ଭାରତର କମ୍ୟୁନିକେସନ୍ ସାଟେଲାଇଟ୍ ‘ଜିସାଟ୍-୨୪’ର ସଫଳ ଉତ୍କ୍ଷେପଣ କଲା ୟୁରୋପର ‘ଏରିଏନ୍ସ୍ପେସ୍’
ବେଙ୍ଗାଲୁରୁ: ‘ନିୟୁସ୍ପେସ୍ ଇଣ୍ଡିଆ ଲିମିଟେଡ୍’ (ଏନ୍ଏସ୍ଆଇଏଲ୍) ନିମନ୍ତେ ‘ଇସ୍ରୋ’ ନିର୍ମାଣ କରିଥିବା ସାଟେଲାଇଟ୍ ‘ଜିସାଟ୍-୨୪’କୁ ଆଜି ଦକ୍ଷିଣ ଆମେରିକା ଅନ୍ତର୍ଗତ ଫ୍ରେଞ୍ଚ୍ ଗୁଆନାର କୁରୋସ୍ଥିତ ଫାରାସୀ କମ୍ପାନିର ‘ଏରିଏନ୍ସ୍ପେସ୍’ରୁ ସଫଳତାର ସହ ଉତ୍କ୍ଷେପଣ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ସମଗ୍ର ଭାରତ ପାଇଁ ‘ଡିଟିଏଚ୍ ଆପ୍ଲିକେସନ୍’ର (ଟେଲିଭିଜନ୍) ସମସ୍ତ ଆବଶ୍ୟକତା ପୂରଣ କରୁଥିବା ୪୧୮୦ ଓଜନର ‘ଜିସାଟ୍-୨୪’ ହେଉଛି ଏକ ’୨୪-କେୟୁ’ ବ୍ୟାଣ୍ଡ୍ କମ୍ୟୁନିକେସନ୍ ସାଟେଲାଇଟ୍।
କୋରୁଠାରେ ଥିବା ୟୁରୋପ୍ର ସ୍ପେସ୍ପୋର୍ଟ ‘ଗୁଆନା ସ୍ପେସ୍ ସେଣ୍ଟର୍’ରୁ ‘ଏରିଏନ୍-୫ ‘ଭିଏ୨୫୭’ ରକେଟ୍ଦ୍ବାରା ଆଜି ସକାଳ ୬: ୫୦ରେ ଉତ୍କ୍ଷେପଣ କରାଯାଇଥିବା ‘ଜିସାଟ୍-୨୪’ ମହାକାଶକୁ ଯାଇ ‘ଜିଓଷ୍ଟେସନାରି ଟ୍ରାନ୍ପୋର୍ଟ ଅର୍ବିଟ୍’ରେ ସ୍ଥାପିତ ହୋଇଛି।
ଏହା ବ୍ୟତିରେକେ, ‘ଏୟାର୍ବସ୍ ଡିଫେନ୍ସ୍ ଆଣ୍ଡ୍ ସ୍ପେସ୍’ଦ୍ବାରା ନିର୍ମିତ ‘ମଲ୍ଟି-ମିସନ୍ ଟେଲିକମ୍ୟୁନିକେସନ୍’ ସାଟେଲାଇଟ୍ ‘ମିସାଟ୍-୩’କୁ ମଧ୍ୟ ଏହି ଅଭିଯାନରେ ମହାକାଶକୁ ଉତ୍କ୍ଷେପଣ କରାଯାଇଛି।
ପ୍ରଥମ ଥର ପାଇଁ ଅନ୍ୟର ଚାହିଦା ମୁତାବକ ନିର୍ମିତ ହୋଇ ମହାକାଶକୁ ଯାଇଥିବା ‘ଜିସାଟ୍-୨୪’ ଉନ୍ନତ ମାନର ଟେଲିଭିଜନ୍, ଟେଲିଯୋଗାଯୋଗ ଏବଂ ପ୍ରସାରଣ ସେବା ଯୋଗାଇବା ସହ ଭାରତୀୟ ଗ୍ରାହକମାନଙ୍କ ‘ଡିଟିଏଚ୍’ ଆବଶ୍ୟକତା ପୂରଣ କରିବ।
ସୂଚନାଯୋଗ୍ୟ, ଆଜିର ସଫଳ ଉତ୍କ୍ଷେପଣକୁ ମିଶାଇ ‘ଏରିଏନ୍-୫’ ସମୁଦାୟ ୧୧୩ଟି କ୍ଷେପଣାସ୍ତ୍ର ଉତ୍କ୍ଷେପଣ କରିସାରିଲାଣି। ‘ଏସିଆ-ପେସିଫିକ୍’ ଅଞ୍ଚଳରେ ମଧ୍ୟ ‘ବ୍ରଡ୍ବ୍ୟାଣ୍ଡ୍ କଭରେଜ୍’କୁ ଉନ୍ନତ କରିବ ‘ଏରିଏନ୍ସ୍ପେସ୍’ କହିଛି।
ଉଲ୍ଲେଖଯୋଗ୍ୟ, ମହାକାଶ ବିଭାଗ ଅଧୀନରେ ଥିବା ଭାରତ ସରକାରଙ୍କ କମ୍ପାନି ‘ନିୟୁସ୍ପେସ୍ ଇଣ୍ଡିଆ ଲିମିଟେଡ୍’ ତା’ର ସମଗ୍ର ସାଟେଲାଇଟ୍ କାର୍ଯ୍ୟକଳାପ ‘ଟାଟା ପ୍ଲେ’କୁ ଲିଜ୍ ଦେଇଛି।