ଚୀନର ପ୍ରତିରକ୍ଷା ବଜେଟ୍ ଭାରତର ୩ ଗୁଣ
ନୂଆଦିଲ୍ଲୀ : ଭାରତର ପ୍ରତିରକ୍ଷା ବଜେଟ୍ ବିଶ୍ବରେ ୩ୟ ସର୍ବାଧିକ । ଯୁକ୍ତରାଷ୍ଟ୍ର ଆମେରିକାର ପ୍ରତିରକ୍ଷା ଖର୍ଚ୍ଚ ବିଶ୍ବରେ ସର୍ବାଧିକ ହୋଇଥିବାବେଳେ ତା ତଳକୁ ଚୀନ ରହିଛି ବୋଲି ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ସଂସଦରେ ସୂଚନା ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ ଭାରତ ସରକାର ଅନ୍ୟ ଦେଶଙ୍କ ପ୍ରତିରକ୍ଷା ବଜେଟ ସଂପର୍କିତ ତଥ୍ୟ ରଖନ୍ତି ନାହିଁ । ତେବେ ଷ୍ଟକହୋମ ଇଣ୍ଟରନ୍ୟାସନାଲ ପିସ ରିସର୍ଚ୍ଚ ଇନଷ୍ଟିଚ୍ୟୁଟ (ସିପ୍ରି)ର ତଥ୍ୟକୁ ଅଧାର କରି ଏହି ସୂଚନା ପ୍ରସ୍ତୁତ କରାଯାଇଛି ।
ପ୍ରତିରକ୍ଷା ଖର୍ଚ୍ଚରେ ଚୀନ ତଳକୁ ଭାରତ ଥିଲେ ବି ଉଭୟଙ୍କ ପ୍ରତିରକ୍ଷା ଖର୍ଚ୍ଚ ମଧ୍ୟରେ ଏକ ବଡ଼ ବ୍ୟବଧାନ ରହିଛି । ଚୀନର ପ୍ରତିରକ୍ଷା ବଜେଟ ଭାରତର ପ୍ରାୟ ୩ ଗୁଣ ବୋଲି ସିପ୍ରି ରିପୋର୍ଟ କହିଛି । ଚୀନ ସହ ଭାରତର ବିବାଦ ଥିବାରୁ ଉଭୟ ଦେଶର ପ୍ରତିରକ୍ଷା ବଜେଟରେ ବଢିଚାଲିଥିବା ବ୍ୟବଧାନ ଚିନ୍ତା ସୃଷ୍ଟି କରିଛି । ଚୀନ ଦ୍ରୁତ ଗତିରେ ନିଜର ପ୍ରତିରକ୍ଷା ବଜେଟ ବଢାଇ ସେନାର ଆଧୁନୀକିକରଣ କରିଚାଲିଛି ।
ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, ଆମେରିକାର ପ୍ରତିରକ୍ଷା ବଜେଟ ୮୦୦,୬୭୨ ନିୟୁତ ଡଲାର ଥିବାବେଳେ ଚୀନର ପ୍ରତିରକ୍ଷା ବଜେଟ ୨୯୩୩୫୧ ନିୟୁତ ଡଲାର ଓ ଭାରତର ପ୍ରତିରକ୍ଷା ବଜେଟ ୭୬୫୯୮ ନିୟୁତ ଡଲାର ରହିଛି । ଭାରତ ନିଜ ପ୍ରତିରକ୍ଷା ବଜେଟର ୩୩-୪୧ ପ୍ରତିଶତ ବିଦେଶୀ ଅସ୍ତ୍ରଶସ୍ତ୍ର କିଣିବାରେ ବ୍ୟୟ କରେ ବୋଲି ମନ୍ତ୍ରାଳୟ କହିଛି ।