁଛି ତାହାର ମୁଖ୍ୟ ସ୍ଥାନରେ ଅଛନ୍ତି ମିଶ୍ରି। ସୀମା ବିଷୟରେ ନୂଆଦିଲ୍ଲୀର ସ୍ଥିତି ସମ୍ବନ୍ଧରେ ବେଜିଙ୍ଗ୍ରେ ଅବସ୍ଥିତ ଅନ୍ୟାନ୍ୟ ଦୂତାବାସ ଓ କୂଟନୀତିଜ୍ଞଙ୍କୁ ଅବଗତ କରାଇବା ଛଡ଼ା ଏ ସପ୍ତାରେ ମିଶ୍ରି ଦୁଇଟି ସଭା କରିଛନ୍ତି। ଏ ସଭାରେ ସେ କମ୍ୟୁନିଷ୍ଟ୍ ପାର୍ଟି ଅଫ୍ ଚାଇନାର ଜଣେ ବରିଷ୍ଠ କାର୍ଯ୍ୟକର୍ତ୍ତା ଏବଂ ଚୀନ୍ର ସଶସ୍ତ୍ର ବାହିନୀକୁ ଅନୁଶାସନ କରୁଥିବା ସେଣ୍ଟ୍ରାଲ୍ ମିଲିଟାରି କମିସନ୍ର ଜଣେ ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି।